NOWA ta kankuka makura ta ligonyona morwa yitjato. Ta hingire pegogwa a pwizumuke, ta tara emuwato eli ana kutunga. Mpepo kuna kunuka musi gomakara, ano yitjaheso neyi yokutetesa yitji kuna kuhagara. Nowa ana hingire ta tara vana vendi kuna kurugana unene. Vana vendi novakadi vawo ntani mukadaNowa kwa rugana nendi nomvhura dononzi. Simpe kapi vana mana!

Vantu womomukunda tava gazara asi Nowa nepata lyendi vana piyagana. Apa Nowa novana vendi vana kutunga emuwato, vantu tava va zoro. Awo tava gazara asi ruhanzo kapi ngaru wiza morwa Nowa nare ga gusa kuyiuyunga. Tava gazara asi age mugova kuna kuhepeka tupu siruwo sendi nesi sepata lyendi pokutunga emuwato. Nye Jehova Karunga kapi ga tere Nowa asi mugova.

Nonkango daKarunga kutanta asi: ‘Nowa kwa kere momalikwatakano naKarunga.’ (Genesis 6:9) Kutanta asi Nowa nga limburukwa Karunga ntani ga mu here. Bibeli za tanta hena asi: “Mepuro lyangesi yimo nye ga pangwililire uzuni.” (Vahebeli 11:7) Monkedi musinke Nowa ga pangwire uzuni kupitira mepuro? Yisinke natu lirongera ko kepuro lyendi?

Nowa kwa kulilire mouzuni ou wa donapere. Uzuni wa donapere nampili nomomazuva gaHenoka ozinyakuru vaNowa ava nawo va kere momalikwatakano naKarunga. Henoka ga pumbire asi uzuni wovantu wovadinikarunga ngava u zonagura po. Ano momazuva gaNowa, udinikarunga tau ya ligwederere. Jehova kwa tere uzuni asi una zonauka, morwa nyanya kwa vhukire. (Genesis 5:22; 6:11; Juda 14, 15) Yisinke ya retesere po udona wangoso?

Vaengeli kwa tamekere kurugana udona. Muengeli gumwe kwa rwanesa Jehova, ta ya kara Satana Muzonaguli pokuswaura Karunga nokuzeda Adamu naEva va ture nzo. Momazuva gaNowa, vaengeli vamwe kwa rwanesere upangeli waJehova. Tava sigi yirugana yawo meguru, tava gusa marutu gopasintu makura tava kwara vakadona wovawa po. Vaengeli owo wovarwanesi wokulinenepeka kwa pukisire vantu momudona.—Genesis 3:1-5; 6:1, 2; Juda 6, 7.

Vakadi owo va kwere vaengeli, tava reta vanona wononkondo womatundusika. Bibeli kutumbura vanona owo asi “Mamuturungu.” Mamuturungu ngaga hepeke vantu nokuretesa po nkareso zoudinikarunga zonyanya mouzuni. Oyo tayi ninkisa Musiti a lizuvhe asi “udona wovantu una vhuka napenye, awo hena yoyidona yelike vana kugazara.” Makura Jehova ta tokoro asi konyima zonomvhura 120 nga zonagura po vadinikarunga.—Genesis 6:3-5.

Gazara tupu omu ya kere udigu kurera vanona mouzuni wangoso. Nowa ga yi rugene. Ta  kwara mukadi gomuwa. Apa Nowa ga ya kere nonomvhura 500, mukadendi ta mu retere vana vatatu, oSema naHamu naJafeta. * Nowa namukadendi va hepere kupopera vana vawo koyininke yoyidona. Twa yi diva asi vamati kwa hara kuhonena vagara wononkondo wokufumana. Nowa namukadendi kapi va vhulire nkenye apa kukandana vana vawo va dire kudiva eyi ngaga rugana mamuturungu, nye va vhulire kuronga vana vawo usili kuhamena Jehova Karunga, ogu ga nyenga udinikarunga. Ngovakurona awo va hepere kuvatera vana vawo va dive asi Jehova ga guvire pokumona nyanya nourwanesi womouzuni.—Genesis 6:6.

Naina vakurona tava kwata egano omu Nowa namukadendi va lizuvhire. Mouzuni naina kuna zura mo nyanya nourwanesi. Vadinkantu kuna kara nonkareso zourwanesi. Nampili malikwamo aga va wapaikira vanona va tarere kwa zura mo nyanya. Vakurona va hepa kukondja unene va ronge vana vawo kuhamena Jehova Karunga gombili, ogu nga gusa po nyanya nazinye. (Episarome 11:5; 37:10, 11) Ngwendi Nowa namukadendi, vakurona nawo kuvhura yi va tompoke kuronga vana vawo. Vana vaNowa va ya kere vagara wovawa, tava ya kwara vakadi ava nawo va here Jehova Karunga gosili.

