Jairo kwa mu hampurukire nourema wounene. * Nonsipa edi a vhuru kugendesa ntudi meho gendi. Rutu rwendi kusangana nkenye apa. Age pamwe kuliremeka mwene ntani novantu ava ava mu kara pepi. Morwa oyo, twa hepa kumumanga mawoko nomaguru gendi kosipundi sourema.

Jairo kwa kwa kura noudigu nokukora. Apa ga kere nomakwedi gatatu, yipo ga tamekere nosihegani. Oyina ngava mu dukisa kosipangero nokugazara asi ana fu.

Morwa nga gwa-gwa nokusangana, yisupa yendi yipo ya difukire. Apa ga kere nonomvhura 16, yisupa yendi yoposikaro tayi ligaunuka makura ga hepere etauro lyenene pomatungi noponyonga noposikaro. Tani diworoka, omu nga lili nkenye masiku morwa kukora ketauro.

Morwa urema wendi, Jairo twa hepa kumulisa nokumudwareka nokumurangeka. Oyina notate yiwo ava yi rugana unene. Nampili ngomu atu mu vatere nkenye apa, vakurona vange kumudiworokesa asi eparu lyendi kwa korera mwaKarunga.

Vakurona vetu Nombangi daJehova, awo ngava mu resere masimwititi goBibeli kutundilira ukeke. Awo va yi divire asi muntu kuhafa nsene a kara nelikwatakano naKarunga. Nye morwa urema wendi, vakurona vetu, kapi va yi divire nsene Jairo kuyikwata egano eyi ava mu rongo.

Ezuva limwe, age simpe munona, otate kwa mu pulire asi: “Jairo, na hara o uyunge name.” Tava tanta hena asi: “Nsene sili wa hara nge, no uyunga name.” Otate tava mu likwambere a uyunge nampili nkango zimwe, makura Jairo ta tameke kulira. Ga here kupwagesa malizuvho gendi nye kapi ga vhulire kuuyunga. Otate kwa lizuvhire udona apa va mwene Jairo ta lili. Nye oyo kwa likidire asi age ga kwete egano eyi va uyungire otate. Kapi tupu ga vhulire kuuyunga.

 Mwaza siruwo, vakurona vetu tava ya dimburura asi pamwe Jairo kugadura meho gendi nsene ana hepa yuma. Pamwe nga handuka nsene kapi tuna kukwata egano eyi ana hara. Nye vakurona vetu va lirongere yidiviso yomeho gendi yipo va mu pe eyi ana hara, ano Jairo nga hafa kosipara mokulikida rupandu.

Ndokotora gumwe tatu pe ko egano asi twa hepa kuzerura mawoko getu meguru nsene tatu pura Jairo. Kuwoko korulyo kulikida asi nhi ano korumoho hawe. Age kuvhura a limburure pokutara kewoko lyorulyo ndi lyorumoho.

Rutatu momvhura, Nombangi daJehova kukara noyigongi omu amu hamene yiuyungwa yokutunda moBibeli. Jairo nkenye apa kuhafa apa ava gava siuyungwa sekuho. Ezuva limwe, age nomvhura dendi 16, otate kwa mu pulire asi: “Jairo, ono hara kugwana ekuho ndi?” Poopo tupu, ta tara kewoko lyorulyo lyotate mokulikida asi ana hara kugwana ekuho. Tava mu pure hena asi: “Wa tumbwidira kwaKarunga mekanderero mokumukarerera narunye ndi?” Jairo ta tara hena kewoko lyorulyo lyotate. Ayo kwa likidire asi Jairo ga ligeve mwene kwaJehova.

Konyima zokumupura mapuro gekuho, Jairo ga likidire asi ga kwete egano eyi ali tanta ekuho. Mo-2004 yipo ga ka limbwilire epuro lyomulyo asi: “Wa ligava nyamoge kwaKarunga o rugane mpango zendi?” Jairo kwa limbwilire epuro eli pokutara meguru mokulikida asi ana yi kwatesa ko. Age kwa gwene ekuho ngagumwe goNombangi daJehova nonomvhura 17.

Mo-2011, Jairo kwa gwene kompiuta zokuvhura kurugana nomeho gendi. Azo kukwama moomu gana kugenda meho gendi, nsene ta kapwida ndi ta nwike meho gendi poruha rongandi makura azo tazi lidivi poopo. Mokompiuta ozo kwa kara mo mafano. Nsene a kapwidira pefano lyongandi alyo tali zeguruka kumwe nezwi eli nali uyunga eyi ana hara.

Apa ediwo lyomoBibeli lyaJairo lya ligwedererere, ayo ya mu tumangedere mokukorangeda  vapuli vakwaawo. Nkenye sivike, melirongo lyetu lyepata age nkenye apa kutara kwange nokokompiuta zendi. Azo nkedi zokudiworokesa nge asi ni tjange malimbururo aga ana hara kukagava komapongo.

Ano nsene ana hara kulimburura komapongo age kutarurura kokompiuta zendi yipo a horoworo elimbururo makura kompiuta tazi pwagesa ezwi eli nava zuvha navenye. Nkenye apa na limburura, age kumenya-menya. Alex gumwe govakaume vaJairo kwa tanta asi: “Ayo kuhafesa nge apa ani zuvhu Jairo ta gava malimbururo gomoBibeli.”

Jairo kuruganesa hena meho gendi mokuzuvhisa. Age kukapwidira meho gendi pefano lyoyikorama novantu wokulisiga-siga vana kuparuka mombili. Makura tamu pwaga hena ezwi lina kutanta asi: “Bibeli kwa tumbwidira asi, evhu ngali kara paradisa omu ngamu pira mauvera nonomfa, kuliza nEhororo 21:4.” Nsene muntu ta likida elituromo, ta kapwidire hena poruha rumwe mokompiuta omu namu pwaga ezwi asi: “Ono hara kulirongo Bibeli name ndi?” Ayo kwa tutetukisire, apa omama wovagara va tamekere kulironga Bibeli naJairo. Nevatero lyovapuli vakwetetu, Jairo ga vhulire kuronga Bibeli omama. MwaSiwogedi 2014 omama yipo va gwene ekuho posigongi somazuva gatatu.

Vamitili kumona elituromo lyaJairo lyokukarera Karunga. Rosario, gumwe govamitili vaJairo, kwa tente asi: “Nsene ngani hara kuhama koukareli, ngani kara gumwe goNombangi daJehova. Ame na mona omu epuro lyaJairo lya mu vatera a kare muntu goruhafo nampili ngomu ga kara nourema.”

Jairo kuhafa apa ani mu resere etumbwidiro lyomoBibeli asi: “Yirema yomondambo ngayi lidinkura tayi dana, ano yipurupuru ngayi dimba unene.” (Jesaya 35:6) Nampili ngomu a dompo pamwe mutjima, nye age nkenye apa muntu goruhafo. Eyi ayi mu retere ruhafo, morwa age kukarera Karunga ntani kukara nkenye apa novapuli vakwaawo. Nkareso zendi zoruhafo nepuro lyendi lyokupama, kulikida asi nsene o karera Jehova ngo hafa nampili momaukaro goudigu.