Nsene asi vantu ufuki, mapangero nago taga kara noufuki. Epangero lya hana ufuki ntudi lyokutunda kwaKarunga. Bibeli za tumbura epangero olyo asi Uhompa waKarunga ou ga rongere Jesus vasikuli vendi va kanderere.—Mateusa 6:9, 10.

Uhompa waKarunga alyo epangero lyemeguru. Alyo ngali ya gusa po mapangero nagenye govantu ntani ufuki. (Episarome 2:8, 9; Ehororo 16:14; 19:19-21) Tu tareni yininke ntazimwe eyi ngau sikisa mo Uhompa ou.

UDIGU: Mapangero kugwana yimaliwa kovantu pokuvafutisa mutero. Yimaliwa oyo kuninkisa vemepangero va vake, ano vamwe kutambura mfuto kovantu ava vana hara mutero gwawo gu gurumuke. Morwa oyo, yimaliwa kusesupa mepangero, makura awo kugwederera unene komutero makura tayi ka reta ufuki. Ano vantu ava ava futu mutero kuhepa.

EKOHONONOPO: Nonkondo doUhompa waKarunga kwa tunda kwaKarunga Jehova munankondo nadinye. * (Ehororo 11:15) Uhompa owo kapi wa hepa mutero. Nye ngau ka sikisa mo yihepwa yovantu morwa Karunga “nonkondo dendi nonene unene.”—Jesaya 40:26; Episarome 145:16.

UDIGU: Susan Rose-Ackerman kwa tente asi ava va kara noyipundi yokuzeruka momapangero yiwo nava hova tanko kuhageka ufuki ntani ngau haga po. Mapangero kugasumpira kugusa po ufuki morwa ava va kara noyipundi yokuzeruka kwa zura ufuki. Nampili vapangeli wovawa po nawo kulipuka, moomu za uyunga Bibeli asi: “Kutupu nampili gumwe pevhu, ogu a rugana narunye youhunga.”—Muudisi 7:20.

EKOHONONOPO: Jesus Kristusa, Mupangeli ogu ga horowora Karunga, kapi a rugana yoyidona. Age ga yi likidire apa ga nyokerere po ufuki wokumupa “mauntungi gouzuni nomaufuuli gamo.” Muzonaguli kwa tumbwidilire kupa Jesus mauntungi nsene a mu tongamena. (Mateusa 4:8-10; Johanesa 14:30) Komeho a ka fe, Jesus kwa mu pere vhinyu a nwe yipo a dire kuzuvha kukora nye ga nyokere morwa ga here kulimburukwa nawa-nawa kwaKarunga. (Mateusa 27:34) Monkedi zangoso ga yi likidire asi age ga wapera kukara mupangeli goUhompa waKarunga.—Vafilipi 2:8-11.

UDIGU: Moyirongo yoyinzi, vantu kuhorowora. Nampili moyirongo yokuzeruka, momahoroworo omo kuhoroka mo ufuki. Vanangawo pamwe kugava yigava ndi yininke yipo vantu va vhure kuvahorowora.

Mupanguli gomoMpanguro zonene moAmerika John Paul Stevens kwa tjenge asi “ufuki kukundama Epangero momudona ntani kuninkisa vantu va dire kuhuguvara epangero.” Vantu wovanzi mouzuni va yi diva asi vanapolitika yiwo ava ruganesa unene ufuki.

EKOHONONOPO: Uhompa waKarunga ngau gusa po mahoroworo morwa awo ngau karerera. (Ndaniyera 7:13, 14) Mupangeli goUhompa owo, Karunga yige ga mu horowora kapisi vantu. Morwa ngau karerera awo ngau ka retera vantu mauwa ganarunye.

UDIGU: Vantu kugazara asi nsene pa kara noveta donompe tapa kara marunduruko. Nye, valirongi va yi nongonona asi noveta dononzi pamwe kureta ufuki. Noveta edi ava tulisa po mokuhagekesa po ufuki kapi adi rugana.

