Ruhepo ntaantani ngaru hage po!
Gazadara ko omu ngali fana eparu mouzuni wa hana ruhepo noukorokotji noyita nokuvera ntani yimpagwa. Gazadara to pinduka wa hana sinka kuhamena elitondororo nomahepeko ndi ruhepo. Eyi kuna kuzuvhika ngwendi esimwititi tupu ndi? Kwato muntu ndi nombunga dovantu ngadi reta po marunduruko ogo. Nye Karunga ga tumbwidira mokukagusa po ruhepo rovantu, kukwatera mo eyi vana zogere mosirongwa sina ka pita. Didilika matumbwidiro gomoNonkango daKarunga:
EPANGERO LYEWA
“Karunga gemeguru nga dika sirongo esi ngasi kererera narunye. Aso kapi ngava si funda nampili kanunu, nye ngasi hanagura yirongo oyo nayinye, makura tasi kara dogoro narunye.”—Ndaniyera 2:44.
Sirongo oso kuna kara Uhompa ndi epangero lyaKarunga lyemeguru. Ano Hompa ogu va horowora, Jesus Kristusa, nga gusa po vapangeli navenye nokudivilisa asi mpango zaKarunga zi sike mo pevhu ngwendi meguru. (Mateusa 6:9, 10) Epangero eli kapi ngava li pinganesera po nankenye epangero lyomuntu morwa alyo ‘Untungi wanarunye waHompa Muzowoli gwetu Jesus Kristusa.’ Ngali reta mpora zanarunye.—2 Peturusa 1:11.
KWATO HENA MAUKARELIKARUNGA GOYIMPEMPA
“NaSatana si mwene nage kulipirura, ta kara ngwendi muengeli gouzera. Eyi kapisi yokutetura, nsene asi vakereli vendi va lipirura, va lipake moukereli wouhungami. Nye uhura wawo ngau liza noyirugana yawo.”—2 Vakolinte 11:14, 15.
Maukarelikarunga goyimpempa ngava ga tura poruzera ngosiruganeso soMuzonaguli nokugagusa po. Malitondororo noyita aga ayi retesa po maukerelikarunga goyimpempa ngayi haga po. Eyi ngayi pulisira navenye ava va hara “Karunga gosili gomunamwenyo” mokumukarera ‘mepuro limwe’ ntani “moMpepo nomousili.” Ayo ngayi reta po mbili nouumwe!—1 Vatesaronika 1:9; Vaefeso 4:5; Johanesa 4:23.
EDIRO KUSIKILIRA MO LYOVANTU NGALI HAGA PO
“Karunga mwene nga kara pwawo, a kare Karunga gwawo. Ano Karunga nga kokota mahodi nagenye komeho gawo. Nomfa kapi hena ngadi kara ko, neguwo si nomalirankali nokukora kapi ngayi kara ko hena, yeeyi yininke yomuhowo yina dimi po.”—Ehororo 21:3, 4.
Jehova Karunga nga yi rugana eyi kupitira mwaMunwendi, Jesus, ogu ga ya geve eparu lyendi kovantu. (Johanesa 3:16) Kupitira mepangero lyaJesus, vantu ngava ka sikilira mo. Kapi ngapa kara nkenye ruhepo morwa “Karunga mwene nga kara pwawo” ntani nga gusa po ‘malirankali nokukora.’ Kupira kusikilira mo kovantu noruhepo ntaantani ngayi kare yininke yanare, ano “muhungami nga gusa sirongo nga tunge mo narunye-narunye.”—Episarome 37:29.
NOMPEPO DONONDONA KAPI NGADI KARA KO HENA
“[Jesus Kristusa] makura ta kwata emukongoro - emuzoka lyanare, alyo yilyo Muzonaguli, Satana - age yiyo ana li manga li kare monomango nomumvho eyovi limwe. Age makura ta li zugumine mosirongo sokonhi, ta patesesa ko sinongweneso, asi li dire kupukisa nomuhoko dogoro noku ngadi pita nomumvho eyovi limwe.”—Ehororo 20:2, 3.
