To diworoka ezuva eli wa hampurukire munoge? Wa ndindilire nononkondo o mu kwaterere. Nye vakondi vamwe, ngwendi Carlo naMia, kukara nosinka pokudiva asi munwawo kuna kuvera ndi sirema.

Wa kara nomunona gosirema ndi? Kuvhura o kare nosinka asi kapi tayi ku tompoka kumurera. Wa ha fa unye. Koveli vakurona ava va kara noudigu ngwendi woge ava ya tompoka. Konakona maudigu gatatu aga nampo ono kuligwanekera nago ntani omu Bibeli nazi vhura kukuvatera.

Vakondi wovanzi kulizuvha kukora komutjima nsene munwawo ta vere. Juliana, zinya gomoMeksiko, kwa tanta asi: “Kapi na yi pulire apa vandokotora va tanterere nge asi munwetu ana kara nourema. Ame kwa tukukire unene.” Vakondi vamwe  kulizuvha ngwendi Villana, zinya gomoItalia, ogu ga tanta asi: “Nampili ngomu na divire asi pwa kara yiponga komukadi gonomvhura dange a rete, nye na tokwere kureta. Ngesi kuna kulizuvha unzoni, morwa munwange ga dampaya.”

Nsene kuna kulizuvha unzoni ndi kukora komutjima, diworoka asi yimo ya kara ngorooro. Kapi sa kere sitambo saKarunga asi vantu va vere. (Genesis 1:27, 28) Age kapi ga sita vakondi va rete vana woyirema. Kapi ya kara epuko kovakondi va guve nsene munwawo ta vere. Ayo kugusa siruwo kutambura ukaro wangoso.

Ngapi nsene to lipe usima kouvera wamunoge? Diworoka asi kwato ogu a kwata nawa egano omu nkarapamwe ndi maukaro gamwe aga kundama ukanguki womunona. Poyiruwo yimwe, kuvhura o pe usima mulikwali goge. Wa ha mu pa usima. Ayo ya wapa nsene o ruganena kumwe nomulikwali goge mu rere munweni.—Muudisi 4:9, 10.

EGANO: Lironga uvera wamunoge. Bibeli kutanta asi: “Mambo kugadikisa ketateko lyounongo nonondunge.”—Yisewe 24:3.

Kuvhura o lironge yoyinzi kovandokotora nomoyimbapiratjangwa youhaku. Kulironga uvera wamunoge kwa fana ngwendi kuna kulironga eraka lyepe. Pomuhowo udigu, nye konyima kuvhura o ya li dive.

Carlo naMia ava tuna tumbura ketameko, kwa gwene magano kwandokotora ntani kombunga ezi azi vatere vantu ava va dampaya. Awo kwa tanta asi: “Ayo kapi tupu ya tu vaterere tu kwate egano maudigu aga twa hepa kundindira nye hena twa lirongere eyi na vhura kurugana muntu gokudampaya. Ose twa lirongere asi munwetu kuvhura nage a paruke ngwendi vantu navenye. Oyo kwa tu korangedere sili.”

Kuvhura o lizuvhe eroroko morwa kurera munona gokuvera. Jenney, zinya gomoNew Zealand, kwa tanta asi: “Nomvhura dongandi konyima apa munwange va mu kwatekere urema, nkenye apa ngani rugana unene membo ngani lizuvhu eroroko makura tani tameke kulira.”

Pamwe kuvhura o lizuvhe asi kwato ogu no tantera udigu woge. Ben ga kara nomunwa gosirema. Age kwa tanta asi: “Sinzi sovantu kapi tava kwata egano eyi atu piti meparu.” Pamwe to lizuvhu asi ono hara kuuyunga nagumwe. Nye sinzi sovakaume woge vana vawo vakanguki. Makura tayi ku digopere kuvatantera maudigu goge.

EGANO: Hundira evatero. Wa hepa kutambura nsene gumwe ana hara kukuvatera. Juliana, ogu tuna tumbura nare, kwa tanta asi: “Poyiruwo yimwe name namugara gwange kulizuvha nomuga kuhundira evatero.” Age ga tente hena asi: “Twa lironga asi twa hepa evatero lyovakwetu. Apa vakwetetu ava tu vatere, kapi atu lizuvhu asi nyoselike tuna kara.” Nsene kaume ndi gemepata ana hara kuhingira namunoge pepongasano ndi komapongo gomombungakriste, wa hepa kutambura evatero olyo. Bibeli kutanta asi: “Vantu namukwawo kulihara. Ano vantu namumbyendi wovagara nani kapisi kwa karera po, va likwafe moudigu?”—Yisewe 17:17.

