Honena epuro lyawo

“Na pura”

Malita kwa gazarere ntoko zampanzendi, ekombombo eli va zedilire nemanya. Age kwa kere noruguwo rorunene. Kapi ga vhulire kuyipura asi mpanzendi Rasarusa ogu ga here ana fu. Mazuva gane kutunda apa ga fire mpanzendi age kwa monekere ngwendi ana roroka kukara meguwo novagenda.

Ogu ana sikama komeho zaMalita kwa kere mugara ogu ga here unene Rasarusa. Apa ga mwene hena Jesus kwa mu reterere ruguwo rorunene, morwa age kwa kere mugara ogu ga vhulire kuparura mpanzendi. Nye simpe, Malita ga gwene ehengagwido pokukara naJesus ponze zodoropa Betani. Pokukara naJesus karuwogona, kwa mu korangedere morwa nkenda ezi ga mu likidire. Jesus kwa pulire Malita mapuro aga ga mu vaterere a demenene kepuro lyendi kuhamena evhumbuko. Nzogera ozo za twaredesere Malita a uyunge nonkango domulyo unene asi: “Na pura asi nyove Kristusa, MunwaKarunga, ogu va tanta asi nga wiza mouzuni.”—Johanesa 11:27.

Malita kwa kere mukadi gepuro lyenene. Eyi azi tu tantere ko Bibeli kumuhamena kuvhura kutuvatera mokunkondopeka epuro lyetu. Mokuyikwata egano, tu zeni tu tarurure sihorokwa sokuhova kuhamena Malita moBibeli.

“Yinzi ono lipakere sinka”

Makwedi gongandi komeho Razarusa a ka fe, membo lyawo moBetani, awo kwa ndindilire mokutambura mugenda gomulyo po, Jesus Kristusa. Rasarusa naMalita naMariya kwa kere vezimo limwe ava va tungire membo limwe tupu. Kapi twa diva asi vantu ava vatatu va kwere ndi hawe. Awo kwa kere vakaume wovanene vaJesus. Mezuvhiso lyendi moJudeya, omu ga ligwanekerere nomakwamakwamo nomarwaneso, Jesus nga kara nkenye apa membo lyawo. Yosili, age  ga haferere unene nkareso zongwa zombili zemembo lyawo.

Malita kwa rugene unene mokutambura vagenda membo. Age kwa kere muntu goyiviyauka. Nampili pedinguro lyaJesus age kwa kere moyiviyauka. Age kwa wapaikire nondya dokulikarera dononzi domugenda gwendi gokulikarera ntani navamwe ava va zire kumwe nendi. Mosiruwo sina, kutambura vagenda kwa kere sininke somulyo unene. Apa nga wiza mugenda ngava mu tambura nencumito ano yicamakaku yendi ngava yi hutura ko, nompadi dendi ngava di kuhura, nohuki dendi ngava di kwita magadi gedumba lyewa. (Rukasa 7:44-47) Kuhamena mararo nonondya, nayinye ngava yi wapaike.

Malita naMariya kwa kere noyirugana yoyinzi mokupakera mbili mugenda gwawo gomulyo. Mariya, mukadi gonondunge gokuteda, pomuhowo kwa vaterere mukurwendi. Apa ga ya sikire, Jesus ga tamekere kuronga. Kapisi ngwendi vampitisili womaukarelikarunga, Jesus kwa likidire efumadeko kovakadi nokuvaronga kuhamena Uhompa waKarunga, siparatjangwa soyirugana yendi yokuzuvhisa. Makura Mariya ga hagekere kuvatera Malita nokuhingira konompadi daJesus a purakene.

Gazadara ko tupu kosinka esi ga kere naso Malita. Ga hepere kuwapaika nondya dononzi nokurugana yirugana yoyinzi mokupakera mbili vagenda vendi. Moyiviyauka yendi, ga mwene Mariya age ana hingire, kwato eyi ana kurugana. Makura ta vareke kupiyagana nokuhanduka morwa kurugana nayinye eyi pwagelike.