Ezuva limwe, eparu lyaNowa tali runduruka. Jehova ta mu tantere kuhamena sitambo sendi sokuzonagura po uzuni. Ta pangere Nowa asi: “Lipangerera emuwato lyoyitji yoyiwa.”—Genesis 6:14.

Wato ou kapi wa fene ngwendi sikepa. Awo kwa fene ngwendi simbangu ndi epakote. Jehova ta pe Nowa nompangera omu wato nau fana monaure nomomusika, ntani a tetagure mo mazimo nokuuhota monda nokontunda nomanganganga. Makura ta tantere Nowa konda zeyi na tungira wato pokutanta asi: “Tani hanzesa ruhanzo pevhu . . . Yininke nayinye yepevhu ngayi fa.” Nye Jehova ta tura po malikwatakano naNowa asi: “Ngo perame mo memuwato namukadoge novana woge novakadi vawo.” Nowa ga hepere kupereka hena nkenye rudi rosikorama. Woowo tupu va kere mowato yiwo va vhulire kuparuka ruhanzo.—Genesis 6:17-20.

Nowa kwa gwene sirugana soudigu. Wato owo kwa kere unene, monaure nometa 133 monompatji nometa 22 ano momusika nometa 13. Awo kwa kere wato wounene kupitakana yikepa yomomazuva getu. Nowa ga nyokere kutunga wato, nokusivana asi udigu ndi a hetekere ko kuutunga moomu ga u harerere ndi? Bibeli kutanta asi: “Nowa nage ta rugana nayinye moomu ga mu pangerere Karunga.”—Genesis 6:22.

Sirugana oso kwa va gusire nomvhura dokusika po-40 ndi 50. Va hepere kuteta yitji nokuyitjaha nokuyipakakana. Emuwato lya hepere  kukara nomazimo gatatu gokulironda-ronda, nononzugo dononzi ntani nevero. Ntani va hepere kusiga po kampito keguru, ntani nondunda pokatji yipo mema ga konkomokere po.—Genesis 6:14-16.

Mwaza nomvhura etungo lyowato tali kuru, Nowa ta hafa morwa epata lyendi kwa mu vaterere. Nye pwa kere hena sirugana simwe esi sa kere udigu unene kupitakana kutunga emuwato. Bibeli kututantera asi Nowa “nga udisa uhungami.” (2 Peturusa 2:5) Nouradi age ga rondwere vantu womouzuni wina woudona kuhamena ezonauko. Yisinke va rugene apa va zuvhire erondoro? Jesus Kristusa konyima ga ya uyungire kuhamena mazuva gaNowa asi vantu kapi va ‘yi kwete egano.’ Awo kwa hokwere tupu kulya nokunwa nokukwara, kapi va purakenene kwaNowa. (Mateusa 24:37-39) Vantu ngava swaura Nowa nepata lyendi, vamwe nampo ngava mu tjilisa nokuhara kumutoona. Awo nampo va hetekerere ko kuzonagura etungo lyowato.

Nowa nepata lyendi kapi va hagekere. Awo va twikilire kutunga emuwato nampili ngomu vantu ngava yi tara asi kwato mulyo ndi asi ugova. Naina, mapata goVakriste kuvhura va lirongere ko yoyinzi kepuro lyaNowa nepata lyendi. Bibeli kutanta asi ose kuna kuparuka “pomazuva gopouhura.” (2 Timoteusa 3:1) Jesus kwa tente asi mazuva getu ngaga fana ngwendi mazuva apa Nowa ga tungire emuwato. Nsene vantu va dira kutambura mbudi zoUhompa waKarunga ndi va tu hepeka, ngoVakriste twa hepa kudiworoka sihonena saNowa. Kapisi nyose wokuhova kuligwanekera nomaudigu gangoso.

Tapa piti nomvhura, emuwato tali hara kupwa kutunga. Apa Nowa ga here kusika konomvhura 600, vamwe vekoro lyendi tava tameke kufa. Oguhwe, Rameki tava fu. * Konyima zonomvhura ntano, Metusera, guhyaRameki, nage ta fu age nomvhura dendi 969, yige ga parukire siruwo sosire kovantu ava va tumbura moBibeli. (Genesis 5:27) Metusera naRameki kwa parukire posiruwo simwe naAdamu, muntu gokuhova.

