Varesi tava pura . . .

Yisinke mundiro gwanarunye?

▪ Momavangeli, Jesus kwa rondwere varongwa vendi mpanguro gomomundiro gwanarunye. Yosili, Jesus kwa here va tambure sankondo-nkondo erondoro olyo. Nye age sili kwa tembe kokuhepa momundiro gwanarunye ndi?—Mateusa 5:22.

Nkango “mundiro gwanarunye” kwa zi toroka konkango zoRugereka Gehena kwa liza nonkango zomoRuhebeli geHinomu kutanta asi ‘edamenena lyaHinomu’ ndi asi gevena-Hinomu, kutanta asi “medamenena lyovana vaHinomu.” (Josuwa 15:8; 2 Vahompa 23:10) Naina evango olyo kulitumbura asi Wadi era-Rababi, edamenena lya karera koMbindakanotokero zaJerusarema.

Mosiruwo sovahompa woVajuda, evango olyo ngava ruganene mo yirugana youpagani, kukwatera mo kuzamba vanona momundiro. (2 Histoli 28:1-3; 33:1-6) Muporofete Jeremiya kwa pumbire asi muramba ogo ngagu kara evango omu Vababironi ngava dipagera Vajuda morwa Karunga nga va pangura komaudona gawo. *—Jeremiya 7:30-33; 19:6, 7.

Kuliza naDavid Kimhi, mulirongi goMujuda, (koyiha yomvhura 1160-1235), muramba ogo kwa ya gu tulire evango lyokuzugumina yihando yomositata saJerusarema. Alyo kwa ya kere evango oku ngava hwikire yihando. Nkenye eyi ngava zugumine mo ngayi rungwinine.

Vatoroki wovanzi woBibeli kwa tokora mokutoroka nkango Gehena asi ‘mundiro gwanarunye.’ (Mateusa 5:22) Morwasinke? Morwa awo kwa kwatakanesa mundiro gomomuramba gomoJerusarema kepuliro lyovapagani lyokukapangura vantu wovadona momundiro. Nye, Jesus kapi ga kwatakanesere Gehena komundiro gwanarunye.

Jesus ga yi divire asi egano lyokuhwika vantu kulirwanesa noguhwe vemeguru, Jehova. Apa Karunga ga tumbwire eyi ngava rugana moGehena momazuva gomuporofete Jeremiya, age kwa tente asi: “Momuramba gwaHinomu yimo va tunga sizambero esi ava tumbura asi Tofeti, va zamberere po momundiro vana vawo wovagara nava wovakadi. Ame kapi na yi va pangera eyi asi ava yi rugane nokugazara kapi na yi gazara rumwe.” (Jeremiya 7:31) Ntani hena, egano lyokuhepeka vafe kwa lilimba nosikara saJehova seharo nomarongo gokuzera gomoBibeli asi vafe “kutupu eyi va diva.”—Muudisi 9:5, 10.

Jesus ga ruganesere nkango “gehena” mokufanekesa ezonauko lyanarunye. Yipo nye, nkango ‘gehena,’ ndi ‘mundiro gwanarunye’ kwa kara nontanto zokulifana nonkango ‘ekurudiva lyomundiro’ eli va tumbura mobuke zEhororo. Nadinye kwa fanekesa ezonauko lyanarunye lya hana evhumbuko.—Rukasa 12:4, 5; Ehororo 20:14, 15.

[Nondanda dokonhi]