Vamwe kwa pumbire asi uzuni ngau haga 21 Sindimba 2012. Vantu vamwe kundindira uhura wouzuni noruhafo ano vamwe noutjirwe. Uzuni kapi wa hege ezuva olyo, nye sili ngau haga po ndi?

Ngapi kuhamena ‘uhura wouzuni’ ou va singonona moBibeli? (Mateusa 24:3) Vamwe kuna kutjira asi evhu ngali pya komundiro. Vamwe kuna kundindira nononkondo mokumona eyi ngayi horoka pouhura wouzuni. Wovanzi kapi va yi pura asi uzuni ngau haga.

Nayi ka ku tetukisa kweyi azi tanta Bibeli kuhamena uhura wouzuni. Bibeli za faturura eyi natu ndindilira uhura wouzuni noruhafo neyi vantu vamwe ava gazarere asi uhura kapi ngau wiza. Kuna kukuhundira o konakone malimbururo gomoBibeli komapuro gamwe kuhamena uhura wouzuni.

ELIMBURURO LYOMOBIBELI: “[Karunga] kwa paka po uzuni, yiyo wa kora, awo kapi ngava u rundurura.”—EPISAROME 104:5.

Evhu kapi ngava li zonagura po ndi ngali pye komundiro. Bibeli kuronga asi evhu kuna kara embo lyanarunye lyovantu. Episarome 37:29 kutanta asi: “Muhungami nga gusa sirongo nga tunge mo narunye-narunye.”—Episarome 115:16; Jesaya 45:18.

Apa ga mene kusita evhu, Karunga kwa ‘mu zire komutjima,’ ntani yimo simpe ana kulizuvha ngorooro. (Genesis 1:31) Age kwa tumbwidira asi ta ka ‘zonagura ava wokuzonagura evhu,’ nokulipopera.—Ehororo 11:18.

Nampo kuvhura o lipure kuhamena 2 Peturusa 3:7. Velise ozo kutanta asi: “Eguru eli lyantaantani nevhu eli lyantaantani nayo kwa yi ndindilisa Ezuva lyompanguro. Makura ngayi pye komundiro.” Ngoso velise ezi kulikida asi evhu ngali pya komundiro ndi? Hawe, Bibeli poyiruwo yimwe kuruganesa nonkango edi “eguru,” “evhu,” ntani “mundiro” pasifanekeso. Pasihonena, Deuteronomium 32:1 kutanta asi: “Evhu neguru, zuvha nonkango dange, purakena nawa-nawa eyi nina kutanta.” Apa kwa ruganesa “evhu” mokutamba kovantu.

Eguru nevhu nomundiro va tumbura mwa-2 Peturusa 3:7 kuna kara pasifanekeso. Velise 5 nezi 6 kwa tumbura eguru nevhu lyomomazuva gaNowa. Ruhanzo kwa zonagwire uzuni wina wanare nye evhu lyetu kapi lya dongonoka po. Ruhanzo kwa zonagwire po vadinikarunga navenye, ndi “evhu” lyopasifanekeso. Ntani hena ezonauko lyeguru kwa tamba kovapangeli vawo. (Genesis 6:11) Mokulifana, 2 Peturusa 3:7 kwa pumbire ezonauko lyanarunye ngomundiro guna kuhwika vadinikarunga navenye nomapangero gomadona.

ELIMBURURO LYOMOBIBELI: “Uzuni ngau zonauka po kumwe nomadowo gawo nagenye, nye ogu a sikisa mo mpango zaKarunga, nga kara dogoro narunye.”—1 JOHANESA 2:17.

“Uzuni” ou ngau zonauka po kapisi evhu, nye vantu navenye ava ava dili kuparuka kuliza nompango zaKarunga.  Ngwendi moomu ndokotora a hende ko ndi a guse ko nyama zina woro komuntu yipo a paruke, Karunga nage nga ka gusa po ndi nga ka “mana po” vadinikarunga yipo vantu wovawa ngava ka hafere eparu. (Episarome 37:9) Monkedi zangoso, ‘uhura wouzuni’ kuna kara sininke sosiwa.

Nsene asi vadinikarunga tupu ngava zonagura po, eyi kutanta asi ngapa kara vantu ava ngava ka paruka mouzuni woupe. Bibeli kwa rugurura kutumbura ‘uzuni wokomeho.’—Rukasa 18:3.

Jesus kwa tumbwire siruwo oso asi ‘esitururo lyouzuni.’ Posiruwo oso, age nga ka tengwidira po sitambo saKarunga sopomuhowo kovantu. (Mateusa 19:28) Makura ngatu ka hafera

• Paradisa nompora nombili.—Jesaya 35:1; Mika 4:4.

