SIRONGWA SOKUHOVA: MORWASINKE RUNA VHUKIRE RUHEPO? SIRUWOKE NGARU HAGA PO?
Vantu wovanzi kuna kufa!
Anand yige gelike va retere vakurona vendi. Ezuva limwe age kwa danaukisire sibaloni nakaume gwendi pepi netope. Hararasi, sibaloni tasi gwire metope ano age ta hetekere ko kusigusa mo, nye ta gwire mo makura ta fu.
Charlotte naDaniel naOlivia ntani Josephine kuna kara vamwe wovanonagona ava va royere kosure mosirongo saAmerika. Pehoreko lyawo mwa-14 Sindimba 2012, Presidente Obama kwa tumbwire madina gawo nokutantera vantu asi: “Udona wangesi wa hepa kuhaga.”
Mo-1996, Bano, mukadona gomosirongo saIraq gonomvhura 18, kwa dirukilire novakondi vendi koNorway. Ehudi, mo-22 Pembankuru 2011, Bano kwa kere gumwe govantu wokusika po-77 ava ga dipagere mugara gonyanya ogu ga likangangere asi: “Mbili tupu kapi nina vhuru kudipaga wovanzi.”
Nombudi dokulifana kwa di gava uzuni mudima. Gazadara eguwo nokukora ayi reta yiponga noukorokotji noyita nouteroriste ntani noyimpagwa yimwe hena. Vantu wovanzi kwa zumbanesa nomwenyo dawo!
Vantu vamwe kupa Karunga usima pokutanta asi Musiti gwetu kapi ga kara nosinka kovantu. Vamwe kuuyunga asi Karunga kumona ruhepo rwetu nye kapi ana hara kurugana ko yuma. Ano vamwe kuuyunga asi nkenye ogu ezuva lyendi lyonomfa va li tokora nare. Sinzi sovantu kwa kara nomagazaro gangoso. Kupi natu gwana malimbururo gokuhuguvara? Moyirongwa yokukwama ko, natu ka tara moNonkango daKarunga, Bibeli, komalimbururo kuhamena eyi ayi retesa po ruhepo ntani nomu ngava ka ru hagekesa po.