Pakera mbili ukanguki woge. Ngwendi moomu amburansa za hepa maholi nkenye apa yipo zi tware vaveli kosipangero, nove wa hepa nondya donongwa nokuliyomberesa parutu nokurara nompofu dokugwanena po yipo o kare nononkondo dokuvhura kutwikira kurera nawa munoge. Javier, ogu ga kara nomuna gosirema, kwa tanta asi: “Munwange kapi a gendi, yipo nye ani hetekere ko kulya nawa, yipo ni vhure kumuvatera.”

Ngapi no gwana siruwo yipo o pakere mbili ukanguki woge? Vakondi vamwe kulipa marufo mokupakera mbili munona, yipo gumwe a pwizumuke ndi a rugane yirugana yimwe. Wa hepa kulirandera siruwo koyininke ya hana mulyo, o vhure kugwana siruwo sokulipakera nyamoge mbili. Mayuri, zinya gomoIndia, kwa tanta asi: “Mwa za siruwo ngo ya yi yika.”

Tantera ko kaume goge ogu wa huguvara. Nampili vakaume ava va kara novanona wokudira kuvera, kuvhura va ku purakene. Kanderera kwaJehova Karunga. Kuvhura makanderero ga ku vatere  ndi? Yazmin, ga kara novana vavali woyirema, kwa tanta asi: “Poyiruwo yimwe ngani lizuvhu ngwendi ni fe.” Ta tanta hena asi: “Ngani kanderere kwaJehova a pe nge nonkondo. Makura ngani lizuvhu mukumo gokutwikira kuparuka.”—Episarome 145:18.

Uvera womunona kukundama eyi nava lya vemepata neyi nava rugana ntani siruwo esi vakondi nava kara nankenye munwawo. Makura vanona kuvhura va lizuvhe asi vakondi kapi vana kuvapakera mbili. Pamwe vakurona kulitura mo unene va pakere mbili munwawo gokuvera makura tayi kundama nonkwara dawo. Lionel, guhya gomoLiberia, kwa tanta asi: “Poyiruwo yimwe mukadange kutantera nge asi gelike a rugana nayinye ano ame kapi ani pakere mbili munwentu. Ame kulizuvha asi age kapi ana kufumadeka nge makura tani mu limburura momudona.”

EGANO: Mokuninka asi vana veni va lizuvhe asi mwa va hara, ruganeneni kumwe yininke eyi va hara. Jenney, ogu tuna tumbura, kwa tanta asi: “Poyiruwo yimwe ose kuruganena mbeli zetu yininke yoyiwa, pamwe kumutwara a ka lye korestauranda.”

Mokugamena nonkwara deni, uyungeni nokukanderera kumwe ngovalikwali. Aseem, guhya gumwe gomoIndia ga kara nomuna a vere sihegani, kwa tanta asi: “Poyiruwo yimwe, nampili ngomu name namukadange atu lizuvhu eroroko nehandu, ose kutura po siruwo tu hingire yipo tu uyunge nokukanderera kumwe. Nkenye ngurangura, komeho vanona va pinduke, ose kuzogera kumwe velise moBibeli.” Valikwali vamwe kuzogera kumwe komeho va ka rare. Pokuzogera nokukanderera kumwe kunkondopeka nonkwara deni poyiruwo yomaudigu. (Yisewe 15:22) Valikwali vamwe kwa tanta asi: “Yiruwo yoyiwa eyi atu dili kudivara meparu lyetu apa ngatu kara nomaudigu.”

Bibeli kwa tumbwidira asi Karunga ntaantani nga ka guse po mauvera nagenye aga ava vere vakondi novanona. (Ehororo 21:3, 4) Posiruwo oso, “nagumwe si gomosirongo esi twa kara nga sivana asi ta vere.” *—Jesaya 33:24.

Posiruwo esi, kuvhura yi ku tompoke mokurera munona gosirema. Carlo naMia, ava tuna tambura ketamekero, kwa tanta asi: “Ya ha ku dompesa nsene yininke kapi yina kugenda po nawa. Demenena koyininke yoyiwa eyi na vhura kurugana munoge, morwa ayo yinzi ya kara.”