Ame kwa hampurukilire nge moSanto Domingo, nkurusitata zaDominican Republic. Kwa tu reta tuvane, ame nsiraura. Vakondi vange kwa kere vantu wokulironga makura awo kwa here ose vana vawo tu gwane eparu lyewa nokukara vantu wovawa. Nomvhura ne komeho va hampuruke nge, vakondi vange kwa va wizilire vatumwa womoukarelikarunga woVamormon. Awo kwa va hafesere nkedi zongwa omu va dwere vadinkantugara vena, yipo vakondi vange va tokwere asi epata lyetu ta lihamene koukarelikarunga woVamormon.

Ngomudinkantu ngani hafere yirugana yokongereka ntani na fumadekere Vamormon morwa ngava rongo kuhamena mapata nonkareso zomuntu. Ame na lizuvhire mfumwa mokuhama koukarelikarunga owo makura tani tura po sitambo sokukara mutumwa.

Apa na kere nonomvhura 18, tatu dirukire koAmerika yipo na ka twikire nelirongo lyokuzeruka. Konyima zomvhura zimwe, oyinagona namugara gwawo, vamwe woNombangi daJehova, tava ya tu dingura momukunda gwaFlorida. Tava tu zigida tu ze kosigongi soBibeli. Ame na ka tetukire pokumona omu navenye vana kupenuna moNobibeli dawo nokutjanga madidiliko. Yipo na hundilire pena nosipepa name ni tjange.

Apa sa pwire sigongi oyinagona namugara gwawo tava tantere nge asi: “mokumona asi ono hara kukara mutumwa kuvhura tu ku vatere o lironge Bibeli.” Alyo kwa kere egano lyewa, morwa ame kwa divire tupu unene Buke zoVamormon kupitakana Bibeli.

Apa ngani zogere kotelefona noyinagona namugara gwawo kuhamena Bibeli, awo nkenye apa ngava korangeda nge ni hetakanese epuliro lyange neyi azi rongo Bibeli. Awo kwa here ni limonene nyamwange eyi azi rongo Bibeli.

 Pwa kere marongo gomanzi goVamormon aga na tambwire, nye kapi na kere nousili nsene Bibeli za ga kwatesa ko. Oyinagona tava tumine nge sifo Awake! somazuva 8 Mangundu 1995, esi va nduruka Nombangi daJehova. Amo kwa kere mo yirongwa yimwe yepuliro lyoVamormon, ano ya tetukisire nge pokumona asi kapi na divire mapuliro gawo nagenye. Makura tayi tumangeda nge ni rugane mapaparo koInterneta zopaveta zoVamormon ni divilise nsene asi usili eyi va uyungire moAwake! Sifo oso usili sa uyungire morwa na ka yi limonene hena apa na ka dingwire nzugopungwiro zoyininke yanare yoVamormon mosirongo saUtah.

Ame nare ngani gazara asi Buke zoVamormon ntani Bibeli kwa lizasana. Nye apa na litulire mo mokuresa Bibeli, tani ya yi dimbura asi marongo goVamormon kulirwanesa neyi azi rongo Bibeli. Pasihonena, mwaHesekiyeli 18:4 Bibeli kutanta asi mwenyo kufa. Nye Buke zoVamormon, mwaAlma 42:9 kwa tanta asi: “Mwenyo kapi agu fu.”

Kugusa ko marongo ogo, koyili hena ngava rongo Vamormon eyi ngayi dili kuhafesa nge. Pasihonena, awo kuronga asi sikunino saEdeni kwa kere momukunda gwaJackson, mositata saMissouri mosirongo saAmerika. Vampitisili wongereka awo kuronga asi: “Karunga nga pangera evhu nalinye kupitira mepangero lyaAmerika.”

Yipo na lipulire asi, yisinke ngayi horokera koyirongo nayinye, kukwatera mo sirongo sange somvharerwa? Ezuva limwe apa ga toonenene nge ngodi mumatigara ogu va dewire mosirugana soutumwa soVamormon, makura tani yi mu pura. Ame tani mu pura asi, nsene ngamu kara yita mosirongo sawo kuvhura nga rwise vapuli vakwawo womosirongo sapeke ndi? Na tukukire apa ga limbwilire asi, nhi! Yipo na konakonene unene epuliro lyange tani ka pura hena vampitisili wongereka zoVamormon. Awo kwa tanterere nge asi mapuro gange udigu nye ezuva limwe ngani gwana tupu elimbururo.

Oyo kapi ya hafesere nge, tani likonakona kweyi na harere kukara mutumwa goVamormon. Tani ya yi dimbura asi ame kwa here kukara mutumwa yipo ni vatere vantu. Ntani hena kwa here vantu va fumadeke nge. Nye kutanta usili, kapi na divire yoyinzi kuhamena Karunga. Nampili ngomu ngani resa Bibeli, kapi na zi tere asi mulyo. Kapi na divire sitambo saKarunga kevhu ndi kovantu.

Apa na lirongere Bibeli noNombangi daJehova, na lironge yininke yoyinzi ngwendi edina lyaKarunga, eyi ayi horoka apa a fu muntu, ntani eyi nga rugana Jesus mokusikisa mo sitambo saKarunga. Tani ya lizuvhu asi kuna kukwata egano Bibeli ntani na yi haferere kutantera ko vantu eyi na lirongere. Nare na yi divire asi Karunga yipo ga kara, nye ngesi ame kuna kuuyunga nendi mekanderero ngakaume gwange gomunene. Ame kwa gwene ekuho ngagumwe goNombangi daJehova momazuva 12 gaPembankuru 2004 ano konyima zomakwedi ntazimwe tani tameke nosirugana soUhompa sosiruwo nasinye.

Ame kwa rugana nomvhura ntano komberewa zonene zoNombangi daJehova moBrooklyn, moAmerika. Ame kwa hafera mokuvatera kunduruka Nobibeli noyimbapiratjangwa yoBibeli, eyi ayi vatere mamiliyona govantu uzuni mudima ntani ame kuna kutwikira kuvatera vantu va lironge kuhamena Karunga.