Apa na kere nonomvhura 14 yipo va tumine nge kosure oku na ka kere mohostera moNdovesiranda. Eyi kwa ninkisire nge ni lipakere mbili nokulihuguvara nyamwange morwa vakurona vange kwa kere ure. Ame ngani rugana yeeyi na here kapi na kere nosinka omu ngayi kundama wopeke.

Apa na kere nonomvhura 17 vakurona vange yipo va tengwire koNdovesiranda. Yipo twa tungire hena kumwe. Nye morwa na yikire kulipangera nyamwange kapi na vhulire kutunga hena novakurona vange, makura apa na kere nonomvhura 18 yipo na dirukire mo membo.

Konyima tani ya kara muntu goruguwo yipo na tamekere kupapara ruhafo meparu. Apa na mwene nombunga politika dokulisiga-siga nonomparukiso dovantu yipo na tokwere asi tani ruganesa eparu lyange mokukonakona unsitwe komeho vantu ngava u zonagure po.

Yipo na rende simoto sange nokutokora kuza koAfrika. Konyima zokaruwogona na ka tengwire hena koNdovesiranda mokukawapaikisa simoto sange. Kutunda opo yipo na zire kezenga lyomosirongo saPortugal. Makura tani hageke kuruganesa simoto nokuruganesa sikepa.

Yipo na lipakerere kumwe novadinkantu ava va here kuruta efuta lyaAntlatika. Mombunga ozo yimo na gwene Laurie mukadona ogu na ya kwere. Pomuhowo ose kwa zire poyirudi yaCaribbean. Tatu kara karuwogona moPuerto Rico ano konyima tatu tengura koEuropa. Ose kwa here tu gwane sikepa sanyamwetu tu si ruganese mokulihafesa. Nye kapi ya tu tompokere morwa kwa zigidire nge koukwayita waNdovesiranda.

Moukwayita owo ame kwa rugene mo mvhura nomakwedi gatatu. Makura yipo twa likwere naLaurie ntani  tatu twikire neparu lyetu lyokugendagura. Komeho tupu ni kare mukwayita ose kwa rende sikepagona. Apa na kere moukwayita twa tamekere kuwapaika sikepa oso nokurandera mo eyi ya hepere mo. Ose kwa here asi ngano tu tunge mo makura tu gendagure mwa za yirongo nokukonakona unsitwe. Komeho tu manese kutunga sikepagona setu twa ligwanekerere kumwe noNombangi daJehova makura yipo twa tamekere kulironga Bibeli.

Nye na yi dimbwilire asi na hepere kutura po marunduruko monkareso zange. Ame kwa lihuguvarere unene morwa udivi ou na kere nawo neyi na tompwere meparu. Ngani ligazara tupu nyamwange.

Ezuva limwe yipo na resere nonkango daJesus edi ga uyungire pEudiso lyopondundu. (Mateusa, egaununo 5-7) Pomuhowo kapi na yi kwete egano eyi ga uyungire Jesus kuhamena ruhafo. Pasihonena age kwa tente asi wokuhafa vaava ava fu nzara nenota. (Mateusa 5:6) Kapi na divire omu muntu gokuhepa na gwana hena ruhafo. Ngomu na twikilire kulironga Bibeli na ya dimbwilire asi natuvenye twa kara noyihepwa yopampepo eyi twa hepa kusikisa mo nye pomuhowo twa hepa kuyidimburura. Jesus ga tente asi: “Vehafo vaava ava nongonona yihepwa yawo yopampepo”—Mateusa 5:3, NW.

Apa twa tamekere kulironga Bibeli moNdovesiranda yipo name naLaurie twa dirukilire koFransa ano konyima koItaliya. Nkenye oku twa zire twa ka gwene Nombangi daJehova. Eharo nouumwe ou va kere nawo kwa tetukisire nge. Na yi nongwene asi Nombangi kwa kara mouumwe mouzuni mudima. (Johanesa 13:34, 35) Makura konyima name naLaurie tatu ya gwana ekuho.

Konyima zekuho ame kwa twikilire kutura po marunduruko monkareso zange. Laurie name yipo twa tokwere kuza nosikepa setu koAfrika ntani koAmerika. Apa twa kere tuvavali mokatji kefuta na nongwenene unene woMusiti gwetu. Morwa na kere nosiruwo sosinzi pokuruta efuta yipo na litulire mo unene mokuresa Bibeli. Apa na resere eparu lyaJesus lyepevhu kwa tetukisire nge. Age kwa kere muntu gokusikilira mo ntani nediwo lyenzi nye kapi ga li ruganesere mokulipaparera mfumwa. Nye age kwa tokomenene kurugana mpango zoGuhwe vemeguru.

Ngomu na tedere ko kosihonena saJesus na yi dimbwilire asi na hepere kutura muhowo Uhompa meparu lyange. (Mateusa 6:33) Apa twa ka sikire moAmerika yipo twa tokwere kuhageka kugendagura nokutunga mosirongo oso tu liture mo mokukarera Jehova.

Ose ngesi tuna kara nononkwara doruhafo morwa kukwama nompango doBibeli. Ose kwa tu tungika mokukara nomunona gomukadona ogu ga hara Jehova.

Nose twa ligwanekera nomaudigu meparu. Nye nevatero lyaJehova ose tuna tokomene mokutwikira ngorooro kumukarera nokumuhuguvara.—Yisewe 3:5, 6.