Uporofete 1. Makankamo gevhu

“Ngaku kara makankamo gomanene gevhu.”—RUKASA 21:11.

● Winnie munona gomakwedi 16, kwa mu parwire apa ga gwire matungo gomoHaiti. Vagavi mbudi wosimpagwa va mu zuvhire omu ana kuhanda. Age ga parukire ekankamo lyevhu, nye vakurona vendi va fire.

YISINKE AGA LIKIDA MAUMBANGI? Ayo kwa yi tente asi vantu wokupitakana po-300 000 kwa fire kekankamo lyenene lyevhu eli lya horokere moHaiti mwaMurongagona 2010. Kugusa ko oyo, vantu wokusika po-1 300 000 kwa zumbanesere mambo gawo. Kapisi moHaiti mwelike mwa horokere ekankamo lyevhu. Kutundilira mwaKudumogona 2009 dogoro Kudumogona 2010, kwa horokere po makankamo gomanene gevhu gokusika po-18 uzuni mudima.

EPATANESO MUSINKE LYA KARA PO? Ose kapi tuna kuligwanekera nomakankamo gevhu gomanzi, nye morwa ukonentu ose kuna kuganongonona kupitakana vantu vanare.

EPATANESO OLYO USILI NDI? Tarurura umbangi ou: Bibeli kapi za tumbura sivaro somakankamo gevhu aga gana kuhoroka pomazuva gopouhura. Nye, azo kutanta asi “makankamo gomanene gevhu” ngaga horoka “pomavega peke-peke,” mokulikida asi ago kuna kara gamwe goyidiviso yoyinene mosiruwo esi.—Marukusa 13:8; Rukasa 21:11.

OVE YISINKE ONO KUGAZARA KO? Ose kuna kumona makankamo gomanene gevhu, ngwendi moomu za yi pumba Bibeli ndi?

Makankamo gevhu kapisi yiwo umbangi welike una kulikida asi ose kuna kuparuka pomazuva gopouhura. Hena, kapisi yiwo welike uporofete una kusikilira mo. Tarurura uporofete wauvali.

[Nonkango depepenuno 4]

“Ose valirongi unsitwe kugatumbura asi makankamo gomanene gevhu. Nye vantu navenye kugatumbura asi yimpagwa.”—KEN HUDNUT, MULIRONGI UNSITWE GOMOAMERIKA.

[Ntundiliro zefano lyepepenuno 4]

© William Daniels/Panos Pictures