Wa yi diva ndi?

Maunzoni musinke ga tulire Barabasa?

▪ Mavangeli nagenye gane kwa tumbura Barabasa, mugara ogu ga mangwilire mupangeli goVaroma Pontius Piratusa mevango lyaJesus. Barabasa kwa mu tumbura asi ‘nkwate ezi za zire nzaya’ ntani “munamahaka.” (Mateusa 27:16; Johanesa 18:40) Age kwa kere moRoma modorongo zomoJerusarema ‘novaruretesandjorongani vakwawo, ava va dipagere muntu mondjorongani zawo.’—Marukusa 15:7.

Nampili ngomu pwa dira kukara umbangi weyi ga zonene Barabasa, nye mokumona asi age gumwe gombunga zovaretesindjorongani yiyo ya ninkisa valirongi vamwe va mu tumbure asi gumwe gowo ngava rwanesa epangero mosiruwo sina. Flavius Josephus kwa tjenge asi mbunga ozo ngazi rugana ukorokotji morwa kuhara kuhepurura Vajuda ava ngava hepa mepangero lyaRoma. Urwanesi wokurwanesa epangero lyaRoma kwa twikilire dogoro koyiha yomomazuva govapositoli. Mbunga ozo ngazi rwanesa epangero kwa totere po mbunga zonene zovakwayita woVajuda ava va ya tjidire mo Varoma moJudeya momvhura 66.

Buke zimwe kwa tanta asi: “Barabasa kwa hamenene kombunga zovamahaka. Mbunga ozo kwa zi here vantu momomukunda morwa azo ngazi vaka emona lyoVaisraeli wonongawo nokuretera maudigu epangero lyoVaroma.”—The Anchor Bible Dictionary

Mosiruwo soVaroma, maunzoni musinke aga ngava pamparesa vantu ngwendi moomu va dipagere Jesus?

▪ Varoma ngava tengeke vakorokotji novanzoni novarwanesi pokuvapampara koyitji nokuvasiga va fe. Etengeko olyo kwa li tere ngonkedi zondona zedipago.

Buke zimwe kwa tanta asi: “Kwa va pamparere moyitarameho nositambo sokuvaswaura nokuvakoresa ntani nokutjilisa vantu va dire kurwanesa epangero.” (Palestine in the Time of Jesus) Mutjangi gumwe goVaroma kwa uyungire kombinga zedipago lyovakorokotji asi “ngava horowora nonzira omu ngava gendi vantu wovanzi, yipo va va mone nokukara nowoma.”

Mokuliza nomutjangi gohistoli Josephus, posiruwo apa va kundurukidire Jerusarema momvhura 70, vakwayita vaTitusa va kwete mutjwayuki nokumupampara komeho zekuma lyositata mokutjilisa vantu womoJerusarema va ligave kwawo. Apa va fundire sitata, wovanzi kwa va dipagere monkedi zokulifana.

Edipago lyenene lyangoso eli va tjanga mohistoli kwa horokere kouhura wondjorongani ezi ga pitisilire Spartacus (73-71 K.S.N.), apa vapika novarwani wokusika po-6 000 va va dipagererere konontere donzira zokutunda Capua zi ze koRoma.

[Efano lyepepenuno 14]

“Tu pwagesera Barabasa” Charles Muller, 1878