Kwa hampurukira nge moMoundsville, modoropagona zopopepi nomukuro gwaOhio korwaMuzogo gwaWest Virginia. Ose kwa tu reta vane, ano eparu lyemepata kwa kere lyoruhafo. Vakurona vange ngava rugana unene, ntani kwa hara vantu. Kapi twa kere noyimaliwa yoyinzi, nye nkenye apa ngatu gwana eyi twa hepa. NgoNombangi daJehova, vakurona vange ngava rugana unene mokuturonga nompango doBibeli kutundilira kounona.

Nampili ngoso, apa na kere mudinkantu yipo na tamekere kuncenuna eyi ngava tu rongo. Ame kapi na mwene hepero zokuparuka kuliza nonompango doBibeli. Ame kwa gazarere asi nsene ni kara noumanguruki wokurugana nkenye eyi nina hara yizo zelike nkedi zokugwana ruhafo. Yipo na hagekere kuza komapongo. Mukurwange namumbyange nawo kwa temwinine nkareso zange zourwanesi. Vakurona vetu kwa litulire mo unene mokutuvatera, nye ose kapi twa yi tambwire.

Kapi na dimbwilire nawa-nawa asi umanguruki ou na here kuvhura u twaredese nge konkareso zondona. Ezuva limwe apa na tundire kosure ni ze kembo, mukwetu yipo ga pere nge ekanya. Tani li tambura. Kutundilira ezuva olyo, ame ngani lihameke moyirugana yokunyata. Konyima, na ya ruganesere yikwepangwe noyikorwesa nokuhondera. Nomvhura edi da kweme ko, ame kwa ruganesere yikwepangwe yononkondo dogoro tani ya kara mupika gwayo. Morwa yikwepangwe kwa wekere nge, yipo na tamekere kuyirandesa ni lirerese ko.

Ngomu ngani hetekere ko kuncenuna ezwi lyange lyokomutjima, alyo nkenye apa ngali diworokesa nge asi mparukiso zange ndona. Nampili ngoso, ngani lizuvhu asi na zonagura nare eparu lyange ntani kwato eyi nani vhura kurugana ko. Nampili ngomu ngani kara novantu konopati nokomapongasano govadimbi wonomusika, ame nkenye apa ngani lizuvhu mukuma nokudompa mutjima. Mwaza siruwo, ngani gazara yikara yoyiwa yovakurona vange ntani nomu na dilire kulikwatakana nawo.

Nampili ngomu na gazarere asi kapi ngani vhura kurunduruka, nye wopeke va twikilire kuvatera nge. Momvhura 2000, vakurona vange kwa zigidire nge kosigongi somazuva gatatu soNombangi daJehova. Nampili ngomu na dilire kuhara kuza nye na zire. Mukurwange namumbyange nawo kwa zire kosigongi.

Sigongi kwa si ruganene kevango eli na ya kere sikando simwe ni ya purakene kovadimbi wonomusika. Malisigo aga na mwene kwa kundamene nge unene. Pepongasano olyo lyovadimbi, evango olyo kwa nyete ntani kwa zulire ko wokukoka makanya. Sinzi sava va kere ko kwa kere wonyanya, ano nomusika kwa kere donondona. Nye posigongi, ame kwa kere novantu woruhafo ava va tambwire nge nawa, nampili ngomu ngani dili kuponga nawo ure wonomvhura dongandi. Evango olyo kwa kere lyokuzera, ano mbudi kwa kere zehuguvaro lyokomeho. Usili woBibeli kwa kundamene nge, kwa ninkisire nge ni lipure eyi na dilire kuutambura muhowo!—Jesaya 48:17, 18.

Apa sa pwire sigongi yipo na tokwere kutengura kombungakriste. Mukurwange namumbyange nawo kwa va kundamene eyi va mwene kosigongi yipo va tokwere kutengura kombungakriste. Moutatu wetu twa tambwire elirongo lyoBibeli.

Velise zomoBibeli ezi za kundamene nge unene zaJakopo 4:8, ezi azi tanta asi: “Hedeni Karunga pepi, nage a mu hede pepi.” Na yi dimbwilire asi nsene nina hara kuhedera Karunga pepi, na hepa kuzeresa eparu lyange. Gamwe gomarunduruko aga na hepere kutura po, kuhageka kukoka makanya nokuhageka kuruganesa yikwepangwe noyikorwesa.—2 Vakolinte 7:1.

Na hagekere kukara novakaume vange vanare nokupinganesera po vakaume wokukarera Jehova. Mukuronambunga ogu ga rongere nge Bibeli kwa vaterere nge unene. Age nga toonene nge nkenye apa ngodi nokuyadingura nge. Dogoro ngesi, age kuna kara kaume kange gomunene.

Momvhura 2001, yipo na ligeve kwaKarunga kupitira mekuho, mukurwange namumbyange nawo kwa ligeve. Gazadara tupu ruhafo oru va kere naro vakurona vange novanavazinyetu apa epata lyetu lya lipakererere mokukarera Jehova.

Ame ngani gazara asi nompango doBibeli ngadi silike umanguruki wange, nye ngesi ame kudimona asi kupopera nge. Bibeli kwa nkondopeka nge ni hageke kuruganesa nokurandesa yikwepangwe nokuyakara muntu gomuwa.

Ngesi nina kara nomfumwa zokukara ruha rovanavazinyetu mouzuni mudima wokukarera Jehova. Vantu ava kwa lihara-hara, ntani kwa kara mouumwe wokukarera Karunga. (Johanesa 13:34, 35) Mokatji kovanavazinyetu owo ame na gwana mo mukadange Adrianne, ogu na hara unene. Ayo kuturetera ruhafo mokukarera kumwe Musiti gwetu.

Mevango lyokukondjera yitambo yopanyama, ame ngesi muzuvhisi gosiruwo nasinye gokuronga vantu omu nawo nava gwanena mo uwa moNonkango daKarunga. Sirugana esi kwa retera nge ruhafo rorunene. Ame kuuyunga nomukumo asi Bibeli za rundurura eparu lyange. Ngesi nina gwana umanguruki wousili.