Nomvhura 400 da ka pita, munahistoli gomoBritaniya Edward Herbert kwa uyungire asi twa hepa kugusira po vantu morwa nose ezuva limwe ngatu hepa egusiropo kwawo. (Mateusa 7:12) Nye pwa kara konda zomulyo zeyi twa hepera kugusira po wopeke. Tu konakoneni nonkango domupositoli Paurusa moVakorosi 3:13.—Resa.

Morwa natuvenye kapi twa sikilira mo, mwa za siruwo ose kuvhura kunyegenyesa wopeke ntani nawo kuvhura va tu rugane yokulifana. (Varoma 3:23) Ngapi omu natu kara nombili novantu wokudira kusikilira mo? Mepitisiro lyaKarunga, Paurusa kwa geve mapukururo asi twa hepa kukwata egano mapuko govakwetu nokuvagusira po. Mapukururo ogo simpe ga kara nomulyo naina ngwendi moomu va ga tjenge ure wonomvhura mayovi gavali gana ka pita. Tu zeni tu ka konakone nonkango daPaurusa.

“Omu lididimike-didimikire.” Buke zimwe kwa tanta asi Vakriste kulikida sikara oso “pokulididimikira mapuko nononkareso dovantu edi adi va nyegenyesa.” Nonkango “omu lididimike-didimikire” kulikida asi twa hepa kulididimikira yikara yovantu ngamoomu nawo va hepa kulididimikira yikara yetu. Nsene tu diworoka asi twa kara noyikara eyi nayi vhura kunyegenyesa wopeke, kapi ngatu pulisira yininke eyi twa nyenga movakwetu yi donganese po mbili pokatji ketu nawo. Nye ngapi nsene vakwetu vana tu zonene?

“Omu dongwenene po vakweneni.” Kuliza nomulirongi gumwe, nkango zoRugereka “kudongwenena po” kwa “nkondopeka mulyo gokugusira po nokudivara.” Buke zimwe kwa tanta asi nkango ozo kuvhura kutanta “mokuruganena muntu uwa.” Ose kuruganena vantu uwa pokuvadongwenena po ‘nsene tuna lizono novakwetu.’ Morwasinke natu ruganena uwa wangoso? Morwa, mwa za siruwo nose kuvhura kunyegenyesa vakwetu, nokuhepa asi va tu ruganene uwa pokutugusira po.

“Moomu ga mu dongwenena po Hompa.” Ezi yizo konda zomulyo zeyi twa hepera kugusira po vakwetu, morwa Jehova kutudongwenena po. (Mika 7:18) Gazadara ko nakauke kouwa ou a ruganene Jehova vananzo ava ava litezurura. Mokulisiga novantu, Jehova kapi a zono. Nye, age ga liwapaikira kudongwenena po vananzo wokulitezurura, nampili ngomu ga yi diva asi awo kapi va hepa kumudongwenena po. Yosili, Jehova ga tura po sihonena sosiwa pokudongwenena po vanzoni ava ava litezurura!

Nkenda zaJehova kutukoka nokututumangenda tu hare kumuhonena. (Vaefeso 4:32–5:2) Ya wapa kulipura asi: ‘Nsene Jehova ga kara nonkenda zokudongwenena nge po, morwasinke nani dilira kudongwenena po mukwetu gokudira kusikilira mo ogu ana litezurura kononzo edi ga zonena nge?’—Rukasa 17:3, 4.