JOSEFA kuna kara nkwate, kuna kumutwara kosirongo sokoure. Age kuna kumusinga varugendanzira ava va mu rende. Josefa kuna kufumbwira edumba lyonombya morwa kuna kugenda konontere domukuro gwaNili. Tava piti monodoropa dokulisiga-siga doVaegipite nye magazaro gaJosefa ure gana kara, age kuna kugazara sirongo sawo Heburoni.

Vansima kuna kutakuma oku tava vatauka koyitji. Vantu kuna kuuyunga nye Josefa kapi ana kuzuvha nawa eraka lyawo. Ta hetekere ko kukwata egano nonkango dimwe vana kutumbura. Ga hepa kulironga eraka olyo morwa kapi nga tengura hena kosirongo sawo.

Posiruwo oso, Josefa kwa kere nonomvhura 17 ndi 18, nye kwa pitire momaudigu aga naga vhura kudompesa nampili vakurona. Oguhwe kwa mu here unene, ano vakuru vendi tava mu fire mfudu nkare va mu dipage nye tava mu randesa po. (Genesis 37:2, 5, 18-28) Apa va sikire pepi nositata vagara ava va rende Josefa nampo kwa hefe morwa va divire asi tava ka mu randesa po ponsonso zonzi. Yisinke ya vaterere Josefa a dire kuzumbanesa ehuguvaro ndi a dompe unene komutjima? Yisinke nayi tu vatera tu dire kupulisira maudigu ga zonagwise po epuro lyetu? Tatu ka lirongera ko yoyinzi kosihonena saJosefa.

“Josefa makura tava mu twara koEgipite. Ano mugara goMuegipite, erenga lyekurona lyovakungi vaFarawo, tali mu randa po koVaisimayeli ava va mu retere.” (Genesis 39:1) Bibeli kuna kutuvatera tu kwate egano nomuga edi ga lizuvhire Josefa apa va ya mu randesere rwauvali. Age kwa kere ngwendi siweka tupu. Josefa ta zi kumwe nerenga lyoVaegipite eli lya mu rende, tava piti mononzira da zulire vantu wovanzi nopomarandesero va ze kembo.

Membo eli va mu twere Josefa kwa lisigire noku ga kulilire. Epata lyoJosefa kwa tungire monotenta, ngava dirauka-dirauka ntani awo kwa kere vasita wononzwi. Nye Potifara erenga lyoVaegipite kwa tungire momakuma gokufuura. Vakonakoni kwa tanta asi Vaegipite kwa here mparukiso zongwa, yipata yomakuma noyitji yonomundwire donongwa ntani nomadiva omu ngava tapeke yitji yokulisiga-siga. Mambo gamwe kwa kere nomaharango gomanene goyipata  omu no vhura kugendagura o peperere ko ntani nononzugo dononzi dokurara dimwe dokulira ntani dimwe dovapika.

Josefa nampo ya mu tetukisire eyi ga mwene. Nye simpe ga lizuvhire mukuma. Vaegipite ngava uyunga eraka lyapeke ano ndwareso nomaliwapaiko gawo noukareli wawo wa lisigire neyi ga divire. Awo ngava karere yikarunga yokulisiga-siga nokulihameka mourodi nomafweno ntani kwa tjilire vafe nokupura asi vafe kukaparuka hena kosirongo sapeke. Poyili yimwe ya vaterere Josefa gu dire kumulya mukuma. Bibeli kutanta asi: “HOMPA pwendi ga kere.” (Genesis 39:2) Josefa nga kanderere kwaKarunga. Bibeli kwa uyunga asi: “Age kwa kara pepi nava navenye ava mu zigida.” (Episarome 145:18) Yisinke hena ya vaterere Josefa a hede pepi naKarunga?

Josefa kapi ga lisigilire a dompe mutjima nye kwa litulire mo unene mosirugana sendi. Makura Jehova ta mu tungike ano muhona gwendi ta mu hafere. Potifara ga yi dimbwilire asi Jehova Karunga kwa tungikire Josefa, ano oyo kwa reterere ungawo membo lyendi. Potifara kwa pende yirugana yaJosefa dogoro ta mu tura a kare mupangeli gembo nemona lyendi nalinye.—Genesis 39:3-6.