• Yirugana eyi ngayi ka tu retera ruhafo. —Jesaya 65:21-23.

• Everuro lyomauvera nagenye.—Jesaya 33:24.

• Marutu getu aga ngaga ka tengwira koudinkantu.—Joba 33:25.

• Evhumbuko lyovafe.—Johanesa 5:28, 29.

Nsene tu sikisa mo “mpango zaKarunga,” kapi ngatu tjira uhura wouzuni. Nye ngatu u ndindira noruhafo.

ELIMBURURO LYOMOBIBELI: “Nsene tomu yi mono tayi horoka, diveni asi Untungi waKarunga pepi nye una kara.”—RUKASA 21:31.

Profesora Richard Kyle kwa tjenge asi “nonkareso donondona dina kuhoroka mouzuni kuninkisa vantu va kare nosinka kuhamena uhura wouzuni,” unene po apa ava dili kukwata egano eyi yininke oyo ayi horokere.—The Last Days Are Here Again

Vaporofete woBibeli kapi va tokwere kutjanga kuhamena uhura pokufaturura eyi yininke yoyidona ya horokerere mosiruwo sawo. Nye, awo Karunga ga va gendesere va singonone nkareso ezi ngazi likida asi uhura wouzuni pepi. Konakona mauporofete ogo gamwe ntani tara nsene asi ago kuna kusikilira mo mosiruwo setu.

•   Yita nerumbu nomakankamo gevhu nehamba lyomukagu.—Mateusa 24:7; Rukasa 21:11.

• Kuvhuka koudona.—Mateusa 24:12.

• Wokuzonagura evhu.—Ehororo 11:18.

• Vantu ngava lihara tupu vene, ngava dowokera yimaliwa, ngava hara mahafo goparutu kupitakana omu va hara Karunga.—2 Timoteusa 3:2, 4.

• Kuna kuteza po mapata.—2 Timoteusa 3:2, 3.

• Vantu kapi vana kupakera mbili yidiviso youhura wouzuni.—Mateusa 24:37-39.

• Kudivisa mbudi zongwa zoUntungi waKarunga uzuni mudima.—Mateusa 24:14.

Ngomu ga yi tente Jesus asi apa ngomu mona “yininke eyi” diveni asi uhura pepi una kara. (Mateusa 24:33) Nombangi daJehova kwa pura asi umbangi kuna kuumonenena, ntani awo kutantera ko epuro lyawo wopeke pokuzuvhisira moyirongo yokupitakana 236.

ELIMBURURO LYOMOBIBELI: “Nsene ngava tanta asi: ‘Nayinye mompora, kutupu upyakadi,’ yipo ngali va gwanena ezonauko poopo, moomu tupu au gwana mukadi udigu pehampuruko. Nokusi ngava hendukira.”—1 VATESARONIKA 5:3.

Bibeli kwa hetakanesa ezonauko lyouzuni koudigu ou au gwana mukadi pehampuruko. Siruwo sokutwaredesa kouhura kuna kara ngwendi siruwo sezimo, morwa zinya ogu ana kundindira mukeke kuvangarara koyidiviso yosiruwo sehampuruko. Ndokotora gwendi kuvhura a ngungunyikire ezuva lyehampuruko; nampili siruwo si liwore, zinya kukara nehuguvaro asi ntaantani a hampuruke mukeke. Mokulifana, nkenye mandindiro gepuko kuhamena uhura kapi ngaga rundurura yihorokwa eyi yina kulikida ‘mazuva gopouhura.’—2 Timoteusa 3:1.

Kuvhura o lipure asi: ‘Nsene sidiviso souhura wouzuni kuna kusimonenena, morwasinke sinzi sovantu vana kudira kusinongonona?’ Bibeli kulikida asi apa ngau kara uhura pepi, wovanzi ngava ncenuna sidiviso. Mevango lyokunongonona marunduruko gopomazuva gopouhura, awo kuzora asi:  “Ozinyakurwetu va fa nare, nye nayinye ha ya kerera moomu ya kere pesito lyouzuni.” (2 Peturusa 3:3, 4) Ntani hena, sidiviso sopomazuva gopouhura kuna kumoneka, nye sinzi sovantu kusincenuna.—Mateusa 24:38, 39.

Sirongwa esi kwa tumbura ko tupu maumbangi gamwe gomoBibeli aga aga likida asi uhura pepi. * Ono hara kulironga ko yoyinzi ndi? Nsene yimo, pura Nombangi daJehova va ya lironge nove Bibeli pwa hana mfuto. Elirongo lyoBibeli kuvhura kuliruganena membo lyoge ndi kevango oku ono hara ndi kupitira kotelefona. Eyi vana hepa ko koge kuna kara siruwo soge, ano ngo gwanena mo mauwa gomanzi.