Bibeli kwa tumbura nokonda mbali domulyo. Zokuhova, nampili ngomu vantu ava tompora yininke yoyinzi, awo kapi va va sita nevhuliko lyokulipangera vene. Zauvali, yitambo yawo yokutulisa po mbili kapi ayi va tompoka morwa “uzuni mudima kwa kara mepangero lyoMuzonaguli,” Satana. Yipo nye, vantu kapi ava vhuru kutulisa po mbili mouzuni.—Resa Jeremiya 10:23; 1 Johanesa 5:19.

Eyi ayi ninkisa hena mouzuni mu dire mbili morwa vantu kukondjera uwa wavene. Epangero eli ngali tulisa po tupu mbili mouzuni lyeeli lyokuvhura kuronga vantu va hare youhunga nokulipakera-pakera mbili.—Resa Jesaya 32:17; 48:18, 22.

Karunga Munankondo nadinye kwa tumbwidira mokutulisa po epangero limwe eli ngali pangera vantu navenye. Alyo ngali ya pinganena po mapangero nagenye. (Ndaniyera 2:44) MunwaKarunga, Jesus, nga pangera ngoHompa gombili. Nga gusa po udona naunye pevhu ntani nga ronga vantu omu nava kara nombili.—Resa Jesaya 9:6, 7; 11:4, 9.

Nampili naina, mepitisiro lyaJesus, mamiliyona govantu mouzuni mudima kuna kuruganesa Nonkango daKarunga Bibeli, va ronge vantu omu nava kara nombili novakwawo. Mbili ntaantani ngazi ka kare pevhu.—Resa Jesaya 2:3, 4; 54:13.