Satana nonompepo donondona ngava va zugumina “mosirongo sokonhi” yipo va dire kupukisa vantu. Kapi ngava vhura hena kupangera vantu. Ngatu gwana epwizumuko lyenene mokuparuka mouzuni ou ana kudira kupangera Satana nonompepo dendi donondona!
‘MAZUVA GOPOUHURA’ NGAGA HAGA PO
‘Mazuva gopouhura’ ngaga haga posiruwo ‘soudigu wounene,’ ou ga tumbwire Jesus. Age kwa uyungire asi: “Ntani nye ngapa kara udigu wounene, ou wa dilire kukara po kutunda ketameko lyouzuni dogoro nokwanaina, wangoso hena kapi ngau kara po rumwe.”—Mateusa 24:21.
Ngapa kara udigu ou wa dira kuhoroka rumwe. Udigu ngau twaredesa ‘koyita mezuva lyenene lyaKarunga Munankondo,’ eli ava tumbura asi “Harumagedoni.”—Ehororo 16:14, 16.
Vantu ava va hara youhunga kuna kundindira nononkondo apa ngava hagekesa po uzuni ou woudona. Koneka matungiko gamwe aga gana kuvandindira mepangero lyoUhompa waKarunga.
KARUNGA NGA RUGANA YOYINZI!
“Emukurumbunga” ngali ka paruka mouzuni woupe wombili: Nonkango daKarunga kwa tumbura kuhamena “emukurumbunga” lyovantu lyava “va tunda momahepeko gomanene” ava ngava ka paruka mouzuni woupe. (Ehororo 7:9, 10, 14; 2 Peturusa 3:13) Ngava pandura Jesus Kristusa, “Nzwigona zaKarunga ezi azi gusa po nonzo douzuni,” mokuvazoworora.—Johanesa 1:29.
Mauwa gomanzi ngaga tunda kerongo lyaKarunga: Mouzuni woupe, “sirongo ngasi zura ediwo lyaHOMPA.” (Jesaya 11:9) Erongo eli lyaKarunga kwa hamena mo kugava mapukururo omu no paruka nombili novantu navenye noyikorama. Karunga kwa tumbwidira asi: “Ame nyame HOMPA Karunga goge, ogu ga hara kukuronga morwauwa waamoge a ku likide nzira ezi no genda.”—Jesaya 48:17.
Vafe ngava va pindura koufe: Apa ga kere pevhu, Jesus kwa pindwire kaume gwendi Rasarusa koufe. (Johanesa 11:1, 5, 38-44) Age kwa likidire eyi nga ka rugana ngomupangeli moUhompa waKarunga.—Johanesa 5:28, 29.
Mbili nouhungami ngayi karerere po narunye: Apa nga ka pangera Kristusa, udona kapi ngau ka kara ko hena. Ngapi omu twa yi diva eyi? Jesus nga pangura vawa novadona mouhunga morwa ga diva eyi ya kara monomutjima dawo. Owo vana kunyoka kurundurura nkareso zawo zondona kapi ngava va pulisira kukaparuka mouzuni woupe.—Episarome 37:9, 10; Jesaya 11:3, 4; 65:20; Mateusa 9:4.
Ose kuna tarurura nakauke komauporofete gamwe kuhamena mauwa gana kara komeho. Apa Uhompa waKarunga ngau tameka kupangera “mpora zonene” ngazi karerera narunye. (Episarome 37:11, 29) Nayinye eyi ayi retere vantu kukora noruhepo ngayi haga po. Ose kuvhura tu kare nehuguvaro mweyi morwa Karunga kwa tumbwidira asi: “Tara, nayinye tani yi ninki yi kare yoyipe. . . . Nonkango edi dosili dokuvhura kuhuguvara.”—Ehororo 21:5.
