Ono hara kudiva usili kuhamena Karunga asi yige yilye neyi ga hara neyi ga nyenga ntani mpango zendi ndi? MoNonkango dendi Bibeli, Jehova Karunga kwa horora usili naunye kumuhamena. Nye kapisi nkenye gumwe kuvhura a rese Bibeli nokuzikwata egano. Morwasinke? Morwa kukwata egano usili kuhamena Karunga kuna kara uhwi. Tu tareni eyi ga uyungire ko Jesus.—Resa Mateusa 11:25.

Komeho tupu zokuuyunga nonkango odo, Jesus kwa nyokerere po vantu wokudira kulimburukwa womoyitata yitatu yoVagalireya oku ga ruganenene yitetu. (Mateusa 11:20-24) Kuvhura o lipure asi: ‘Ngapi muntu na mona yitetu yaJesus nye a dire kutambura usili ou ga rongere Jesus?’ Vantu vena kwa kere vahalimburukwi morwa nomutjima dawo dononkukutu.—Mateusa 13:10-15.

Jesus ga yi divire asi mokukwata egano usili kuhamena Karunga twa hepa yininke yivali: Evatero lyaKarunga ntani mutjima gomuwa. Jesus kwa fatwilire asi: “Nyove nina kupanda, Tate, HOMPA geguru nevhu, yeeyi wa horeka yininke eyi vakonentu novanandunge, yiyo wa yi horwera vantuuntu tupu.” Ono dimburura nye eyi kukwata egano usili kuhamena Karunga ya karera uhwi? Jehova “HOMPA geguru nevhu” ga kara nononkondo dokutokora ogu na horekera nokuhorwera usili. Nye Karunga kapi ga kara nompongo, nkenye gumwe ga kara nompito zokudiva usili kumuhamena. Vantu musinke a horwere usili nava a dili kuhorwera usili?

Jehova kwa hara vantu wokulinunupika. (Jakopo 4:6) Age kuhoreka usili ‘kovanongo novanandunge’ womouzuni ou ava ava linenepeke nokulihuguvara vene ntani nokulizuvha asi kapi va hepa evatero. (1 Vakolinte 1:19-21) Nye age kuhorora usili ‘kovantuuntu tupu’ ava ava likida elituromo nelinunupiko ngwendi vanona. (Mateusa 18:1-4; 1 Vakolinte 1:26-28) Jesus, MunwaKarunga, ga divire vantu wokulinenepeka nava wokulinunupika. Vampitisili womaukarelikarunga wokulinenepeka kapi va kwete egano mbudi zaJesus nye vakwati wonomfi wokulinunupika va zi kwete egano. (Mateusa 4:18-22; 23:1-5; Yirugana 4:13) Nye vantu vamwe wonongawo ntani wokulironga ava va likidire elinunupiko lyosili kwa ya kere vasikuli vaJesus.—Rukasa 19:1, 2, 8; Yirugana 22:1-3.

Tatu tengura kepuro lyomuhowo: Ono hara kudiva usili kuhamena Karunga ndi? Nsene yimo, ayo nayi ku vatera pokudiva asi Karunga kapi ga hara owo ava litara vene asi awo nondunge kuliza nomutaro gouzuni. Nye, age kwa hara owo au tara uzuni asi vagova. Nsene o lironga Nonkango daKarunga nositambo souhunga nomutjima gwelinunupiko, nove kuvhura ngo kare gumwe gowo ga pa Jehova uhwi womulyo, wokukwata egano usili kumuhamena. Kukwata egano usili owo ngayi gwederera koruhafo rweparu lyoge ngesi nokukutwaredesa ‘komwenyo gwanarunye gosili’ mouzuni woupe wouhungami. *—1 Timoteusa 6:12, 19; 2 Peturusa 3:13.