Ame kwa retera nge mokadoropagona Texcoco. Posiruwo sina, sinzi soyitaura yomodoropa ozo kwa kere yogarawe. Vantu wokonomukunda dopopepi nkenye apa ngava reta yininke yawo moturukara toyindongili va ya yi randesere modoropa ozo. Ose kwa tu reta ntane, ano ame gwauntambali, ntani epata lyetu kwa kere lyoruhepo. Otate ngava randesa yicapa yipo va tu rere. Apa na kere nonomvhura ntambali yipo va fire otate. Kutunda opo, onane yiwo ngava kondjo mokuturera.

Omama wovagara ngava siki musika ntani awo kwa kere mupitisili gononsumo edi ngava dimbi moukareli. Sinzi sekoro lyetu va divire kusika nomusika. Onane ngava dimbi mongereka, ano hekurwange nga dimbi nokusika musika. Ose kwa kere Vakatolika, ame ngani vatere muruti pemisa ntani kwa here kukara mutumwa goVakatolika. Ame kwa here hena kutarera novidiyo dokarate. Moomu ngani tarere unene novidiyo dokarate, yimo hena na tungire po nkareso zonyanya.

Ame kwa zire koPuebla komisiyona ni ka dimbe sure. Sitambo sange kwa here kukara muruti goVakatolika. Nye momvhura zange zokuhulilira, ngereka zaKatolika kwa dompesere nge mutjima. Sosita gumwe kwa sininikire nge tu ligwanekere panyama. Ya tompokere nge mokunyoka, nye sihorokwa esi kwa ninkisire nge ni hare kukwara. Ntani hena, varuti vamwe kwa parukire eparu lyouyilipaki. Makura tani ya hageke sitambo sokukara hena muruti.

 Tani ya tokora kulirongera usikante kosure National Conservatory of Music moMeksiko. Apa na mene kosure ozo, tani ya kwara makura tatu kara novana vane. Ngani rere epata lyange pokudimba pemisa mongereka zaKatolika.

Kutunda apa twa likwere, nonkwara detu kwa kere noudigu. Name namukadange ngatu litangwisa, morwa ngatu lirwire esupa. Pomuhowo ngatu litangwisa tupu, nye konyima twa ya tamekere kulitoona. Konyima zonomvhura 13, yipo twa tokwere kulizumba.

Ame kwa ligwanekerere noNombangi daJehova sikando sokuhova komeho tupu tu ligaunuke namukadange. Nombangi mbali da wizire pembo lyetu nokutupura nsene kuvhura tu zogere kuhamena Bibeli. Ame kwa gazarere asi na diva yoyinzi kuhamena Bibeli, makura tani pura nositambo sokulipatana nawo. Ame kwa va pulire mapuro goudigu aga na gazarere asi kapi nava gwana malimbururo. Nye awo kwa ga limbwilire kutundilira moBibeli. Tani ya dimburura asi nani kapi na divire yininke yoyinzi. Nye mukadange kapi ga here Nombangi, ntani kapi na kere nosiruwo sokulironga, makura tatu hageke.

Konyima zonomvhura ntano, tani ya gwanekere hena noNombangi daJehova, ame opo nomukadi gwapeke, gedina Elvira. Elvira kapi nga rwanesa Nombangi, ntani ya ya rerupilire nge mokulironga Bibeli nkenye apa. Nampili ngoso, ayo kwa gusire nge nomvhura dongandi ni hageke mparukiso zange zanare.

Tani ya yi dimburura asi na hepa kutura po marunduruko gomanene nsene nina hara kukarera Jehova nomutjima nagunye. Pomuhowo na hepere kuhageka yirugana yange yokudimba pemisa mongereka zaKatolika, kutanta asi na hepere kupapara nkedi zapeke omu nani rera epata lyange. (Ehororo 18:4) Ntani na hepere hena kukwara Elvira paveta.

Nkareso zimwe zondigu ezi na hepere kuhageka kwa kere kupangera ehandu lyange lyenene. Matjangwa gavali aga ga vaterere nge kuna kara: Episarome 11:5, eli lya tanta asi Jehova kwa nyenga nyanya, ntani 1 Peturusa 3:7, eli lya rongere nge asi nsene nina hara Jehova a zuvhe makanderero gange, ntudi na hepa kutekura mukadange nefumadeko. Ngomu na gazadarere ko komatjangwa ogo nokukanderera kwaJehova a vatere nge, kanunu-kanunu na ya tamekere kupangera ehandu lyange.

Ame ngesi kuna kugwana ruhafo mepata. Ame kuna kukondja mokuwapukurura elikwatakano lyange novana vange wopomukadi gokuhova ntani nokuvatera epata lyange lyepe li kore mepuro.

Apa na kere munona, ame kwa here kukara muruti nokuvatera vantu. Ame ngesi kuna kulizuvha asi nina kara nositambo meparu. Ame kurera epata lyange pokuronga kuhamena musika. Nina hafa kweyi ga lididimikira Jehova, pokupa nge mpito zokurundurura eparu lyange yipo ni kare muntu gomuwa!