Age Nowa ana kara nonomvhura 600, ta gwana mbudi zokutunda kwaJehova Karunga asi: “Hwilira memuwato nembo lyoge nalinye.” Karunga ta tantere Nowa a pereke memuwato nkenye rudi royikorama yokukuhuka yitano-nayivali yoyigara neyi yoyikadi ya wapera kuzamba, ano kweyi yokunyata yivali, simwe sigara ano sikwawo sikadi.—Genesis 7:1-3.

Gazara omu Nowa nepata va lizuvhire pokumona mayovi goyikorama kuna kugogomokera memuwato, yokugenda, yokutuka, yokukokava neyi yokuwovana, yoyinunu neyi yoyinene. Gazara tupu sirugana esi ga kere naso Nowa sokusinga yikorama nayinye yi hwilire memuwato. Bibeli kutanta asi “nayinye kwa zire kumwe naNowa memuwato.”—Genesis 7:9.

Vantu vamwe kupatanesa sihorokwa saNowa pokupura asi: ‘Ngapi ya vhulire kuhoroka oyo? Ngapi yikorama nayinye ya vhulire kukara mombili memuwato?’ Gazadara ko kweyi: Kuvhura Musiti gwanayinye yi mu vhure kupangera yikorama eyi ga sita yi dire kukara nowoma ndi nonyanya ndi? Diworoka asi, Jehova Karunga yige  ga sita yikorama. Ntani konyima ga ya tepanene mema gemEfuta lyEgeha ntani ga ninkire ezuva li sikame ndjikiti. Yipo nye age ga vhulire kusikisa mo eyi va tumbura mosihorokwa saNowa.

Karunga ga vhulire kupopera yikorama monkedi zapeke. Nye age kwa horowere nkedi ezi nazi tu diworokesa sitambo esi ga kere naso kovantu sokutakamesa yinamwenyo yepevhu. (Genesis 1:28) Vakurona wovanzi kuruganesa sihorokwa saNowa va ronge vana vawo asi Jehova ga hara yikorama novantu.

Jehova kwa tanterere Nowa asi ruhanzo taru wiza konyima zosivike. Nowa nepata lyendi kwa kere nosirugana sosinene. Awo va hepere kusinga yikorama nayinye nokuyiwapaikira nondya dayo ntani nokurongera yipako noyiweka yawo. MukadaNowa novangumweyi vendi kwa rugene unene va wapaike monda zemuwato li moneke ngwendi embo.

Awo vantu yisinke va rugene? Nampili ngomu va mwene Jehova kuna kutungika Nowa mosirugana sendi, simpe kapi va yi ‘kwete egano.’ Awo kwa tere tupu omu yikorama yina kugogomokera memuwato. Kapisi zi tu tetukise nkareso zawo. Naina vantu, nawo kapi vana kukwata egano maumbangi gana kulikida asi ose kuna kuparuka pomazuva gopouhura gouzuni ou. Ngwendi moomu ga yi pumbire Peturusa, vantu kuna kuzora ava vana kupurakena komarondoro gaKarunga. (2 Peturusa 3:3-6) Vantu kwa zorere Nowa nepata lyendi.

Ruveze musinke va hagekere kuzora? Bibeli kututantera asi apa Nowa ga hwilidire epata lyendi noyikorama memuwato, Jehova “makura ta zedire evero konyima zaNowa.” Nsene si yipo va kere pepi apa Karunga ga zedilire evero, awo va hagekere kuzora. Ntani mvhura apa za tamekere kuroka, za va mwenekedere. Azo kwa rokere nokuroka nokuhanzeka uzuni mudima, ngwendi moomu ga yi uyungire Jehova.—Genesis 7:16-21.

Jehova ya mu hafesere pokumona vantu owo wovadona tava fu ndi? Hawe! (Hesekiyeli 33:11) Age ga va pere siruwo sokugwanena po va rundurure nkareso zawo yipo va rugane yoyiwa. Ngano ya va tompokere kurunduruka ndi? Ulimburukwi waNowa noyirugana yendi yoyiwa, kwa likidire asi ngano vantu va kere neharo lyokurundurura nkareso zawo ngano va parukire ruhanzo. Kupitira mepuro lyendi, Nowa ga pangwilire uzuni womomazuva gendi. Epuro lyendi lya mu parwire kumwe nepata lyendi. Nsene o honena epuro lyaNowa, nove ngo paruka kumwe nowo wa hara. Ngwendi Nowa, kuvhura o kare momalikwatakano naJehova Karunga ngaKaume koge. Ukaume ou ngau karerera narunye!