Vakaume wovanene kuuyunga nkenye apa, pamwe kupitira moterefona ndi kulitjangera nombilive. Ya lifana, mokukara kaume kaKarunga twa hepa kuuyunga nendi nkenye apa. Ngapi natu yi rugana?

Ose kuuyunga naJehova kupitira mekanderero. Nye kapi ya lifana ngwendi moomu atu simwitire nakaume ketu. Pokukanderera twa hepa kudiworoka asi ose kuna kuuyunga noMusiti gwanayinye. Twa hepa kuuyunga nage nefumadeko. Pwa kara yihepwa yitatu eyi twa hepa kusikisa mo nsene tuna hara Karunga a zuvhe makanderero getu.

Sokuhova, twa hepa kukanderera tupu kwaJehova, nye kapisi kwaJesus ndi kwaMariya ndi mafano. (Exodus 20:4, 5) Bibeli kutanta asi: ‘Momakanderero geni omu hundire nkenye eyi muna hepa kwaKarunga.’ (Vafilipi 4:6) Sauvali, twa hepa kukanderera kupitira medina lyaJesus Kristusa, MunwaKarunga. Jesus kwa tente asi: ‘Nagumwe si a wiza kwaTate, age ga hana kupitira pwange.’ (Johanesa 14:6) Sautatu, twa hepa kukanderera kuliza nompango zaKarunga. Bibeli kutanta asi: ‘Ta tu zuvhu ntene tu mu hundira eyi yokuliza nompango zendi.’ *—1 Johanesa 5:14.

Ukaume kapi ngau tompoka nsene gumwe tupu a uyungisa mukwaawo. Ya lifana, nose twa hepa kupurakena kwaKarunga apa a tu uyungisa. Ngapi omu a tu uyungisa?

Jehova Karunga kutuuyungisa kupitira moNonkango dendi, Bibeli. (2 Timoteusa 3:16, 17) Pasihonena: Apa o resa mbilive ana kutjangere mukweni, to lizuvhu ngwendi nage ono kuzogera. Ya lifana, apa atu resa Bibeli ose kuna kupurakena kwaJehova. Gina tuna tumbura mosirongwa sokuhova kwa tanta asi: “Nsene nina hara Karunga a kare kaume kange, na hepa kuresa mbilive ezi ga tu pa, Bibeli.” Ta gwederere ko asi: “Kuresa Bibeli nkenye ezuva ya hedesa nge pepi naKarunga.” Nove kupulisira Jehova a ku uyungise nkenye ezuva pokuresa Nonkango dendi, Bibeli ndi? Nsene o yi rugana, ngayi ku vatera o hede pepi naKarunga.