Moruhura, Malita kapi ga vhulire kuyilididimikira. Ta donganesa nzogera zaJesus nokutanta asi: “Hompa, nani nokuyifira si mbili, eyi ana sigi nge ogo mumbyange, ni rugane nyamelike? Mu tantera nye a ya kwafe nge!” (Rukasa 10:40) Makura ta pura Jesus a tantere Mariya a rugane.

Elimbururo lyaJesus lya tetukisire Malita, ntani nava ava resa Bibeli. Age kwa limbwilire nombili asi: “Malita, Malita, yinzi ono lipakere sinka, ove hena ono piyagana. Nye sininke simwe po yiso sohepero. Mariya kuna horowora po age ruha roruwa, oru ngava dira kumugusa.” (Rukasa 10:41, 42) Yisinke ga tembe Jesus? Age ngoso kwa tembe asi Malita kwa gazarere unene yininke yopanyama ndi? Age kwa tere yirugana yendi yokuwapaika nondya donongwa asi kwato mulyo ndi?

Hawe. Jesus ga yi mwene asi elituromo lyaMalita kwa kere lyeharo. Kapi ga lizuvhure asi epuko mokuwapaika nondya dononzi. Morwa ga zire nare ‘kosipito sosinene’ esi ga wapaikire Mateusa. (Rukasa 5:29) Nondya edi ga wapaikire Malita kapi da kere epuko, nye eyi ga tulire muhowo. Morwa kudemenena unene konondya age ga zumbanesere yininke yomulyo po. Yininke musinke oyo?

Jesus, MunwaJehova Karunga gelike thi, kwa zire kembo lyoMalita a ka ronge usili. Kwato eyi ya kere nomulyo kupitakana oyo, kukwatera mo nondya donongwa newapaiko lyeharo. Jesus ga guvire morwa Malita kwa zumbanesere mpito zokulikarera zokunkondopeka epuro lyendi, nye ga mu sigire a tokore mwene eyi ana hara kurugana, nye kapi ga here a tokwere po Mariya.

Yipo nye, Jesus ga vyukisire Malita nombili, pokurugurura kumutumbura kedina nokumuhengagwida asi kapisi a ‘lipakere sinka neyi yoyinzi.’ Nondya dononsesu da gwanenene po morwa pwa kere nare nondya dononzi dopampepo. Yipo nye, kapi ga vhulire kugusa Mariya ‘koruha roruwa’ oru ga horowere rokulirongera ko kwaJesus!

Naina, sihorokwa esi kuna kara nomulyo  unene kovasikuli vaKristusa. Kapisi tu pulisire nkenye eyi yi tu guse ko kokusikisa mo ‘yihepwa yetu yompampepo.’ (Mateusa 5:3, NW) Yimo, twa hepa kuhonena ugavi waMalita nokurugana unene, nye kapisi ‘tu lipakere sinka’ noyininke oyo makura tu zumbanese yomulyo po. Ose kukara kumwe novapuli vakwetu, kapisi nositambo tupu sokugava ndi sokutambura nondya dononzi, nye sokulikwafa-kwafa nokulipaapa mauhwi gopampepo. (Varoma 1:11, 12) Nampili nondya dononunu kuvhura kuninkisa siruwo oso si kare sokutunga.

Mpanzawo kwa fire konyima ta vhumbuka

Malita ga tambwire evyukiso lyaJesus nokulirongera ko ndi? Nhi. Morwa mupositoli Johanesa apa ga tjenge kuhamena evhumbuko lyaRasarusa, kwa tente asi: ‘Jesus kwa here Malita namumbyendi gomukadi naRasarusa.’ (Johanesa 11:5) Kwa pitilire po makwedi gongandi apa Jesus ga ka dingwire Betani ngomu vana yi singonona nare. Eyi kulikida asi Malita kapi ga handukire ndi a kare nonkoko naJesus morwa epukururo lyeharo eli ga mu pere. Age kwa li tambwire nomutjima nagunye. Age kwa tu tulira po sihonena sosiwa sepuro, morwa natuvenye twa hepa mavyukiso.

