Ame kwa kulilire monkarapamwe zoruhepo pezenga lyositata Turku. Otate kwa kere mutooninyongo gomunene ano name namumbyange gomumati nose ngatu toona nonyongo. Apa na kere kosure ngani rwanangana unene. Ngomudinkantu tani ya hamene kombunga zonyanya ezi za ninkisire nge ni ya kare nyanya unene. Tani tameke kuyahara nomusika donyanya makura tani gazadara kukara musikante.

Makura tani ya randa yiruganeso yokudimbisa nokutota po mbunga, ano ame nyame na kere mpitisili gwawo. Apa ngani dimbi positantara ngani kara nonkareso ngwendi gokuzaruka. Morwa mbunga zetu kwa kere nonyanya nemoneko lyokutjilisa, makura tatu ya divikwa kanunu-kanunu. Makura tatu ya tameke kuyadimba komeho zonombunga dononene ntani konyima tatu ya kwateke nonsumo dimwe ano vantu va di here. Koyiha yomvhura 1990 tatu ya tameke kuza koAmerika tu ka dimbe. Ngatu ka dimba mositata saNew York ntani yikando yongandi moLos Angeles ano komeho tu tengure koFinland twa ka lidivire nonongesefa doudivi musika.

Nampili ngomu ngani hafere kukara mombunga zetu zousikante, kapi na kere nositambo meparu. Nkareso zomarumbasano nezi zonyanya zomousikante kapi za hafesere nge. Ame kwa lizuvhire asi ni muntu gomudona ntani na tjilire kukapya momundiro gwanarunye. Tani papara evatero monobuke doukarelikarunga ntani ngani kanderere unene kwaKarunga a vatere nge, nampili ngomu na lizuvhire asi kapi tani mu hafesa.

Ngani rugana koposa ni lirere nyamwange. Ezuva limwe tani ya dimburura asi murugani mukwetu gumwe Mbangi zaJehova. Tani mu puragere mapuro gomanzi. Kwa tetukisire nge nkareso zendi zokuteda nomalimbururo gendi gokutunda moMatjangwa, makura tani pura a ronge nge Bibeli. Konyima zokulironga Bibeli yivike yongandi, mbunga zetu zousikante kwa zi zigidire zi ze koAmerika zi ka rugane marusumo gongandi. Ame kwa lizuvhire asi ezi kuna kara mpito zongwa unene.

 Makura tani tantere ogu nga rongo nge Bibeli asi tani zi ni ka rugane marusumo gongandi makura apa ngani ka tengura ngani ya litura mo unene mokusikisa mo nompango doBibeli. Kapi ga pwagesere magano gendi nye ta tantere nge ni rese nonkango daJesus edi va tjanga mwaMateusa 6:24. Velise ozo kutanta asi: “Muntu simpe a vhuru kukerera ohekuru vavali.” Da tetukisire nge eyi da tembe nonkango daJesus. Nye konyima zomazuva gavali, tani ya tetukisa ogu nga rongo nge Bibeli. Tani ya mu tantere asi morwa nina hara kukwama Jesus, nina tundu mo mombunga zousikante!

Bibeli kwa kere ngwendi ntarero ezi za likida nge mapuko gange. (Jakopo 1:22-25) Na mwene asi ame kwa kere nonkareso zonyanya: Ngani linenepeke ntani kwa here marumbasano. Ngani tuku vantu nokurwananga nokukoka makanya nokunwa unene marovhu. Na lizuvhire sili kukora komutjima apa na nongwenene asi nkareso zange kwa lirwanesere nonompango domoBibeli. Nampili ngomu ya kere udigu, na here kutura po marunduruko.—Vaefeso 4:22-24.

Pomuhowo na guvire unene morwa mapuko aga na rugene nare. Nye ogu nga rongo nge Bibeli ga vaterere nge unene. Ta likida nge eyi za uyunga Bibeli mwaJesaya 1:18 asi: “Nonzo deni nampili di gehe ngwendi honde, ngadi zera ngwendi yiterengenze.” Etjangwa eli noMatjangwa gamwe ga tumangedere nge ni nongonone asi Guhyetu gemeguru age munankenda ntani ana hara kudongonona po mapuko gowo ava litezurura.

Apa na tamekere kudiva Jehova nokumuhara, makura tani hara kuligava kwendi. (Episarome 40:8) Momvhura 1992 yipo na gwene ekuho kosigongi soyirongo soNombangi daJehova esi sa kere moRusia mositata saSt. Petersburg.

Na gwana vakaume wovawa wovanzi movakareli vaJehova. Poyiruwo noyiruwo, ose kupongasana kumwe tu sike marusumo gomawa nokuhafera sigava esi sokutunda kwaKarunga. (Jakopo 1:17) Na gwana hena etungiko lyewa pokukwara mukadi gomuwa, Kristina. Name namukadange twa hafa kumwe nokupita momaudigu kumwe ntani nokulipwagesera malizuvho getu.

Ngano kapi na ya kara gumwe goNombangi daJehova ngano nare na fa. Komeho ni ya kare Mbangi, ngani kara nomaudigu gomanzi. Nye ngesi nina kara nositambo meparu ntani kuna kulizuvha asi nayinye yina wapere nge.