Josefa ga tura po sihonena sosiwa kovadinkantu ava vana kukarera Karunga. Pasihonena, kosure awo kukara novantu ava ava lihameke moumpure wokukondjera emona ntani wokudira ehuguvaro. Nsene o ligwanekera noukaro owo, diworoka asi Jehova kapi ga runduruka. (Jakopo 1:17) Age kwa kara pepi nava ava mu limburukwa ntani ava ava kondjere kumuhafesa. Age kuvatungika ntani nove nga ku tungika.

Mwa za siruwo, Josefa ta ya kuru ta kara “norutu roruwa nosipa sosiwa.” Kukara norutu nosipa sosiwa pamwe kureta maudigu.

Josefa kwa kere mulimburukwi, nye kapisi mukadaPotifara. Bibeli kutanta asi: “Mukadahekurwendi meho kooko kwaJosefa, makura ta mu ninki asi: ‘Tu rare.’” (Genesis 39:7) Josefa ga gwililire mezedo lyomukadi ogo ndi? Bibeli kapi za uyunga asi Josefa kapi ga kere nomadowo aga ava ligwanekere nago vadinkantu ndi  asi mukadaPotifara kapi ga kere norutu nosipa sosiwa. Josefa kapi ga gazarere asi kuvhura tupu a rare nogo mukadi morwa muhona gwendi kapi nga yi diva. Ntani kapi lya mu kokere emona eli ga kere nalyo ogo mukadi.

Kapi tatu diva eyi ga gazarere Josefa. Nye elimbururo lyendi kwa likida eyi ya kere komutjima gwendi asi: “Tarenisi, hekurwange kapi ana kupakera ko hena mbili kweyi yemembo morwange, nayinye eyi ga weka, mwange ana yi gava. Age kapi ga paka epangero membo omu lyokupita lyange, age hena neisi ga silika ntudi nyovelike, morwa ove mukadendi. Ngapi omu nani rugana-rugana udona wa hura opo, ni zone kwaKarunga gwange!” (Genesis 39:8, 9) Gazara tupu omu ga lizuvhire Josefa apa ga uyungire nonkango odo. Age kwa lizuvhire kukora komutjima kugazara kurugana udona wangoso. Morwasinke?

Potifara kwa pere Josefa nonkondo dokupakera mbili nayinye eyi ga wekere kugusa ko mukadendi. Josefa kapi ga here kuteza po veta zomuhona gwendi. Nye pwa kere konda zomulyo zeyi ga nyokerere kuyirugana, kapi ga here kuzona kwaKarunga gwendi, Jehova. Vakurona vaJosefa va mu rongere omu Karunga a tara nonkwara noruhonda. Apa Jehova ga kwarekere vantu wokuhova, age kwa va harere va kare “gumwe tupu.” (Genesis 2:24) Pasihonena, Karunga kwa handukilire vagara ava here kugusa mukadaAbirahamu. (Genesis 20:1-3; 26:7-11) Josefa ga lirongerere ko kosihorokwa oso ntani ga here kukara mulimburukwi.

MukadaPotifara ga handukire apa Josefa, mupika, ga mu tantere asi kapi ta vhuru kurugana “udona wa hura opo.” Nye morwa kukora komutjima, age ga twikilire kusininika Josefa asi nampo na rundurura magano gendi. MukadaPotifara kwa likidire nkareso zaSatana ogu ga zedere Jesus. Satana ya mu sumpilire, makura ta “tundu po tanko” pwaJesus. (Rukasa 4:13) Vantu wovalimburukwi va hepa kukwaterera ketokoro lyawo. Yiyo ga rugene Josefa, nampili ngomu mukadi ogo nga mu kondjesa “nkenye ezuva.” Bibeli kwa tanta asi: ‘Kapi ga mu gomokere.’ (Genesis 39:10) Nye mukadaPotifara kwa twikilire ngorooro kukondjesa Josefa.

Ezuva limwe vakareli kapi va kere mo membo, ano mukadaPotifara ga yi divire asi Josefa na wiza a ya rugane. Apa Josefa ga wizire monzugo, ogo mukadi ta mu dodere kerwakani nokumulikwambera asi: “Tu rare.” Age ta ndundana nye mukadi ta dodere merwakani. Makura Josefa ta pweka mo ta ka duka.—Genesis 39:11, 12.

