Meho ezi na ndindilire

Esimwititi lyaZoya Dimitrova

Apa na kere mudinkantu meho zange zokulihameka moudano wokulindirumuna kwa sikire mo. Nye, momazuva 4 gaSitarara 1970 tani ligwanekere nosimpagwa. Ame kwa kere moudano wokulindirumuna. Na li harukire ko pevhu nina kara.

K WA hampurukire nge 16 Sindimba 1952, name namukurwange gomukadi novakurona vetu kwa tungire momukunda gwaSofia, moBulgaria. Posiruwo sina, epangero lyomoBulgaria ngali korangeda vantu va dire kuhamena koukareli, nye kapi lya u silikire. Sinzi sovantu kapi va pulire mwaKarunga ano ava va pulire mwendi, epuliro lyawo kwa kere mokahore-hore. Nampili ngomu epata lyetu ngava li tumbura asi wongereka zoVaotodoksi, ame kapi na litulire mo ntani kapi na kere nosinka kuhamena Karunga.

Pounona ame kwa here kulihameka unene mwankenye maudano, unene po wokulindirumuna. Apa na kere nonomvhura 13, mugara gumwe kwa wizire kosure a ya papare mukadona ogu na vhura kukadeura moudano wokulindirumuna. Murongi gwange ta pandadeke nge asi nyame yina fire. Ame kwa lizuvhire uwaawa pokuronda metuwo lyogo mugara, nokuza va ka puragere nge nokukadeura nge. Apa ya ka pwire oyo, tava tambura nge. Esi kwa kere siruwo sokutameka nedeuro ano eliyombereso eli kwa gusire kupitakana nomvhura mbali. Apa na kere nonomvhura 15, edeuro lyange yipo lya pwire yipo na tamekere neparu lyoudano wokulindirumuna. Posikando sokuhova ame kwa zire dogoro moBulgaria noyirongo ya kere mEgwanekero lyaSoviet dogoro koAlgeria Hungary ntani Yugoslavia.

Nomvhura ntatu ame kwa haferere eparu lyange. Simpagwa sina nina tumbura kwa horokere momukunda gwaTitov Veles, moMakedoniya. Ame kwa kere keguru lyosirondero sosire awo vantu kuna kutarera udano ou twa rugene. Mukwetu ogu na dene nage ga hepere kukwata ewoko lyange. Pokulimbirumuka tani sekuna ewoko lyendi ano rugodi oru rwa kwete nge mombunda taru ndembuka, makura tani ka lidaya pevhu. Tava dukisire nge kosipangero, ewoko lyange kwa tekere noyisupa yimwe yonompatji nosisupa somugongo. Mazuva gongandi kapi na divire eyi ya horokere. Apa na ya lizuvhire ko hansa, yipo na yi dimbwilire asi rutu rwange runa fu kutundira kombunda dogoro komaguru. Morwa simpe mudinkantu na kere, na kere nehuguvaro asi ngani gwana uhaku ndi etauro, makura ngani gende hena nokutengwira koudano wange.

Monomvhura mbali noukahe, ame kwa gwene uhaku moyipangero yokulisiga-siga, nye na kere simpe nehuguvaro asi ngani veruka.  Moruhura tani ya yi tambura asi meho zange zoudano zina haga. Na hepere kuyayika eparu eli na dilire kundindira, lyokuruganesa sipundi sourema.

Eparu lyange lyepe

Pokugazara eparu lyange lyanare, na gazarere asi kapi ngani yiyika kukara sirema. Morwa kudira ehuguvaro, yipo na kere meguwo lyenene. Mo-1977 mudinkantugara gedina Stoyan kwa wizire pembo lyange. Apa na dimbwilire asi age kwa kere mukurwakaume zange gwanare, yipo na mu zigidire a hwilire. Monzogera zetu, age kwa pulire nge nsene ngani veruka. Morwa eparu lyange udigu lya kere, tani mu limburura asi kapi na kere nehuguvaro. Apa ga tanterere nge asi Karunga gelike gokuvatera nge, tani limburura nehandu asi: “Nsene asi Karunga pweli, morwasinke nina karere moukaro wangesi?”