Apa ga verere mpanzendi, Malita ga litulire mo mokumupakera mbili. Age ga rugene ko paapa ga vhulira mokumuhengagwida nokumuvatera a veruke. Nye simpe Rasarusa uvera kwa mu dekere unene. Nkenye ezuva vampanza vendi ngava kara kumwe nendi va mu pakere mbili. Ee, omu tupu nga tara Malita mpanzendi nokudiworoka omu ngava hafa kumwe nomvhura dononzi!

Apa Malita naMariya va mwene asi kapi tava vhuru kuvatera mpanzawo, makura tava tumine Jesus mbudi. Oku ga zuvhisilire Jesus kwa kere ure worugendo romazuva gavali. Mbudi zawo kwa kere asi: “Hompa, ko tara si, ogu wa hara ta vere.” (Johanesa 11:1, 3) Awo va yi divire asi Jesus kwa here mpanzawo,  ntani va kere nepuro asi age na ya rugana ko yuma mokuvatera kaume kendi. Awo ngoso kwa kere nehuguvaro asi Jesus na ya sika usimbu ndi? Nsene yimo, ehuguvaro lyawo kapi lya tompokere. Rasarusa ga fire.

Malita naMariya kwa lilire mpanzawo nokuwapaika evhumbiko lyendi nokutambura vagenda wovanzi ava va tundire koBetani nokonomukunda dazo. Nye kwato simpe eyi va zuvhire ko kuhamena Jesus. Ngomu sa pitire siruwo, Malita ga kere ngwendi kuna piyagana. Konyima zomazuva gane gonomfa daRasarusa, Malita ta zuvhu asi Jesus ta wiza. Nampili ngomu ga kere meguwo, Malita ga simbagwilire Jesus ga hana kutantera ko Mariya.—Johanesa 11:20.

Apa ga mwene Jesus, Malita ta pwagesa malizuvho aga va kere nago naMariya asi: “Hompa, ngano yipo ko kere, ngano mpanzange kapi ka fire.” Nye, Malita simpe ga kere nehuguvaro. Age ta twikire ko asi: “Nantaantani si na diva asi, nkenye eyi no hundira Karunga, Karunga na yi ku pa.” Makura Jesus ta nkondopeke ehuguvaro lyendi asi: “Mpanzoge na vhumbuka.”—Johanesa 11:21-23.

Malita kwa gazarere asi Jesus kwa tembe kevhumbuko lyokomeho, yipo ga limbwilire asi: “Na yi diva asi, nga vhumbuka pevhumbuko lyezuva lyouhura.” (Johanesa 11:24) Age kwa kere nepuro lyokupama mevhumbuko. Vampitisili vamwe womaukarelikarunga goVajuda, ava ngava tumbura asi Vasadukayi, kwa patanene asi kwato evhumbuko lyovafe, nampili ngomu lya kere erongo lyokuzera lyomoMatjangwa. (Ndaniyera 12:13; Marukusa 12:18) Nye Malita ga yi divire asi Jesus nga rongo ehuguvaro lyevhumbuko ntani ga vhumbwire vamwe. Nye Malita kapi ga divire asi yisinke nayi horoka.

Makura Jesus ta uyunga nonkango domulyo asi: “Nyame evhumbuko nomwenyo.” Jehova Karunga kwa pa Munwendi nonkondo dokuvhumbura vantu navenye komeho. Jesus ta pura Malita asi: “Ono yi pura eyi ndi?” Yipo ga limbwilire nonkango tuna tumbura ketameko lyosirongwa esi. Age ga pulire asi Jesus yige Kristusa ndi Mesiyasa, MunwaJehova Karunga ntani asi mauporofete ga yi pumbire asi nga wiza mouzuni.—Johanesa 5:28, 29; 11:25-27.

Jehova Karunga naMunwendi Jesus Kristusa, va tere epuro lyangoso asi mulyo ndi? Eyi ya horokere kulikida asi yimo. Malita kwa gendererere a ka simbe Mariya. Konyima zoyo, age kwa mwene omu Jesus ga kere neguwo ngomu ga uyungire naMariya nava va va guvisire ko. Ntani hena ga mwene omu Jesus ana kuganda mahodi ngomu ga likidire ruguwo rwendi rorunene oru adi retesa po nomfa. Ga zuvhire apa Jesus ga tente asi va tundise ko emanya kontoko zampazendi.—Johanesa 11:28-39.

