Elinunupiko kutanta asi kudira kulinenepeka ndi kulitumba. Muntu gelinunupiko kapi a litara asi age mulyo kupitakana wopeke. Ntani hena age kudiworoka asi kapi ga sikilira mo nokudimburura upirankondo wendi.

Mosesa kapi ga linenepekere apa va mu pere nonkondo dokupitisira. Narunye apa muntu ava mu pe nonkondo age kuyilikida nsene asi ga linunupika ndi ga linenepeka. Mutjangi Robert G. Ingersoll kwa tente asi: “Vantu wovanzi kuvhura kulididimikira maudigu. Nye nsene ono hara kudiva muntu asi age muntu musinke, mu pa nonkondo dokupangera.” Nye Mosesa ga tulire po sihonena sosiwa selinunupiko. Monkedi musinke?

Mosesa kwa mu pere nonkondo dononene, morwa Jehova kwa mu pangerere a pitisire Vaisraeli. Nampili ngoso, nonkondo odo kapi da mu ninkisire a linenepeke. Pasihonena, koneka nkedi zongwa omu ga kohwenene po udigu wokuhamena upingwa. (Numeri 27:1-11) Eli kwa kere etokoro lyenene morwa kapi tupu lya kundamene vakadi vena nye hena noruvharo rwawo rokomeho.

Yisinke ga rugene ko Mosesa? Morwa age mupitisili goVaisraeli, ga lizuvhire nye asi ana wapere kutura po etokoro koyuma oyo ndi? Age ga huguvarere monondunge damwene ndi mediwo eli ga kere nalyo kuhamena Jehova ndi?

Muntu gokulinenepeka ngano ga yi rugene oyo. Nye Mosesa kapi ga yi rugene. Bibeli kututantera asi: “Mosesa ta twara nonkango dawo kwaHOMPA.” (Numeri 27:5) Gazadara ko tupu! Nampili konyima zonomvhura 40 dokupitisira muhoko goVaisraeli, Mosesa kapi ga lihuguvarere mwene nye mwaJehova. Ayo ya lilikida nawa-nawa asi Mosesa mugara gelinunupiko.

Mosesa kapi ga lizuvhire asi yige gelike gokuvhura kukara nononkondo dokupitisira. Age kwa hefe apa Jehova ga horowere Vaisraeli vamwe va kare vaporofete. (Numeri 11:24-29) Apa tamweyi zendi ga mu pere egano asi a gave ko yitumbukira yimwe kwava wopeke, nelinunupiko Mosesa ga tambwire egano olyo. (Exodus 18:13-24) Komeho a ka fe, Mosesa ga pulire Jehova a horowore ko gumwe ogu na pitisira Vaisraeli. Apa Jehova ga horowere Josuwa, Mosesa ga mu kwatesere ko nomutjima nagunye pokutantera vantu va kwame epitisiro lyaJosuwa mokuvatwara moSirongo sEtumbwidiro. (Numeri 27:15-18; Deuteronomium 31:3-6; 34:7) Mosesa kwa yi tere asi ayo mfumwa mokupitisira Vaisraeli moukareli. Nye kapi ga lizerwire pokutara wopeke asi kwato mulyo.

Kapi tuna hara tu linenepeke morwa situmbukira ndi nonkondo ndi morwa udivi ou twa kara nawo. Diworoka asi: Mokurugana sirugana saJehova monkedi zongwa, elinunupiko lyetu mulyo unene kupitakana udivi wetu. (1 Samwere 15:17) Nsene tu linunupika, ose ngatu kondjera kutura pasirugana mavyukiso gomawa gomoBibeli aga asi: “Huguvara HOMPA nomutjima goge nagunye. Wa ha hama konondunge danyamoge.”—Yisewe 3:5, 6.

Sihonena saMosesa kuturonga hena mokudira kudemenena unene kositumbukira ndi kononkondo detu.

Ose kugwanena mo uwa mokutemwinina sihonena saMosesa selinunupiko ndi? Nhi, morwa apa atu tungu po elinunupiko, ose kukara nelikwatakano lyewa novantu ava twa kara nawo ntani ngava tu hara. Yomulyo po yokutuhara Jehova Karunga ogu a likida elinunupiko pokuzerura vantu vendi. (Episarome 18:35) “Karunga kwa nyenga valinenepeki, nye valinunupiki age kuvafira nkenda.” (1 Peturusa 5:5) Ee, uwa musi wokuhonena elinunupiko lyaMosesa!