Poyiruwo yanare, vagara vamwe ngava va rutura mokuvatengeka ndi mokuvatura va kare vapika. Vagara ava ngava rutura ngava va pe situmbukira mononzugo edi ngava rara vakadi womombara ndi yihora yahompa. Pasihonena Hegayi naSasigasi kwa va rutwire tava va tura va takamese vakadi noyihora yahompa goVaperesiya, Serekesesi.—Esitera 2:3, 14.

Kuliza noVeta zaMosesa, vagara ava va rutwire kapi ngava va pulisire mo mombunga zaKarunga. (Deutoronomium 23:1) Kapi pwa kara maumbangi asi Vaisraeli ndi vanayirongo ngava va rutura yipo va rugane mombara zahompa goVaisraeli. Moveta zaMosesa, vapika ngava va rugana yovamba kapisi kuvarutura. Nye vapagani yiwo ngava rutura vanona ava ngava ka kwata moyita nokuvatura vapika.

Apa Jesus ga fatwilire kuhamena mpanguro zokomeho age kwa tente asi: “Apa nga wiza MunwaMuntu mouyerere wendi, . . . Makura age nga va hangura ngwendi moomu a hangura musita nonzwi koyikombo.” (Mateusa 25:31, 32) Morwasinke vasita ngava hangwire nonzwi koyikombo?

Nonzwi noyikombo ngava yi lisa kumwe. Nye masiku ngava yi tura monohambo mokuyipopera koyikasama novawidi ntani komufu. (Genesis 30:32, 33; 31:38-40) Nonzwi noyikombo ngava yi tura nkenye eyi mohambo zayo mokupopera nonzwigona noyikembe komakungwe gougara. Buke zimwe kwa tanta asi vasita ngava hangura nonzwi koyimbo nsene kuna “kurondwa nokuyikanda nokuyikurura.” Jesus kwa ruganesere sifanekeso soyininke eyi va divire vantu posiruwo sina ngwendi nonzwi noyikombo. —All Things in the Bible