NGAPI mugara na tulisa po mbili mepata? Monompo dononzi vantu kwa pura asi situmbukira somugara sokureta yimaliwa mepata. Nye vakadi vamwe ava ava gwana yimaliwa yoyinzi kovagara vawo simpe kukara noruguwo. Mukadi gumwe gedina Rosa gomoSipanye kwa tente asi: “Mugara gwange nsene novantu vapeke, muntu gomuwa nye membo age nyanya.” Ano Joy gomoNigelia kwa tente asi: “Apa atu dili kulizuvha namugara gwange age kutantera nge asi: ‘Ame mugara goge wa hepa kurugana nkenye eyi nani ku tantera.’”

Ngapi mugara na vhura kusikisa mo situmbukira sendi nganturagumbo gomuwa? Yisinke ga hepa kurugana mugara mokuretesa po mbili mepata?

Mugara nomukadi kwa hetakana kosipara saKarunga, nye Bibeli kuronga asi va kara noyitumbukira yokulisiga mepata. Varoma 7:2 kutanta asi “mukadikwara kumumanga Veta nayendi.” Mwankenye yirugana kukara mo mupitisili, Karunga nage kwa tura mugara a kare mutwe ndi mupangeli gomukadi. (1 Vakolinte 11:3) Mugara yige mupitisili gemepata.

Ngapi nye mugara na ruganesa nawa upangeli wendi? Bibeli kutanta asi: “Vagara, omu hare vakadi veni, moomu ga hara Kristusa ngereka.” (Vaefeso 5:25) Jesus kapi ga kwere nye ga tulire po sihonena sosiwa kovagara. Tarurura sihonena sendi.

Jesus nga vatere vantu komaudigu gawo. Age kwa tente asi: “Wizeni kwange namuvenye, one ava wa rorora udigu, ni ya mu pwizumukise.” (Mateusa 11:28, 29) Age nkenye apa nga vatere vantu ntani nokuvaronga nawa nonkango daKarunga. Vantu kwa mu here unene morwa nga va vatere komaudigu gawo.

Omu vagara nava honena Jesus. Vatera mukadoge koyirugana yemembo. Sinzi sovakadi kulizuvha ngwendi Rosa ogu ga tente asi: “Mugara gwange kwa weka nge.” Kweku, ogu a pakere nawa mbili mukadendi kwa tente asi: “Ame kwa hara kuvatera mukadange noyirugana yemembo morwa na mu hara unene.”

 Jesus kwa kere nonkenda. Mukadi gumwe kwa verere nomvhura 12. Apa ga zuvhire asi Jesus kuverura, ta tokora asi: “Sinene tupu ni guma nampili kosikoverero sendi, nyame kuveruka.” Yipo ga hederere Jesus nokuguma kosikoverero sendi makura ta veruka. Nampili ngomu vamwe va dilire kuyihafera nye Jesus ga mwene udigu wendi. * Ta mu hengagwida asi: ‘Munwange veruka koudigu woge.’ Jesus kapi ga swaukisire gwina mukadi nye kwa mu fililire nkenda.—Marukusa 5:25-34.

Omu vagara nava honena Jesus. Nsene mukadoge kapi ana kulizuvha nawa mu fira nkenda. Hetekera ko kukwata egano malizuvho gendi. Ricardo kwa uyunga asi: “Apa ani dimburura asi mukadange ana guwu, ame  kuhetekera ko ni dire kuuyunga yininke eyi nayi mu handukisa.”

Jesus nga zogere novarongwa vendi. Ngava tantere hena omu nga lizuvhu. Age kwa tente asi: “Na mu horwera nayinye eyi na zuvha mwaTate.” (Johanesa 15:15) Jesus pamwe nga kara gelike a kanderere. Nye rorunzi nga kara kumwe nawo nokuzogera. Komeho va ka mu kwate nokumudipaga ta tantere varongwa vendi asi: “Yilyo sa eguwo lyomu.” (Mateusa 26:38) Nampili apa ngava mu handukisa kapi ga va fundukilire.—Mateusa 26:40, 41.

Omu vagara nava honena Jesus. Zogera namukadoge. Mukadi pamwe kuvhura a sivane asi mugara gwendi kuzogera novantu vapeke nye membo kumwena. Nye Ana ogu ga kara nomugara ogu a mu zogeresa kwa tanta asi: “Ame kulizuvha asi mugara gwange ga hara nge ntani kwa hara ni kare nage nkenye apa.”

Nyokera po kulifundukira namukadoge. Mukadi gumwe kwa tente asi: “Mugara gwange nga fundukire nge nokudira kuuyungisa nge mazuva gongandi. Nga ninkisa nge ni lizuvhe unzoni.” Nye mugara gedina Edwin ogu a hetekere ko kuhonena Jesus kwa tente asi: “Apa atu dili kulizuvha namukadange kapi ani limburura poopo nye kundindira siruwo sipite po ntani natu uyunga ose tuna litura.”

Joy, ogu tuna tumbura ketamekero kwa mona marunduruko monkareso zamugara gwendi apa ga tameka kulironga noNombangi daJehova. Age kwa tanta asi: “Age kuna kukondja unene mokuhonena Jesus a kare mugara geharo.” Valikwali wovanzi kuna kugwanena mo uwa melirongo lyoBibeli. Ono hara nove kulironga Bibeli o gwanene mo uwa ndi? Nsene yimo, pura gumwe goNombangi daJehova a ku vatere.