Stoyan, ogu nga rugana udano wokulifana, kwa ya kere gumwe goNombangi daJehova apa nga ka ruganena moAmerika, kwa fatwilire nge monaruwa matumbwidiro gomawa gokomeho goBibeli. Ame kwa hefe pokulironga asi ntaantani evhu ngali kare paradisa. Kwa gumine nge komutjima etumbwidiro eli asi: “Nomfa kapi hena ngadi kara ko, neguwo si nomalirankali nokukora kapi ngayi kara ko hena.” (Ehororo 21:4) Omu tupu na kere neharo lyononkondo mokukakara gwandjewa-ndjewa! Poopo tupu tani tameke kulironga Bibeli. Yipo na tamekere neparu lyepe. Na gwene ehuguvaro lyene-lyene!

Nkenye sivike ame ngani ndindire nononkondo elirongo lyange lyoBibeli. Pomuhowo kwa lirongere naStoyan, ano konyima naTotka. Nevatero lyendi, ediwo lyange lyousili woBibeli kwa ligwedererere, makura tani ya ligava kwaJehova Karunga. Posiruwo sina, momukunda gwaSofia kwato ogu ga kere mo gokuwapera kukuhwa nge, yipo na hepere kundindira dogoro munazinyetugara a ya dingure moMakedoniya. Konyima zokulironga Bibeli mvhura zimwe, momazuva 11 gaSitarara 1978, yipo na gwene ekuho membo lyange metemba lyokuzoganena. Ekuho lyange ngagumwe goNombangi daJehova kwa reterere nge ruhafo rorunene ano eparu lyange lya kere nositambo.

Usili ou na lirongere kwa twire nge komutjima. Ame ngani tantere ko nkenye ogu ga wiza pembo lyange kuhamena ehuguvaro lyange lyokomeho. Kwa monekere ngwendi asi vantu kapi ngava yi pakere mbili eyi ngani uyunga, morwa nampo ngava gazara asi na zaruka morwa urema wange.

Etokoro lyedona

Posiruwo sina, Nombangi daJehova kwa di hagekesere moBulgaria, ano vasesu va kere mosirongo nasinye. Kapi kwa kere mapongo  ntani vasesu ava va kere nepuliro lyange. Morwa oyo ntani kudira kunongonona siponga sokukara novantu ava ava dili kuparuka nonompango doBibeli, ya twaredesere nge ni ture po etokoro lyedona.

Ezwi lyange lyokomutjima ngali hepeke nge, na lizuvhire kukora morwa kukara ure naJehova Karunga. Morwa eguwo nonomuga, yipo na kanderere kwaJehova, nokumulikwambera a gusire nge po. Konyima, nevatero lyovakuronambunga wokuhara, tani wapukurura upampepo wange ntani na gwene hena ruhafo mokukarera Jehova. Ee, ruhafo musi mokukarera Jehova nezwi lyewa lyokomutjima nokulipakerera kumwe nombunga zendi!

Na gwana ruhafo nampili ngomu na remana

Simpagwa sange esi sa horokere nomvhura 40 da ka pita kwa zonagwisire meho zange zomoudano ntani sa tura nge mourema. Nye, ame kapi nina kara noruguwo ndi livere asi eparu lyange kutupu mulyo. Usili womoBibeli kwa vatera nge ni dimburure asi meho zange zomoudano kwa pere nge tupu ruhafo netompoko lyopokaruwogona. Ame na mona vakwetu ava ngani rugana nawo moudano omu ya va sumpira meparu. Nye, ame na gwana ungawo wounene, elikwatakano noMusiti gwange, Jehova Karunga. Ayo ya retera nge ruhafo rorunene oru ngano na dilire kugwana meparu lyoudano wokulindirumuna.

