Malimbururo komapuro goBibeli
Karunga kupurakena makanderero nagenye ndi?
Karunga kupurakena kovantu wokonomuhoko nadinye. (Episarome 145:18, 19) MoNonkango dendi, Bibeli, kutukorangeda asi twa hepa kumutantera yinka yetu nayinye. (Vafilipi 4:6, 7) Nye, makanderero gamwe kapi a ga tambura Karunga. Pasihonena, makanderero gokukwata momutwe kapi aga mu hafesa.—Resa Mateusa 6:7.
Jehova kapi hena a tambura makanderero govantu ava ava teza po veta zendi mowina. (Yisewe 28:9) Pasihonena, Karunga kapi ga tambwire makanderero goVaisraeli ava ngava rugana yininke yoyidona. Yipo nye, twa hepa kusikisa mo mpango zaKarunga yipo a zuvhe makanderero getu.—Resa Jesaya 1:15.
Yisinke twa hepa kurugana yipo Karunga a tambure makanderero getu?
Kapi tatu kanderere kwaKarunga twa hana epuro. (Jakopo 1:5, 6) Twa hepa kukara nepuro asi yipo ga kara ntani age kutupakera mbili. Kuvhura tu nkondopeke epuro lyetu pokulironga Bibeli, morwa epuro lyosili kutunda momaumbangi nomomatumbwidiro ga kara moNonkango daKarunga.—Resa Vahebeli 11:1, 6.
Twa hepa kukanderera kutundilira komutjima nelinunupiko. Jesus, MunwaKarunga, nga linunupike apa nga kanderere. (Rukasa 22:41, 42) Mevango lyokutantera Karunga eyi na rugana, twa hepa kudiva mpango zendi pokuresa Bibeli. Makura ngatu kanderera kuliza nompango zendi.—Resa 1 Johanesa 5:14.
