JONATANA, Mukoreya ogu va hampurukira moAmerika, ga gwanekerere noudigu wokumutondora pounona. Ngomu ga kulire, ga paparere evango oku vantu va dilire kumutondora kuliza nemoneko ndi norudi rwendi. Age kwa ya kere ndokotora modoropa zaAlaska moAmerika, ntani emoneko lyendi kwa lifene novantu wovanzi ava nga hakura. Age kwa gazarere asi kevango oku ga dirukilire kapi kwa kere elitondoro.

Ayo kapi ya sikisire mo endindiro lyendi apa ga hakwire mukadi gonomvhura 25. Apa muveli ogo va mu pwagesere mositawiro, ta tarurura Jonatana nokumusandura mokuhorora malizuvho gendi aga ga kara nago koVakoreya kutunda unona wendi. Sihorokwa oso kwa koresere nokudiworokesa Jonatana kelituromo lyendi lyokuhenduka elitondoro.

Sihorokwa saJonatana kulikida usili ou wa kara po. Elitondoro kwa kara mouzuni naunye. Ayo  kumoneka asi elitondoro kwa kara nkenye oku va tunga vantu.

Nampili ngomu elitondoro lya lihanena nakunye, sinzi sovantu kapi va hara elitondoro. Ou kuna kara ukaro wokulirwanesa. Ngapi omu sininke esi va nyenga nasi lihanena hena mouzuni naunye? Sinzi sovantu ava va nyenga elitondoro kapi ava li dimburura vene asi va kara noudigu ou. Nove wa kara noudigu owo ndi?

Yi kare asi yimo ndi hawe, udigu kulidimburura nyamwetu nsene twa kara nelitondoro momutjima. Bibeli kwa faturura eyi ya karera ngoso pokutanta asi: “Yilye gokuvhura kukwata egano mutjima gomuntu? Kutupu yapeke eyi ya pitakana po moyimpempa.” (Jeremiya 17:9) Yipo nye, kuvhura tu likumbagere nyamwetu pokutanta asi kwa hafera vantu navenye. Ndi kuvhura tu lihungike asi twa kara nokonda zomulyo mokunyenga rudi rongandi.

Mokufanekesa nsene wa kara noudigu welitondoro, gazadara ko kosihorokwa esi: Ove kuna kugenda masiku nyovelike. To mono vagara vavali vana kuwiza. Awo kuna kumoneka asi nonkondo, ano gumwe kuna kwaterere yuma mokuwoko.

Kuvhura o gazare asi vagara owo kuna kara nositambo sokukuhomokera ndi? Yimo, yihorokwa yimwe yanare kuvhura yi ku diworokese asi wa hepa kutakamesa, nye yihorokwa oyo kuvhura yi ku ninkise o gazare asi vagara owo vakorokotji ndi? Nye epuro limwe lyomulyo kuna kara asi: Rudi musinke ono gazarere vagara owo vavali? Elimbururo lyoge kepuro eli kuvhura kuhorora rudi oru wa nyenga. Kuvhura yi likide asi ove kwa ku kundama mpepo zelitondoro mononkedi dongandi.

Natuvenye twa hepa kuyitambura asi kwa tu kundama elitondoro mononkedi dokulisiga-siga. Nampili Bibeli za kwatesa ko elitondoro eli twa kara nalyo pokutanta asi: ‘Vantu kumona eyi aga mono meho.’ (1 Samwere 16:7) Mokumona asi natunye kwa kara noudigu ou, ngatu vhura sili kunyokera po elitondoro meparu lyetu ndi? Ntani ngapa kara siruwo apa vantu navenye ngava dira kukara nelitondoro ndi?