Kutunda kwanare vantu kwa hara kukara nomarutu gosidinkantu nokuparuka narunye. Nye ehudi, ose kufa. Nonkango daJoba ga uyungire nomvhura mayovi gatatu da ka pita, kuna kusika mo.

Ose kwa hara kuparuka narunye. Bibeli kututantera asi Karunga kwa tura mwetu eharo lyokuparuka narunye. (Muudisi 3:11) Mokumona asi ose kuna kufa, Karunga nga ka sikisa mo eharo lyetu lyokuparuka narunye ndi? Nhi. Morwa age ga tumbwidira moNonkango dendi asi: “Nkore zokuhulilira ezi ngava zonagura, nomfa.”—1 Vakolinte 15:26.

Nkenye gumwe kuvhura a yi kwatese ko asi nomfa nkore. Kwato ogu ga di hara. Apa atu mono siponga, ose kuhenduka ndi kuvanda ndi kutjwayuka. Apa atu vere, ose kupapara uhaku yipo tu veruke. Ose kukondja mokukandana po nkenye eyi nayi tu ninkisa tu fe.

Kuvhura tu yi pure asi nkore ezi zanare nomfa ngava zi zonagura po ndi? Nhi. Jehova Karunga, Musiti, kapi ga sitire vantu va paruke tupu nomvhura dononsesu makura va fe. Nomfa kapi da kere sitambo sendi. Age kwa here vantu va paruke narunye pevhu ntani nga sikisa mo sitambo sendi oso.—Jesaya 55:11.

Ngapi omu nomfa ngava di zonagura po? Kutunda kwanare, vantu kwa kondja mokuhagekesa po nomfa nye kapi ya va tompoka. Nampili naina simpe kuna kukondja. Vadiviunsitwe kwa va tompoka tupu kugwana nomutji dokuhagekesa po mauvera gamwe. Awo kwa konakona kuhamena omu ya kara yinamwenyo. Komavango gamwe, vantu kuparuka siruwo sosire kupita pwanare. Nye simpe awo kufa. Moomu za tanta Bibeli asi: “Nayinye kuvyuka kevega limwe tupu – mbundu.”—Muudisi 3:20.

Twa ha huguvara vantu mokukohonona po udigu ou wokuhamena nomfa. Mbudi zongwa kuna kara asi Jehova Karunga nare ga tura po mawapaiko mokukatuzowora konomfa kupitira mwaJesus Kristusa.