Timo: Ngapi Jona? Nina hafa kukumona hena. Ame kuhafera kuzogera nove Bibeli nkenye sivike. *

Jona: Ni muwaawa tupu.

Timo: Nawa ngoso. Sivike sina katu ya zogerere eyi Nombangi daJehova twa pulira asi Uhompa waKarunga kwa tamekere kupangera mo-1914. * Twa gwene umbangi mouporofete va tjanga mwaNdaniyera egaununo 4. To diworoka uporofete owo ndi?

Jona: Kuhamena nzodi zahompa Nebukadenesara zetji lyenene.

Timo: Yimo. Nebukadenesara kwa mwene monzodi etji lyenene eli lya kulire dogoro tali ka twa keguru. Age kwa zuvhire muengeli gwaKarunga kuna kugava mpangera asi va komangere etji olyo, nye sisindi va si sige mevhu. Konyima ‘zonomvhura ntano-nambali’ sitji tasi ya kuru hena. * Katu zogerere hena asi uporofete owo kwa kara nomasikiliromo gavali. To diworoka esikiliromo lyokuhova ndi?

Jona: Kwa horokerere Nebukadenesara apa ga zumbanesere nondunge dendi nomvhura ntano-nambali.

Timo: Yimo. Nebukadenesara kwa zumbanesere nondunge dendi makura upangeli wendi tau haga po tanko. Mesikiliromo lyauvali, upangeli waKarunga kwa hege po tanko ure wonomvhura ntano-nambali douporofete. Katu zogerere hena asi nomvhura ntano-nambali odo kwa tamekere apa va zonagwire Jerusarema mo-607 komeho zokuwiza Jesus pevhu. Kutunda opo kapi pwa kere hena vahompa pevhu ava va karerere po Jehova Karunga mokupangera vantu vendi. Nye apa da ya hege nomvhura odo, Karunga kwa tulire po Mupangeli gomupe meguru a pangere vantu vendi. Kulikida asi apa da ya hege nomvhura odo yipo wa tamekere kupangera Uhompa waKarunga meguru. Katu zogerere hena apa da tamekere nomvhura ntano-nambali. Nsene tu diva siruwo esi da gusire nomvhura odo douporofete, makura natu diva mvhura ezi wa tamekere kupangera Uhompa waKarunga. Ono yi kwata egano ndi?

Jona: Yimo, erugururomo lina vatere nge ni diworoke eyi twa zogerere.

 Timo: Nawa ngoso. Tu konakone siruwo esi da gusire nomvhura ntano-nambali douporofete. Nina resa kuhamena sirongwa esi. Nani hetekera ko kukufatwilira eyi nina diva ko.

Jona: Nawa tupu.

Timo: Mesikiliromo lyokuhova kuhamena eyi ya horokerere Nebukadenesera kwa gusire nomvhura ntano-nambali. Nye mesikiliromo lyauvali kuhamena Uhompa waKarunga kwa gusire nomvhura dononzi kupitakana ponomvhura ntano-nambali.

Jona: Ngapi nayi kara ngoso?

Timo: Diworoka asi nomvhura ntano-nambali douporofete kwa tamekere apa va zonagwire Jerusarema mo-607 komeho zokuwiza Jesus pevhu. Nsene tu tamekere kuvarura kutundilira momvhura ozo, nomvhura ntano nambali tadi tu twara komvhura 600 komeho zokuwiza Jesus pevhu. Nye kwato yomulyo eyi ya horokere momvhura ozo kuhamena upangeli waKarunga. Ngwendi moomu twa yi zogerere, apa Jesus ga kere pevhu age ga likidire asi nomvhura ntano-nambali odo simpe kapi da hege.

Jona: Tani yi diworoka.

Timo: Yipo nye nomvhura ntano-nambali odo kapi da fanekesa nomvhura dene-dene nye nomvhura douporofete.

Jona: Nomvhura dingapi?

Timo: Buke zEhororo ezi za likwatakana nobuke zaNdaniyera kutuvatera tu dive siruwo esi da gusire nomvhura ntano nambali douporofete. Azo kwa likida asi nomvhura ntatu noukahe kwa fanekesa mazuva 1 260. * Pokugwederera nomvhura ntatu noukahe hena, kutanta asi mazuva 1 260, kusika ponomvhura ntano nambali, ndi mazuva 2 520. Ono yi kwata egano?

Jona: Nhi. Nye kapi yina kulikida asi Uhompa waKarunga kwa tamekere kupangera mo-1914.

Timo: Tanko tu tare omu ya likwatakana. Pamwe, moBibeli ezuva limwe kufanekesa mvhura zimwe. * Nomvhura ntano-nambali douporofete kwa fanekesa nomvhura 2 520. Nsene tu tamekere kuvarura kutundilira mo-607, nomvhura 2 520 tadi tu twara komvhura 1914. * Yimo twa ya gwene mvhura 1914 apa da hege nomvhura ntano-nambali douporofete, ano yipo ga tamekere kupangera Jesus ngaHompa goUhompa waKarunga. Kutundilira mo-1914, yipo ya tamekere kuhoroka yirohokwa yoyinene eyi za pumbire Bibeli eyi ngayi horoka pomazuva gopouhura.

Jona: Yihorokwa musinke?

Timo: Tara eyi ga uyungire Jesus mwaMateusa 24:7. Jesus kwa tumbwire eyi ngayi horoka apa nga tameka kupangera meguru asi: “Nomuhoko ngadi lilimba-limba, ano yi kare yirongo, nayo ngayi lilimba-limba. Napenye ngapa kara marumbu nomakankamo gevhu.” Jesus ga pumbire asi ngapa kara marumbu nomakankamo gevhu. Ose kumona yininke oyo kuna kuhoroka mouzuni.

Jona: Awe, yimo.

Timo: Movelise ozo Jesus ga pumbire asi ngapa horoka yita pekaropo lyendi ngaHompa goUhompa waKarunga. Buke zEhororo kwa pumbire asi  yita oyo ngayi horoka mouzuni mudima. * To diworoka apa ya horokere yita yokuhova youzuni ndi?

Jona: Nhi, mo-1914, mvhura ezi ono tanta asi Jesus ga tamekere kupangera! Kapi na yi gazara rumwe ngoso.

Timo: Pokukonakona uporofete wonomvhura ntano-nambali nomauporofete gamwe gomoBibeli, yiyo ya vatera Nombangi daJehova di pure asi Jesus kwa tamekere kupangera mo-1914, ntani mazuva gopouhura kwa tamekere mvhura zoozo. *

Jona: Kwa kuhara kuyikwata egano.

Timo: Ngwendi moomu na ku tanterere, name kwa gusire nge siruwo mokuyikwata egano. Na si huguvara asi nzogera zetu zina ku vatere o kwate egano asi nampili ngomu mvhura 1914 va dira kuzitumbura moBibeli, eyi twa pura ose Nombangi daJehova kuhamena mvhura ozo kwa tunda moMatjangwa.

Jona: Yimo, morwa nkenye eyi o uyunga ove kuyikwatesa ko matjangwa. Kapi o uyunga magano ganyamoge. Nye morwasinke Karunga ga dira kutumbura moBibeli asi Jesus nga tameka kupangera mo-1914?

Timo: Jona olyo epuro lyewa. Pwa kara yininke yoyinzi va dira kuvyukilira kutumbura moBibeli. Morwasinke Karunga ga ninkire Bibeli va zi tjange monkedi ezi twa hepa kugazara ntani na tu yi kwata egano? Ngatu ya yi zogera oyo apa ngani ka wiza ko hena.

Jona: Nawa tupu.