Nomfa kwa kara nononkondo kupitakana Karunga ndi? Hawe! “Karunga Munankondo nadinye” kwa kara nononkondo kupitakana nomfa ndi nkenye “nkore.” (1 Vakolinte 15:26; Exodus 6:3) Karunga ga kara nononkondo dokugusa po nomfa kupitira mevhumbuko, ntani ga tumbwidira mokuyirugana oyo mouzuni woupe. * Ngapi omu tuna yi diva asi ngali ka sikilira mo etumbwidiro olyo? MunwaKarunga, Jesus, kwa uyunga nonkango edi adi tu pe ehuguvaro.—Resa Mateusa 22:31, 32.

Apa ga uyungisire Vasadukayi, ava va dilire kupura mevhumbuko, Jesus kwa tente asi: “Yokuhamena evhumbuko, nani kapi mwa yi resa, omu ga mu tantera Karunga asi, ‘Ame nyame Karunga gwaAbirahamu nogu gwaIsaka nogu gwaJakopo.’ Nye age kapisi Karunga govafe, nye Karunga govanamwenyo.” Jesus apa kwa tembe konzogera ezi ga kere nazo Karunga kumwe naMosesa posinhwa somundiro koyiha 1514 komeho zokuwiza Kristusa. (Exodus 3:1-6) Kuliza neyi ga uyungire Jesus, nonkango daJehova edi ga tanterere Mosesa asi: ‘Ame nyame Karunga gwaAbirahamu naKarunga gwaIsaka naKarunga gwaJakopo,’ kulikida asi etumbwidiro lyevhumbuko yosili ngali ka sikilira mo. Ngapi omu tuna yi diva asi etumbwidiro olyo usili?

Konakona sihorokwa esi. Posiruwo apa Jehova ga uyungisire Mosesa, Abirahamu naIsaka naJakopo awo nare va fa. Apo kwa pitire po nomvhura 329 kutunda ponomfa daAbirahamu ntani nomvhura 224 kutunda ponomfa daIsaka ntani nomvhura 197 kutunda ponomfa daJakopo. Jehova kwa tente asi “Ame nyame” Karunga gwawo, nye kapisi “Ame kwa kere” Karunga gwawo. Morwasinke Jehova ga uyungire kuhamena vagara owo ngwendi simpe vazuni?

Jesus kwa fatwilire asi: ‘Jehova kapisi Karunga govafe, nye Karunga govanamwenyo.’ Gazadara ko kuhamena eyi da tamba nonkango odo. Ngano kwato ehuguvaro lyevhumbuko, Abirahamu naIsaka ntani naJakopo ngano kapi ngava va vhumbura. Nsene ngano yimo ya kere ngoso, Jehova ngano ga kara Karunga govafe. Ano eyi kuvhura yi tante asi nomfa kwa kara nononkondo kupitakana Jehova, ntani asi kapi ga kara nononkondo dokuvhumbura vakareli vendi wovalimburukwi.

Yisinke natu vhura kuuyunga ko kuhamena Abirahamu naIsaka naJakopo novakareli vaJehova navenye wovalimburukwi ava va fa? Jesus kwa uyungire nonkango edi dokupama asi: “Navenye yige va kerera po nomwenyo.” (Rukasa 20:38) Yosili, sitambo saJehova sokukavhumbura vakareli vendi wovalimburukwi ava va fa ngasi ka sikilira mo morwa age kuvatara ngovanamwenyo. (Varoma 4:16, 17) Jehova nga diworoka vakareli vendi navenye ava va fa dogoro posiruwo apa nga ka va vhumbura.

Nove kuna kukuhafesa ehuguvaro lyokukamona hena vahali woge ndi? Nsene yimo, diworoka asi Jehova ga kara nononkondo kupitakana nomfa. Kwato yokuvhura kumukondera mokusikisa mo etumbwidiro lyendi lyokukavhumbura ava va fa. Kuvhura o lironge yoyinzi kuhamena etumbwidiro lyevhumbuko naKarunga ogu nga sikisa mo etumbwidiro olyo. Yosili, pokurugana ngoso ngo hedera pepi naJehova, “Karunga govanamwenyo.”