Ove va ku koresa unene dogoro kulilira mo ndi?— * Natuvenye ya tu horokera. Pamwe kapisi kukora morutu. Nye gumwe kuvhura a uyunge yininke yoyidona kutuhamena eyi yina dili kuhungama. Ayo kukoresa ndi?— Karunga nage kumukoresa apa ava uyunga yimpempa kumuhamena. Tu zogereni eyi, nokutara omu natu vhura kumuhafesa nye kapisi kumukoresa.

Bibeli za tanta asi vantu vamwe ava ava uyunga asi va hara Karunga kumukoresa ‘komutjima.’ Yosili, kwato muntu na vhura kukoresa rutu rwaJehova Karunga. Morwa age Munankondo nadinye. Tu tareni nye eyi Jehova a lizuvhire kukora apa atu dili kurugana eyi a tu tantere.

Vantu vavali wopomuhowo ava ga sitire Jehova kwa mu reterere kukora kokunene. Vantu owo vavali kwa va tulire moParadisa pevhu “mosikunino saEdeni.” Yiwo wolye?— Yimo, Adamu naEva. Tu konakoneni eyi va rugene ya koresere Jehova.

Apa Jehova ga va tulire mosikunino, kwa va pangerere va si takamese. Ta va tantere hena asi va livhare va tunge mosikunino novana vawo narunye. Nye komeho Adamu naEva va kare novana, kosili sininke sosidona sa horokere. Wa diva eyi ya horokere ndi?— Muengeli kwa ninkisire Adamu naEva va dire kulimburukwa Jehova. Tu zeni tu ka tare omu ya horokere oyo.

Muengeli kwa ninkisire ezoka li uyunge. Eva kwa haferere eyi ga zuvhire. Ezoka kwa uyungire asi nga ‘fana ngwendi Karunga.’ Makura ta rugana eyi lya mu tantere ezoka. Wa diva eyi lya mu tantere?—

 Eva kwa lire enyango lyokositji esi Jehova ga tanterere Adamu asi va ha lya ko. Komeho Jehova a ka unge Eva, age kwa tanterere Adamu asi: “Yiyimwa yokoyitji nayinye yomosikunino kulya tupu, ntudi yokositji esi asi gava ediwo lyeyi yoyiwa neyi yoyidona no. Siyimwa saso nokanunu si asi o si lye. Nsene ngo yi hetekera, ngo fa lyoolyo ezuva.”

Eva ga divire veta ozo. Nampili ngoso, age ta tarurura sitji “omu sa fuura nomu ya wapa yiyimwa yaso mokutara . . . Makura ta gusa ko siyimwa simwe, ta li.” Konyima Eva ta gusa enyango ta pe ko Adamu, “makura nage ta li.” Morwasinke Adamu ga yi ruganene oyo?— Morwa Adamu kwa here unene Eva kupitakana omu ga here Jehova. Age kwa horowere kuhafesa Eva kupitakana Karunga. Nye mulyo unene kulimburukwa Jehova kupitakana nkenye ogu!

To diworoka ezoka eli lya uyungisire Eva ndi? Ngwendi moomu muntu na ninkisa sipopisa si uyunge, kweli ogu ga ninkisire ezoka li uyunge. Ezwi lyalye lya pwege mezoka?— Alyo kwa kere ezwi ‘lyezoka lyanare eli ava tumbura asi Muzonaguli ndi Satana.’

Wa diva asi ngapi omu no hafesa Jehova ndi?— Kuvhura o yirugana oyo pokumulimburukwa. Satana kwa uyunga asi age kuvhura kuninka nkenye ogu a rugane eyi ana hara. Ano Jehova kuna kutukorangeda asi: “Munwange kara munongo, makura ame tani hafa. Ame ngani limburura nkenye ogu nga pa nge usima.” Satana kuswaura nokupa Jehova usima. Age kuuyunga asi kuvhura a guse ko nkenye ogu kwaJehova. Makura hafesa Jehova pokumulimburukwa nokumukarera! Ngo hetekera ko kuyirugana ndi?—