Malita ta mu patana nokuuyunga asi kuna kunuka morwa rutu kuna kara mazuva gane, runa woro. Jesus yipo ga mu diworokesere asi: “Amesi na ku tantere asi, nsene o pura, no mona uyerere waKarunga.” Age ga kere nepuro ntani ga mwene uyerere waJehova Karunga. Poopo tupu, Jehova kwa nkondopekere Munwendi mokuvhumbura Rasarusa, makura Jesus ta zigire asi: “Rasarusa, pwaga mo!” Tava zuvhu muhagaro montoko. Rasarusa ta pwaga, age vana mu dingire makehe. Jesus ta pangere asi: “Mu dingununeni a ze.” Noruhafo rorunene Malita naMariya tava lidingilire mpanzawo. (Johanesa 11:40-44) Malita kapi ga kere hena nosinka, ntani kapi ga divarere sihorokwa esi.

Sihorokwa esi kulikida asi evhumbuko lyovafe kapisi egazaro tupu, nye kuna kara erongo eli azi rongo Bibeli ntani ya  horokere nawa-nawa. Jehova naMunwendi kwa hara kufuta ava va kara nepuro, ngomu va yi rugene koMalita naMariya naRasarusa. Nove ngava ku tungika nsene o tunga po epuro lyokupama ngwendi lyaMalita. *

“Malita ta zakura”

Bibeli kwa tumbura hena Malita. Kwa kere ketamekero lyosivike sokuhulilira separu lyaJesus pevhu. Pokudiva asi udigu kuna kumuhedera pepi, Jesus kwa zire hena koBetani oku nga kara-kara. Kutunda opo nga gendi nokilometa ntatu a ze koJerusarema nokutengura hena. Jesus naRasarusa kwa lire membo lyaSimoni, ntani yimo va uyunga nonkango dokuhulilira kuhamena Malita asi: “Malita ta zakura.”—Johanesa 12:2.

Yosili, age kwa kere mukadi gokurugana unene! Apa atu resa sihorokwa sendi moBibeli kulikida asi age murugani gomunene mokupakera mbili yihepwa yovakwawo. Naina, monombungakriste dovasikuli vaKristusa kwa di tungika novakadi ngwendi Malita, awo nkenye apa kutura epuro lyawo pasirugana pokuligava vene. Malita nage ga twikilire kurugana yokulifana. Age ga kere munandunge, morwa komeho ga ya ligwanekerere nomaudigu.

Konyima zomazuva gongandi, Malita kwa lididimikilire nomfa dokukoresa doMurongi gwendi gokuhara, Jesus. Mokugwederera ko, vayilipaki ava va dipagere Jesus kwa tokomenene hena kudipaga Rasarusa morwa evhumbuko lyendi kwa nkondopekere epuro lyovantu wovanzi. (Johanesa 12:9-11) Moruhura, nomfa da ya gawinine elikwatakano eli lya kere pokatji koMalita novanavazina. Kapi twa diva asi ngapi ndi siruwoke ya horokere, nye tuna si huguvara asi: Epuro lyokulikarera lyaMalita lya mu vaterere a lididimikire dogoro kouhura. Eyi yiyo Vakriste vanaina kuvakorangeda mokuhonena epuro lyaMalita.

[Nondanda dokonhi]

[Efano lyepepenuno 28]

Nampili ngomu ga guvire, Malita ga pulisilire Jesus a demenene magano gendi koyirongwa yokunkondopeka epuro

[Efano lyepepenuno 30]

Nampili ngomu ga ‘lipakerere sinka,’ Malita ga linunupikire nokutambura mavyukiso

[Efano lyepepenuno 32]

Malita pokutura epuro mwaJesus ga gwanene mo uwa apa ga mwene mpanzendi vana mu vhumbura