Lirongera ko kononkango daKarunga

Morwasinke ga pulisira Karunga udona noruhepo?

Sirongwa esi kwa tumbura mapuro gamwe aga nampo wa lipura nokukakulikida asi kupi oku no vhura kuresa moBibeli zoge o gwane malimbururo. Nombangi daJehova nava ka yi hafera pokukazogera kumwe nove malimbururo ogo.

1. Ngapi omu udona wa tamekere?

Udona kwa tamekere pevhu paapa ga tente Satana yimpempa yokuhova. Satana apa va mu sitire kapi ga kere muntu gomudona. Age kwa kere muengeli gokusikilira mo, nye ‘kapi ga kere mousili.’ (Johanesa 8:44) Age kwa tungire po edowo lyoukareli ou wa tumbukira Karunga gelike. Satana kwa kumbagerere mukadi gokuhova, Eva, nokumuzeda a dire kulimburukwa Karunga. Adamu ga ya lipakererere naEva mokudira kulimburukwa Karunga. Etokoro lyaAdamu kwa reta ruhepo nonomfa.—Resa Genesis 3:1-6, 17-19.

Apa Satana ga tanterere Eva a dire kulimburukwa Karunga, age kwa rwanesere upangeli waKarunga. Vantu wovanzi kwa lipakerera naSatana mokunyoka Karunga ngoMupangeli. Satana kwa ya kara “mupangeli gouzuni” ou.—Resa Johanesa 14:30; Ehororo 12:9.

2. Unsitwe waKarunga kapi wa wepe ndi?

Vantu novaengeli Karunga kwa va ungire wokusikilira mo va wapere kulimburukwa nonzira dendi. (Deuteronomium 32:4, 5) Karunga kwa tu sita noumanguruki wokutura po matokoro pokatji kokurugana yoyiwa neyi yoyidona. Umanguruki owo kutupulisira tu likide eharo kwaKarunga.—Resa Jakopo 1:13-15; 1 Johanesa 5:3.

3. Morwasinke ga pulisira Karunga ruhepo?

Kutundilira pena, Jehova kwa sigilira erwaneso lyoupangeli wendi. Morwasinke? Mokulikida asi kwato gokuvhura kupangera yipo vantu va gwanene mo mauwa pwa hana Karunga. (Jeremiya 10:23) Nomvhura 6 000 depangero lyovantu kwa yi likida asi yosili vantu nokuvhura si kulipangera vene. Vapangeli wovantu kwa va sumpira mokugusa po yita noukorokotji nouhahungami nomauvera.—Resa Muudisi 7:29; 8:9; Varoma 9:17.

Mokulisiga, ava ava tambura Karunga ngoMupangeli gwawo kugwanena mo uwa wavene. (Jesaya 48:17, 18) Ntaantani, Jehova nga ka zonagure po mapangero nagenye govantu. Vantu ava ava horowora Karunga a kare mupangeli gwawo yiwo velike ngava ka tunga apa pevhu.—Jesaya 2:3, 4; 11:9; resa Ndaniyera 2:44.

 4. Mpito musinke ali gava elididimikiro lyaKarunga?

Satana kwa tente asi vantu kapi ngava limburukwa Karunga. Elididimikiro lyaKarunga kuna kugava mpito kwanatuvenye tu likide nsene asi twa tambura upangeli waKarunga ndi wovantu. Ose kulikida etokoro lyetu momparukiso zetu.—Resa Joba 1:8-11; Yisewe 27:11.

5. Ngapi natu horowora Karunga ngoMupangeli?

Ose kuhorowora Karunga ngoMupangeli apa atu papara nokurugana ukareli wousili kuliza noNonkango dendi, Bibeli. (Johanesa 4:23) Ose hena kapi atu lihameke moupolikita nomoyita, ngwendi Jesus.—Resa Johanesa 17:14.

Satana kuruganesa nonkondo dendi mokukorangeda yirugana yokunyata. Apa atu nyokere po yirugana yangoso, vamwe wovakaume nekoro lyetu kuvhura kutuswaura nokuturwanesa. (1 Peturusa 4:3, 4) Yipo nye, twa hepa kutura po etokoro. Ngatu likwatakana novantu ava va hara Karunga ndi? Ngatu limburukwa noveta dendi donongwa ndi? Nsene tu yi rugana, ose ngoso kuna kulikida asi Satana munayimpempa apa ga tente asi kwato ogu nga rugana eyi a tanta Karunga.—Resa 1 Vakolinte 6:9, 10; 15:33.

[Efano lyepepenuno 17]

Komauzera gomanzi, tara egaununo 11 mobuke ezi Yinke azi rongo Bibeli sili?, va nduruka Nombangi daJehova.

[Efano lyepepenuno 16]

Adamu kwa tulire po etokoro lyedona

[Efano lyepepenuno 17]

Matokoro getu kulikida nsene asi ose twa hara Karunga ngoMupangeli gwetu