 EKOHONONOPO: Noveta doUhompa waKarunga da pitakana noveta domapangero govantu. Mevango lyokutulisa po noveta dononzi, Jesus kwa geve mpango zomulyo asi: “Nkenye eyi mwa harera vantu asi ava yi mu ninke, none omu yi va ninke.” (Mateusa 7:12) Noveta doUhompa waKarunga kwa demenena kweyi ya kara komutjima gomuntu ntani noyirugana yendi. Jesus kwa tente asi: “A kare mukweni, o mu hare moomu wa lihara nyamoge.” (Mateusa 22:39) Karunga ogu a mono monomutjima dovantu yige gelike gokuvhura kutulisa po noveta odo.—1 Samwere 16:7.

UDIGU: Varugani vemepangero navamwe kurugana ufuki morwa awo kwa dowokera emona. Ano vantu wokulikarera nawo kulikida nkareso zangoso. Etungo lyositora eli lya gwililire vantu tuna tumbura mosirongwa sina howo kwa horokere morwa vatungi kwa futire vemepangero yipo va va pulisire va ruganese yitungiso yombiliha yokudira nonkondo.

Mokugusa po ufuki vantu va hepa kuvaronga va nyokere po kudowokera emona. Nye mapangero kapi aga yi sikisa mo, kuronga vantu.

EKOHONONOPO: Uhompa waKarunga ngau gusa po ufuki pokuronga vantu va nyokere po yikara eyi ayi reta ufuki. * Erongo eli kuvatera vantu va ‘situnuke, nomutjima dawo nonompepo dawo di kare nompe.’ (Vaefeso 4:23) Awo kutara eyi va kara nayo asi ya va gwanena po ntani kupakera mbili vakwaawo.—Vafilipi 2:4; 1 Timoteusa 6:6.

UDIGU: Nampili monkarapamwe zongwa omu ava gava erongo lyewa, vantu vamwe kapi ava tanta usili ntani kufukira vakwaawo. Vakonakoni va yi dimburura asi mapangero kapi taga vhuru kugusa po ufuki. Nye mapangero kuna kukondja mokusesupika ufuki neyi au reta.

EKOHONONOPO: Sigongi soMbunga zelipakerero sa kere moAmerika kwa uyungire mo asi mokugusa po ufuki, mapangero ga hepa kukorangeda vantu va “tante usili nokusikisa mo yirugana yawo.” Uhompa waKarunga kapi tupu au rongo vantu yikara yoyiwa nye kuvakorangeda va yi ture pasirugana. Bibeli kwa uyunga asi “vanaruho” ndi vedowo ntani “novanayimpempa” kapi ngava pinga Uhompa waKarunga.—1 Vakolinte 6:9-11; Ehororo 21:8.

Vantu nawo kuvhura va sikise mo noveta odo, ngwendi moomu va yi rugene vapositoli. Pasihonena, murongwa gumwe gedina Simoni kwa here kuranda kovapositoli mpepo zokupongoka, nye awo tava nyoka nokumutantera asi: “Litezurura nye koudona ou.” Apa Simoni ga mwene siponga sedowo lyendi, yipo ga pulire vapositoli va mu kanderere po.—Yirugana 8:18-24.

Yi kare asi momuhoko musinke wa tunda, nove kuvhura kuhama koUhompa waKarunga. (Yirugana 10:34, 35) Erongo eli au gava Uhompa mouzuni mudima ngali ku likida omu no yi rugana oyo. Nombangi daJehova ngadi ku vatera pokulironga nove Bibeli pwa hana mfuto. Elirongo olyo kulirugana rumwe mosivike ntani kapi ali gusa novili dononzi. Ngo lironga hena kuhamena “Mbudi zoNgwa zoUntungi waKarunga,” nomu ngau ka hagekesa po ufuki. (Rukasa 4:43) Kuna kukuhundira o hedere Nombangi daJehova ndi o tare koIntaneta zetu jw.org/kwn.