Ngomu va zi ruganesa moBibeli, nkango “epuro” kuna kara ehuguvaro lyokupama va tatekera koumbangi. Muntu ogu ga kara nepuro mwaKarunga kwa kara nehuguvaro asi age nga sikisa mo matumbwidiro gendi nagenye.

Mosesa kwa tulire po matokoro aga ga likidire asi age ga pulire momatumbwidiro gaKarunga. (Genesis 22:15-18) Age kwa gwene mpito zokuparuka eparu lyewa moEgipite, nye “age kwa horowere po yokumuhepeka kumwe nomuhoko gwaKarunga, kupitakana yokuhafera karuwogona mononzo.” (Vahebeli 11:25) Olyo kwa kere etokoro lyepuko eli ga ya liverere konyima ndi? Hawe, morwa Bibeli kwa tanta asi Mosesa kwa kere “nouradi ngwendi gogu ana kutara Karunga ogu ga ha moneka.” (Vahebeli 11:27) Mosesa kapi ga liverere komatokoro gendi aga ga tulire po kupitira mepuro.

Mosesa kwa nkondopekere epuro lyava wopeke. Pasihonena, koneka eyi ya horokere apa Vaisraeli va monekere ngwendi vana va konderekeda vakwayita vaFarawo pEfuta lyEgeha. Morwa kwa va tjilisire eyi va mwene, Vaisraeli yipo va kugire kwaJehova naMosesa. Yisinke ga uyungire ko Mosesa?

Nampili ngomu Mosesa ga dilire kudiva asi Karunga ta tepana Efuta lyEgeha yipo Vaisraeli va tavakane mo, nye age ga kere nehuguvaro asi Karunga na rugana ko yuma mokupopera vantu vendi. Ntani kwa here Vaisraeli vakwawo va kare nepuro lyokulifana. Tatu resa asi: “Mosesa ta tantere mbunga asi: ‘Neisi nomu tjilira, lididimikeni tupu, mu tare ezoworo lyaKarunga eli na mu ruganena naina.’” (Exodus 14:13) Mosesa ya mu tompokere mokunkondopeka epuro lyaVaisraeli vakwawo ndi? Nhi, morwa Bibeli kwa uyunga kuhamena Vaisraeli navenye asi: “Epuro yilyo lya pitisire Vaisraeli mEfuta lyEgeha ngwendi pevhu lyekukutu.” (Vahebeli 11:29) Epuro lyaMosesa kapi tupu lya mu reterere uwa gelike nye nava va lirongerere ko kepuro lyendi.

Ose kuvhura kuhonena Mosesa nokutura po matokoro aga aga likida asi twa pura momatumbwidiro gaKarunga. Pasihonena, Karunga kwa tumbwidira mokupakera mbili yihepwa yetu yopanyama nsene tu tura muhowo Uhompa meparu lyetu. (Mateusa 6:33) Yosili, ayo kuvhura yi tu digopere mokunyokera po kutura yininke yopanyama muhowo, morwa yiyo vana kurugana wovanzi naina. Nye kuvhura tu kare nehuguvaro asi apa atu kondjo mokurerupika eparu lyetu nokudemenena koukareli wetu, Jehova nga tu pa nayinye eyi twa hepa. Age kwa tumbwidira asi: “Ame kapi ngani ku zumba ndi ni ku sige.”—Vahebeli 13:5.

Nose twa hepa kukondja mokuvatera wopeke va kure mepuro. Pasihonena, vakurona wonondunge kudimburura situmbukira sawo sosinene esi va kara naso sokuvatera vana vawo va kure mepuro. Ngomu vana kukura, vakurona va hepa kuronga vana vawo kutundilira kounona asi pwa kara Karunga ogu atu rongo yipo tu dive yoyiwa neyi yoyidona. Ntani hena, va hepa kudivilisa asi vana vawo kuna kuyikwata egano asi kukwama nompango daKarunga yizo nkedi zongwa po meparu. (Jesaya 48:17, 18) Vakurona kupa vana vawo uhwi womulyo apa ava va vatere va kare nepuro asi “Karunga kweli, age hena asi yige a futu ava ava mu papara.”—Vahebeli 11:6.