NOMVHURA dongandi da ka pita mosirongo simwe vagara vavali kwa va pere usima wedipago makura tava va tokwere nomfa. Konyima zosiruwo tava ya yi nongonona asi kwa va rundilire, makura vahahende yipo va yi konakonene hena. Gumwe tava mu pwagesa mo modorongo nye gumwe kapi va vhulire kumuvatera morwa va mu dipagere nare.

Monompanguro yininke yangoso kuhoroka, yiyo Bibeli azi korangedere asi: ‘Nokufoferera si, nye narunye omu kare mousili.’ (Deuteronomium 16:20) Nsene vapanguli va dira kufoferera yininke, vantu kugwanena mo uwa. Karunga kwa geve Veta koVaisraeli mokupangura pauhungami. Tu zeni tu konakone Veta ozo tu tare nsene nayinye eyi a rugana Karunga ‘kwa vyuka ntani ya hungama.’—Deuteronomium 32:4.

Nsene nompanguro kudigendesa pauhunga pa hana malitondororo, vantu kugwanena mo uwa. MoVeta ezi Karunga ga pere Vaisraeli kwa nkondopekere mulyo gokupangura pauhunga. Mosesa kwa mu tanterere a horowore “vagara mombunga ava va kara nounongo, awo hena kwa tjira Karunga” va kare vapanguli. (Exodus 18:21, 22) Konyima zonomvhura 40, Mosesa kwa ya nkondopekere hena asi vagara “wovakonentu wovanandunge wovakoli moyikara” va kare vapanguli.—Deuteronomium 1:13-17.

Konyima zonomvhura mafere, hompa Jehosafata * goVajuda kwa pangererere vapanguli asi: “Omu takamese mokupangura kweni; one kapisi nonkondo dosintu omu ruganesa, nye nani nonkondo daHOMPA, age ta kara pweni nsene tomu tokora yuma. Omu tjire HOMPA tomu rugana nawa, yeeyi HOMPA Karunga gwetu kapi a tarerere yimpempa ndi malitondororo ndi kugusa yuma moufutunkume.” (2 Histoli 19:6, 7) Jehosafata kwa diworokesere vapanguli asi nsene va kara nelitondororo noufutunkume pokupangura, Karunga nga va pa usima.

Apa vapanguli woVaisraeli ngava sikisa mo veta ozo, muhoko gwawo kwa kere mompora. Nye Karunga kwa pere hena vapanguli noveta dimwe edi da vhulire kuvavatera va pangure pauhunga nampili momaukaro goudigu. Noveta musinke odo?

Nampili ngomu vapanguli va hepere kukara wovakonentu wovanandunge, kapi va va pulisilire va ruganese magano gavene. Jehova Karunga kwa va pere noveta ndi mavyukiso aga va vhulire kukwama va ture po matokoro gomawa. Aga yigo mavyukiso gamwe va geve kovapanguli woVaisraeli.

Kukonakona nawa. Karunga kwa tanterere vapanguli woVaisraeli kupitira mwaMosesa asi:  “Omu purakene nomutangu edi dina kutunda mombunga zovantu veni, pangureni nawa nkenye nkango.” (Deuteronomium 1:16) Mokuninka asi vapanguli va ture po etokoro lyewa va hepa tanko kugwana mauzera nagenye. Eyi yiyo Karunga ga tantererere vapanguli asi: “Sihorokwa sangoso, nsene muna si zuvhu asi sosili, si konakoneni nawa-nawa.” Komeho va ka pangure va hepere ‘kukonakona nawa-nawa’ nsene asi sihorokwa oso sosili.—Deuteronomium 13:14; 17:4.

Kupurakena komaumbangi. Mompanguro mwa kere hepero di kare mo nombangi. Veta zaKarunga kwa tente asi: “Umbangi wagumwe tupu kapi au gwanene mokukoreka eheto komuntu asi munzoni, ntudi pa kare nombangi mbali edi dina kuyizeresa nawa-nawa, asi muntu ogo munzoni.” (Deuteronomium 19:15) Kuhamena nombangi, Veta zaKarunga kwa geve mpangera asi: “Walye o hanesa yininke ya hana kuzira mo. Walye o popere vanzoni, makura umbangi woge ngau tware udona komeho.”—Exodus 23:1.

Kugava umbangi wosili. Eli yilyo erondoro va geve nsene o gava umbangi woyimpempa asi: “Vapanguli va konakone nawa nonkango edi. Ano nsene asi muntu kuna rundire mawoko-woko Muisraeli mukwawo, age a gwane mfuto, ezi nkare a gwane ogu ana rundire. Ngesi yimo nye nomu yoworoka koudona owo.” (Deuteronomium 19:18, 19) Nsene muntu a kumbagera mompanguro morwa ana hara kugusa yiweka yamukwawo, va hepere kumufutisa kuliza neyi nkare a guse. Nsene a kumbagera mompanguro yipo a dipagese muntu gokudira nzo, nage va hepere kumudipaga. Mpangera ezi kwa tumangedere vantu va uyunge usili mompanguro.

Kupangura pwa hana malitondororo. Konyima zokugwana mauzera nagenye, vapanguli ngava tura po etokoro. Kombinga zokutura po etokoro,  Veta zaKarunga kwa pangerere asi: “Walye omu hama konohepere ndi mu tjire nongawo.” (Levitikus 19:15) Momaukaro nagenye, vapanguli va hepere kupangura pausili, kapisi kutara kemoneko lyomuntu ndi eyi ga weka.

Noveta edi ga geve Karunga koVaisraeli kuvhura kudiruganesa monompanguro danaina. Nsene va di kwama, awo ngava pangura pauhunga.

Mosesa kwa tanterere Vaisraeli asi: “Kutupu muhoko peke, nampili gu nenepe ngapi, ogu gwa kara noyipango, yi lifane nawa-nawa neyi nina mu rongo naina.” (Deuteronomium 4:8) Muhoko goVaisraeli gwelike gwa gwanenene mo uwa moyipango yaKarunga. Apa hompa Saromo ga kweme noveta daJehova moudinkantu wendi, vantu vemepangero lyendi “kwa kere mompora” ntani “ngava li tava nu, tava hafa.”—1 Vahompa 4:20, 25.

Nye konyima Vaisraeli va ya nyokere noveta daKarunga. Kupitira momuporofete Jeremiya, Karunga kwa tente asi: “Awo kwa nyoka nonkango dange, unongo musinke nye ou vana kara nawo ntaantani?” (Jeremiya 8:9) Ngoyitundwamo, sitata saJerusarema tasi zura “varudipagi” ntani noyininke “yoyihuna.” Moruhura sitata oso tava si zonagura tasi ya kara erunda nomvhura 70.—Hesekiyeli 22:2; Jeremiya 25:11.

Muporofete Jesaya kwa parukire posiruwo apa Vaisraeli va kere nomaudigu gomanzi. Age ga vhulire kuuyunga usili kuhamena Jehova Karunga nonoveta dendi asi: “Apa ngo pangura uzuni novantu vamo, navenye ngava lirongera mo asi uhungami yinke.”—Jesaya 26:9.

Jesaya kwa ya mu ruganesere a pumbe kuhamena epangero lyaJesus Kristusa, Hompa goUmesiyasa asi: “Age kapi nga pangera moomu gana kumona meho gendi ndi yonguwire; nohepwe nga di pangura pauhunga ano valinunupiki vepevhu nga va tokwera nawa.” (Jesaya 11:3, 4) Ee, meho musi zina kundindira owo nga ka pangera Hompa goUmesiyasa moUhompa waKarunga!—Mateusa 6:10.