Mokugwederera ko, ame na limonene ruhafo rokumona wovanzi vana kugwana ediwo lyousili womoBibeli nokuligava eparu lyawo kwaKarunga gwetu geharo, Jehova. Apa na tamekere kulironga Bibeli mo-1977, moBulgaria kwa kere mo tupu Nombangi daJehova dononsesu. Nampili kehagero lyo-1991 apa Nombangi daJehova va di pulisilire paveta konyima lya hege epangero lyoUkomunisi, kapi simpe pwa kere Nombangi dononzi mosirongo nasinye. Ee, ruhafo musi mokumona omu sivaro sovazuvhisi sina ligwederere ko-1 800!

Simpe yirugana yoyinzi yina hepa moBulgaria. Wovanzi kuna kupapara ediwo lyoNonkango  daKarunga. Eyi kuyimonena kosivaro sovakalimo wokusika po-3 914 pEdiworoko lyonomfa daKristusa momvhura 2010. Ame nina hafa pokumona asi Jehova ga tungika sivaro somoBulgaria. Ngamoomu va yi pumbire mwaJesaya 60:22, nayi limonene asi ‘epata lyenunu’ lina kara ‘nononkondo ngwendi muhoko.’

Eyi hena ya hafesere nge unene kuna kara epwageso lyoNew World Translation of the Holy Scriptures meraka lyomoBulgaria. Eyi kwa horokere mwaSiwogedi 2009 poSigongi sonomukunda “Vangarareni!” esi sa karerere momukunda gwaSofia. Epwageso eli lyoBibeli meraka lyanyamwange kwa hafesere nge sili. Azo ngazi vatera vantu wovanzi va gwane ediwo lyousili lyomoBibeli moBulgaria.

Nampili ngomu urema wange kuninkisa nge ni dire kulihameka mo unene moyirugana yokuzuvhisa mbudi zongwa zoUhompa waKarunga, ame kuhafesa nge mokutantera ko vamusinda vange nankenye ogu a wiza pembo lyange. Sikando simwe, kwa zigidire musinda gwange ogu ga pitire. Ta wiza, konyima zokumupa ko makorangeda gamwe gomoBibeli, poopo ta tambura elirongo lyoBibeli. Ame kwa hefe unene apa ga ya gwene ekuho ngamunazinyetukadi gopampepo. Ame kwa vatera vantu vane va ligave vene kwaJehova.

Ame kwa gwene ruhafo rorunene nekorangedo pokukakara nkenye apa komapongo nokovanavazinyetu wovanzi, ava va ya kara ngwendi epata lyange. Morwa kutunga mosirongo omu mwa dira kukara mawapaiko goyigenderwa yokuvatera vakurupe noyirema, ayo kukarera nge udigu mokuza komapongo. Nye ame kugwana evatero kwamunazinyetugara gokuhara. Nkenye epongo, age kudamuna nge monzugo zange ta rondeke nge metuwa lyendi tu ze koSinyanga soUhompa nokukatengwinda nge hena. Ame kuna kugava rupandu kwaJehova komfumwa zokukara ruha rwepata lyopampepo lyokuhara.

Nsene ni diworoka, meho ezi na kere nazo pounona kapi za ya horokere moomu na zi harerere. Kukarera Jehova kwa retera nge ruhafo rorunene ngesi ntani nehuguvaro lyokutetukisa lyokomeho. Ame kwa hara etumbwidiro lyaKarunga eli asi moparadisa pevhu “yirema yomondambo ngayi lidinkura tayi dana.” (Jesaya 35:6) Ame kuna kundindira nehuguvaro posiruwo apa ngani ka vatuka posipundi sange, ni ka kare ngwadjewa-ndjewa ntani gononkondo.

[Nonkango depepenuno 20]

“Ame kwa gwene ruhafo rorunene nekorangedo pokukakara nkenye apa komapongo nokovanavazinyetu wovanzi”

[Nonkango depepenuno 21]

“Eyi hena ya hafesere nge unene kuna kara epwageso lyoNew World Translation of the Holy Scriptures meraka lyomoBulgaria”

[Efano lyepepenuno 19]

Kwa tamekere meho zange zoudano wokulindirumuna ponomvhura-15