EVHUMBUKO lyaJesus kapisi sihorokwa somawoko-woko, kuna kara sininke esi sa kara nomulyo kwetu naina. Mupositoli Paurusa ga tumbwire mulyo gwaso apa ga tjenge asi: “Kristusa yige va hova kupindura koufe, mwava navenye va fa. Moomu da kara po nomfa mouzuni morwamuntu gumwe, nevhumbuko lyovafe nalyo kwa kara po morwamuntu gumwe. Ano moomu ava fu vantu navenye morwa yiwo ruvharo rwaAdamu, yimo ngorooro hena ngava va tura navenye mwenyo morwa yeeyi awo kwa likwatakana naKristusa.”—1 Vakolinte 15:20-22.

Jesus kwa mu vhumbwire moNisani 16, momvhura 33, ano kwa kere ezuva eli ngava zamba kwaJehova muzangu gokuhova gonombuto dawo pontembeli moJerusarema. Apa ga uyungire Paurusa asi Jesus yige va hova kupindura koufe, age kwa tembe asi koveli vamwe hena ava ngava pindura koufe.

Nonkango dokukwama ko edi ga uyungire Paurusa kufaturura eyi lya sikisa mo evhumbuko lyaJesus. Paurusa kwa tente asi: “Moomu da kara po nomfa mouzuni morwamuntu gumwe, nevhumbuko lyovafe nalyo kwa kara po morwamuntu gumwe.” Morwa nonzo nedirokusikiliramo eli twa pinga kwaAdamu, eyi yiyo atu fire natuvenye. Nampili ngoso, pokugava eparu lyendi lyokusikilira mo ngonzambo, Jesus kwa mangurura vantu navenye koupika wononzo nonomfa kupitira mevhumbuko. Mokuyikwatakanesa nawa, Paurusa kwa tjenge moVaroma 6:23 asi: “Mfeto zononzo nomfa, nye uhwi wonkenda waKarunga yiwo mwenyo gwanarunye mwaJesus Kristusa, Hompa gwetu.”

Jesus mwene kwa fatwilire eyi adi tanta nomfa nevhumbuko lyendi kwetu. Pokuuyunga kuhamena mwene, Jesus kwa tente asi: “MunwaMuntu nage yimo ngava mu tulika, asi nkenye ogu a mu pura, a gwane mwenyo gwanarunye. Yeeyi Karunga kwa here uzuni unene-nene, yiyo ga u pere Munwendi gelike a huru, asi nkenye ogu a mu pura a dire kuzonauka, nye a kare nomwenyo gwanarunye.”—Johanesa 3:14-16.

Gazara tupu, eparu lyanarunye lya hana kukora ndi ruhepo ndi ruguwo! (Ehororo 21:3, 4) Ee, meho musi kouwa! Mulirongi gumwe kwa uyungire asi: “Mokumona asi mayendo kudiworokesa vantu usupi weparu, evhumbuko kulikida usupi wonomfa.” Yimo, evhumbuko lyaJesus kwa retera vantu mwenyo gwanarunye!