Uporofete 6. Sirugana sokuzuvhisira uzuni mudima
Uporofete 6. Sirugana sokuzuvhisira uzuni mudima
“Mbudi zoNgwa ezi zoUntungi waKarunga tanko ngava zi divisa mwa za uzuni mudima.”—MATEUSA 24:14.
● Mukadi gedina Vaiatea kwa tunga posirudigona saFangatau, omu va tunga vantu wokusika po-121 tupu. Aso kuna kara simwe soyirudi 80 yaTuamotu eyi ya kara pokatji kefuta. Nye Vaiatea nava va tunga posirundi oso kwa va dingura Nombangi daJehova. Morwasinke? Morwa Nombangi kwa kara neharo lyokutantera ko vantu navenye mbudi zongwa zoUhompa waKarunga, va kare asi kupi va tunga.
YISINKE AGA LIKIDA MAUMBANGI? Mbudi zoUhompa kwa ka sika komaruha nagenye gomouzuni. Momvhura 2010, Nombangi daJehova kwa rugene novili dokusika po-1 600 000 000 mokudivisa mbudi zongwa moyirongo 236. Eyi kutanta asi nkenye Mbangi kurugana nominute 30 nkenye ezuva mosirugana sokuzuvhisa. Monomvhura murongo dina ka pita, awo kwa nduruka nokugavera yimbapiratjangwa yelirongo lyoBibeli yokupitakana po-20 000- 000 000.
EPATANESO MUSINKE LYA KARA PO? Mbudi zoBibeli kwa zi divisa nomvhura mayovi.
EPATANESO OLYO USILI NDI? Yosili, wovanzi kwa hetekera ko kudivisa kuhamena mbudi zoBibeli. Nye sinzi sawo kwa yi rugana tupu mosiruwo sosinunu nomonomukunda dononsesu. Mokulisiga, Nombangi daJehova kwa va tompoka mokugendesa sirugana sokuzuvhisira uzuni mudima esi va zuvha mafere gomamiliyona govantu. Nombangi kuna kukovekeda mosirugana sawo sokuzuvhisa nampili ngomu dina kuligwanekera nomarwaneso gokutunda kovapangeli nokonombunga donyanya dovantu. * Ntani hena, Nombangi daJehova kapi ava di futu yipo di zuvhise. Nye awo kuruganesa siruwo sawo nokugavera yimbapiratjangwa yawo mawoko-woko. Sirugana sawo kusikwatesa ko yigava yokutundilira komutjima.
OVE YISINKE ONO KUGAZARA KO? ‘Mbudi zongwa zoUntungi’ kuna kuzizuvhisira mouzuni mudima ndi? Esikiliromo lyouporofete ou ngoso kuna kutanta asi komeho ngaku ka horoka yininke yoyiwa ndi?
[Nondanda dokonhi]
^ para. 6 Komauzera gomanzi, tara novidiyo ntatu edi: “Faithful Under Trials,” “Purple Triangles,” ntani “Jehovah’s Witnesses Stand Firm Against Nazi Assault,” edi ava gavere Nombangi daJehova.
[Nonkango depepenuno 9]
“Ngomu ana kuyipulisira Jehova, ose ngatu twikira ngorooro kuzuvhisa mbudi zongwa zoUhompa nomupampi, pokuruganesa nkenye mpito mokutantera ko vantu.”—2010 YEARBOOK ZONOMBANGI DAJEHOVA.
