Ame kwa kulilire moSantiago, nkurusitata zosirongo saChile, omu mwa vhukire ukorokotji neruganeso yikwepangwe. Otate kwa va dipagere ame nonomvhura dange ntano. Konyima, oyina tava ka tunga nomugara gonyanya. Age nkenye apa nga tu toona. Ame simpe kudiworoka yihorokwa oyo.

Apa na ya kere mudinkantu tani tameke kukara nonkareso zondona zonyanya unene. Ngani purakene nongaro donondona nokunwa unene, ano yikando yimwe ngani ruganesa yikwepangwe. Ngani rwanangana novarandesi yikwepangwe ava va here kudipaga nge. Sikando simwe, tava tumu muntu aya dipage nge, nye kapi ya mu tompokere, kwa remekere nge tupu nombere. Ano sikando sapeke, mbunga zawo kwa likire nge uta nokuhara kudipaga nge.

Mo-1996, tani hehe mukadi gedina Calorina, ano mo-1998 tava tu kwareke. Apa twa retere mbeli zetu, na kere noutjirwe asi nampo nani fana otate wositumbwena nokuhepeka epata lyange morwa nkareso zange zonyanya. Makura tani papara evatero kosipangero sokuwapukurura nkareso zovantu wovadona. Na gwene nomutji nouhaku nye kapi ya vaterere. Kapi ngani vhuru kupangera ehandu lyange, ngani handauka-handauka nampili yininke yoyinunu. Morwa kudira kuhara kukoresa epata lyange, tani hetekere ko kulidipaga. Nye kapi ya tompokere nge.

Nomvhura dononzi ame kapi na pulire mwaKarunga, nye na here kupura mwendi. Makura tani lipakerere nongereka zimwe. Ano siruwo sooso, mukadange nga lirongo Bibeli noNombangi daJehova. Ame kwa nyengere Nombangi, ano rorunzi ngani va tugumukire nonyanya. Nye awo ngava limburura nge nombili, nye kapisi yimo na yi ndindilire.

Ezuva limwe, Carolina ta pura nge ni rese mEpisarome 83:18 moBibeli zange. Velise ozo kutanta asi edina lyaKarunga, Jehova. Ayo kwa tetukisire nge, morwa kongereka zetu nga tu lirongo kuhamena Karunga, nye kapisi Jehova. Ketamekero lyomvhura 2000, tani tameke kulironga Bibeli noNombangi.

Ngamoomu na twikilire kutura po ezokomeho, ame na gwene ehengagwido pokulironga asi Jehova age Karunga gonkenda ntani kugusira po. Pasihonena, mwaExodus 34:6, 7, kusingonona Jehova asi “Karunga goMufenkenda, age Karunga gombili noMudidimiki. Uwa wendi unzi, age Mulimburukwi. Age kufira nkenda dogoro koruvharo romayovi, a dongonone po udona nomayipiko nononzo.”

Nampili ngoso, kapi ya kere ureru kutura pasirugana eyi ngani lirongo. Ngani lizuvhu asi kapi ngani vhura kupangera ehandu lyange. Nkenye apa ngayi dili kutompoka nge, Carolina nga korangeda nge neharo. Age nga diworokesa nge asi Jehova kuna kumona elituromo lyange. Ekorangedo lyendi ngali pe nge nonkondo mokutwikira kukarera Jehova, nampili ngomu ngani lizuvhu asi na zumbana.

Ezuva limwe, ogu nga rongo nge Bibeli, Alejandro, kwa pulire nge ni rese moVagarata 5:22, 23. Velise ozo kutanta asi yiyimwa yompepo zaKarunga yiyo “eharo nehafo nombili nezaverero nounongo nouwa noulimburukwi, nougomoki nelipangero.” Alejandro kwa fatwilire asi mokutunga po yikara oyo pwa hepere mpepo zokupongoka zaKarunga, nye kapisi nonkondo danyamwange. Oyo ya va vaterere nge ni huguvare mononkondo daJehova kapisi danyamwange!

Konyima zosiruwo tani ka ponga posigongi simwe soNombangi daJehova. Ngendeseso noukuhuki ntani ukareli ou na ka mwene kwa nkondopekere nge asi na gwana ukarelikarunga wousili. (Johannesa 13:34, 35) MwaMurongankuru 2001 na gwene ekuho.

Jehova kwa rundurura ukaro wange nokuninka nge mugara gombili. Ame kulizuvha asi age kwa gusa nge mo mosiraha esi sa kwete nge. Vantu wovanzi kwa nyengere nge, ano kapi tani va pe usima. Nye ngesi, ame kuna kuhafera kukarera Jehova mombili kumwe namukadange novana vetu wovamati vavali.

Ekoro lyange novakaume vange vanare kapi vana kuyipura asi na tura po marunduruko. Ngoyitundwamo, vamwe mo va likida eharo lyokulironga mausili gomoBibeli. Ntani name na vatera vamwe va dive Jehova. Ayo ya hafesa nge pokumona omu mausili goBibeli gana kurundurura eparu lyawo!