Kuvhura tu kanderere kwaJesus ndi?
MUKONAKONI gumwe kwa pulire vadinkantu wokupitakana po-800 womomaukareli gokulisiga-siga nsene va pura asi Jesus kulimburura makanderero. Sinzi sawo kwa limbwilire asi, va pura asi Jesus kulimburura makanderero. Nye gumwe tupu ga limbwilire asi “Karunga” yige a limburura makanderero.
Ove yisinke wa pura? Kwalye natu kanderera, kwaJesus ndi kwaKarunga? * Mokugwana elimbururo tu tareni eyi ga rongere Jesus kuhamena kukanderera.
KWALYE NATU KANDERERA?
Jesus kwa rongere nokutulikida asi kwalye natu kanderera.
Jesus kwa tulire po sihonena pokukanderera tupu koGuhwe vemeguru
EYI GA RONGERE: Murongwa gumwe gwaJesus kwa mu tanterere asi: “Hompa, tu ronga ko nose kukanderera,” Jesus ta va tantere asi: “Nsene tomu kanderere, omu tante asi: ‘Guhyetu.’” (Rukasa 11:1, 2) PEudiso lyopondundu Jesus kwa korangedere vantu asi: ‘Kanderereni kwaGuhyeni.’ Ta va korangeda hena asi: “Guhyeni ga diva eyi mwa hepa, one mwa hana kuyimuhundira.” (Mateusa 6:6, 8) Komeho va ka mu kwate, Jesus kwa tanterere varongwa vendi asi: “Nsene ngomu hundilira yuma kwaTate medina lyange, nga yi mu pa.” (Johanesa 16:23) Jesus kwa tu rongere tu kanderere tupu koGuhwe Jehova Karunga, nye kapisi kwendi.—Johanesa 20:17.
SIHONENA SENDI: Jesus nage nga kanderere kwaKarunga asi: “Nyove nina kupanda, Tate, Hompa geguru nevhu.” (Rukasa 10:21) Sikando simwe “Jesus ta ligamene keguru ta tanta asi: ‘Tate, tani ku pandura, morwa yeeyi ono zuvhu nge.’” (Johanesa 11:41) Komeho zokufa Jesus kwa kanderere asi: “Tate, mwenyo gwange tani gu gava momawoko goge.” (Rukasa 23:46) Apa nga kanderere koGuhwe, “HOMPA geguru nevhu” Jesus kwa tulire po sihonena esi twa hepa kukwama pokukanderera tupu kwaKarunga. (Mateusa 11:25; 26:41, 42; 1 Johanesa 2:6) Varongwa vendi wokuhova nawo va kweme sihonena sendi ndi?
KWALYE NGAVA KANDERERE VAKRISTE WOKUHOVA?
Konyima zoyivike kutunda apa ga tengwire Jesus meguru, varongwa vendi kwa va hepekere. (Yirugana. 4:18) Oyo kwa ninkisire varongwa va kanderere, nye kwalye? “Navenye tava lizi mutjima gumwe mokukanderera Karunga,” yipo a va kwafe ‘medina lyomukereli gwendi gokupongoka Jesus.’ (Yirugana 4:24, 30) Varongwa vena kwa kweme sihonena saJesus. Awo kwa kandererere kwaKarunga nye kapisi kwaJesus.
Konyima zonomvhura dongandi, murongwa gwaJesus, Paurusa, kwa fatwilire omu ngava kanderere. Age kwa tjangerere Vakriste vakwaawo asi: “Nkenye apa atu mu kandererere, ose kupandura Karunga, GuhyaHompa gwetu Jesus Kristusa.” (Vakorosi 1:3) Age kwa tjenge hena asi: “Omu pandwire nkenye apa Karunga Guhyetu nkenye kaninke, medina lyaHompa gwetu Jesus Kristusa.” (Vaefeso 5:20) Matjangwa aga kulikida asi Paurusa kwa korangedere Vakriste va kanderere ‘kwaKarunga Guhyetu mwankenye kaninke’ kupitira medina lyaJesus.—Vakorosi 3:17.
Tu likideni eharo lyetu kwaJesus, ngwendi Vakriste wokuhova, pokukanderera kwaKarunga tupu. (Johanesa 14:15) Nsene tu yi rugana, ngatu lizuvha eyi va uyunga mEpisarome 116:1, 2 asi: “Ame kwa hara HOMPA, yeeyi age kuzuvha nge, . . . nkenye apa ani mu zigida.” *
^ para. 3 Matjangwa kulikida asi Jesus kapi ga hetakana naKarunga.
^ para. 11 Mokuninka asi Karunga a zuvhe makanderero getu, twa hepa kusikisa mo yihepwa yimwe. Komauzera gamwe tara egaununo 17 mobuke Yinke azi rongo Bibeli sili?
