Siruwo sosiwa pepi sina kara!

“Karuwogona tupu ko, mudinikarunga ta dongonoka po. . . . Valinunupiki yiwo ngava hingira sirongo, awo ngava hafera mpora zonene.”—EPISAROME 37:10, 11.

ONO hara kumona omu una kusikilira mo uporofete ou vana tumbura apa ndi? Yosili, ono hara kuumona. Pwa kara nokonda dokupama deyi no yi pulira asi ntaantani u ka sikilire mo.

Moyirongwa yina ka pita twa zogerere mo mauporofete gamwe goBibeli aga aga likida asi ose kuna kuparuka “pomazuva gopouhura.” (2 Timoteusa 3:1-5) Ava ga gendesere Karunga va tjange Bibeli kwa pumbire yihorokwa oyo yipo tu kare nehuguvaro. (Varoma 15:4) Esikiliromo lyomauporofete ogo kutanta asi maudigu aga tuna kuligwanekera nago ngesi ntaantani ngaga hage po.

Yisinke ngayi kwama komazuva gopouhura? Uhompa waKarunga ngau ka pangera vantu navenye. (Mateusa 6:9, 10) Tarurura esingonono lyoBibeli kuhamena ukaro ou ngau ka kara pevhu:

● Kapi ngaku ka kara erumbu. “Ewogo lyoyisima ngano tali kara mosirongo; nondundu ngano tadi zura muzangu.”—Episarome 72:16.

● Kapi ngaku ka kara mahamba. “Nagumwe si gomosirongo esi twa kara nga sivana asi ta vere.”—Jesaya 33:24.

● Evhu ngava ka li wapukurura. “Mburundu ngazi hafa, ano nombya ngadi temuna mowiza.”—Jesaya 35:1.

Aga kuna kara tupu mauporofete gongandi goBibeli aga naga ka sikilira mo ngesi. Pura Nombangi daJehova di ku likide eyi da karera nehuguvaro asi pwa kara meho zongwa.