Eyi ga rugene Josefa kutudiworokesa epukururo lyaPaurusa asi: “Nyokeni ruhonda!” (1 Vakolinte 6:18) Josefa kwa tura po sihonena sosiwa koVakriste. Kuvhura tu kare monkarapamwe novantu ava ava dili kufumadeka noveta daKarunga, nye kapisi tu honene nkareso zawo. Yi kare asi yitundwamo musinke twa hepa kuzinyokera po.

MukadaPotifara kwa here kutengeka Josefa. Makura ta zigire nokuzigida vakareli vemembo. Ta va tantere asi Josefa nkare a mu kwatere kononkondo apa ana tameke kuzigira yiyo ana duka. Ta kwata erwakani lyaJosefa a ndindire mugara gwendi. Apa Potifara ga ya sikire, mukadendi ta mu tantere yimpempa kuhamena Josefa makura ta pe usima mugara gwendi kweyi ga reta mupika ogo membo. Yisinke ga rugene Potifara? Bibeli kutanta asi: “Ta handuka unene.” Ta kwata Josefa nokumutwara modorongo.—Genesis 39:13-20.

Kapi twa diva omu da fene nodorongo doVaegipite mosiruwo sina. Vakonakoni kwa gwene mavango gonodorongo demevhu. Nkango ‘dorongo’ ezi ga ruganesere Josefa kwa tembe kevango lyomundema. (Genesis 40:15) Episarome  kulikida asi Josefa kwa hepere modorongo morwa “nompadi dendi kwa di zwekere mokakunzu, makura tava mu manga nomalyenge.” (Episarome 105:17, 18) Vaegipite pamwe ngava manga vanadorongo pokutengwida mawoko gawo konyima nokuvamangera mononkokona ano vamwe ngava va pandeke yivera monsingo. Josefa kwa mu tekwire monkedi ozo zondona, nampili ngomu ga dilire kurugana epuko.

Bibeli kutanta asi Josefa kwa mu “zedililire modorongo.” Ayo kulikida asi age kwa kere mevango olyo nomvhura dononzi. * Ntani kapi ga divire asi ngava mu pwagesa mo. Apa ga kere yivike noyivike, makwedi nomakwedi, yisinke ya mu vaterere a dire kuzumbanesa ehuguvaro?

Bibeli kwa tanta asi: “HOMPA pwaJosefa ga kere, ta mu ragopeke.” (Genesis 39:21) Kwato yokukondera Jehova mokulikida vakareli vendi eharo, yi kare asi modorongo ndi kuna va manga. (Varoma 8:38, 39) Gazara tupu omu Josefa ga kanderere koGuhwe nokuvalikwambera makura ta gwana mbili zomomutjima ezi a gava ‘Karunga ogu a tu kwafa.’ (2 Vakolinte 1:3, 4; Vafilipi 4:6, 7) Yisinke hena Jehova ga ruganenene Josefa? Bibeli kulikida asi ta “hameke mutjima gomukurona godorongo” kwaJosefa.

Vanadorongo ngava rugana, ano Jehova kwa tungikire yirugana yaJosefa. Age nga sikisa mo nkenye sirugana ngava mu pe. Jehova kwa tungikire Josefa ngwendi apa ga kere membo lyaPotifara. Bibeli kutanta asi: ‘Nonkwate nadinye edi da kere modorongo, mukurona godorongo tadi gava mepangero lyaJosefa, nkenye eyi yokuhepa kurugana mo, yige nga yi rugana. Ogo mukurona godorongo kapi nga ninki hena asi a pakere ko mbili kweyi ga geve momawoko gendi, morwa HOMPA pwendi ga kere. Age hena nkenye eyi nga rugana, HOMPA ta yi wapeke.’ (Genesis 39:22, 23) Josefa ya mu hengagwidire pokumona asi Jehova kwa mu pakerere mbili.

Kuvhura tu ligwanekere nomaudigu gomanene, nye epuro lyaJosefa kuvhura kutuvatera. Jehova nga tu tungika nsene tu kanderera kwendi nokulimburukwa noveta dendi nokurugana unene eyi ayi mu hafesa. Jehova ga tungikire hena Josefa momunene ngomu nga tu ka yi mona moyirongwa eyi ngayi kwama ko.