“HOMPA Karunga yipo nye ga damwine muntu, ta mu tura mosikunino saEdeni a si rugane a si pakere mbili. Age kwa pangerere muntu asi: ‘Yiyimwa yokoyitji nayinye kulya tupu, ntudi yokositji esi asi gava ediwo lyeyi yoyiwa neyi yoyidona no. Siyimwa saso nokanunu si asi o si lye. Nsene ngo yi hetekera ngo fa lyoolyo ezuva.’”—Genesis 2:15-17.

Karunga kwa tulire muntu gokuhova Adamu pevhu mosikunino saEdeni, omu mwa kere yikorama noyimeno yoyiwa. Mwa kere yitji yenyango eyi ga vhulire kulya Adamu. Nye, Jehova Karunga kwa tanterere Adamu mokudira kulya kositji simwe nokumurondora asi nsene nga yi hetekera ngano nga fa.

Adamu ga divire asi yisinke nomfa ndi? Nhi, morwa ga mwene yikorama omu ngayi fu. Ngano Adamu kwa mu sitire asi nga fa, ngano Karunga kapi ga mu rondwere kuhamena nomfa. Ntani ga yi divire asi nsene a limburukwa Karunga pokudira kulya kositji, ngano kapi nga fa.

Vamwe kutanta asi nzo ezi va tulire Adamu naEva, kwa ligwanekerere panyama. Nye oyo kapisi usili, morwa Jehova kwa va harere va ‘livhare nokuzwida evhu.’ (Genesis 1:28) Nzo ezi va tulire kwa lire kositji. Jehova kwa tumbwire sitji oso asi ‘sitji sokugava ediwo lyeyi yoyiwa neyi yoyidona’ esi sa fanekesere asi yige gelike ga diva yininke yoyiwa neyi yoyidona kovantu. Pokudira kulya kenyango lina, Adamu ngano ga likidire ulimburukwi norupandu rwendi kwaJehova ogu ga mu sitire nokupa nayinye.

“Karunga ta tantere hena Adamu asi: ‘Ove kuna . . . , li siyimwa esi na tanta asi nokusilya si. Ngo rugana unene, to tjimpuka asi o gwane nondya, dogoro noku ngo tengwira mevhu omu va ku gusa. Yeeyi ove kwa tunda mevhu, makura ngo kara hena evhu.’”—Genesis 3:17, 19.

Adamu kwa lire kositji esi va mu silikire. Ozo kwa kere nzo zonene. Morwa age kwa rwanesere nokuswaura Jehova ogu ga mu pere nayinye. Pokulya kenyango, Adamu kwa likidire asi ana nyoka upangeli waJehova, ano ayo kwa mu reterere yitundwamo yoyidona.

Ngwendi moomu tupu ga yi uyungire Jehova, Adamu konyima ga ya fire. Karunga kwa ungire Adamu ‘kevhu’ ntani kwa mu tanterere asi nga “tengwira mevhu.” Apa ga fire kapi ga lisitunukire sininke sapeke ndi a ze meguru. Nye kapi ga kere po ngwendi moomu ga dilire kukara po komeho va mu unge kevhu.—Genesis 2:7; Muudisi 9:5, 10.

“Nzo, muntu gumwe tupu ga zi reta mouzuni. Ano nzo zendi kwa reta mo nomfa. Nomfa yiyo da lihanena movantu mudima, morwa vantu navenye kwa zona.”—Varoma 5:12.

Nzo zaAdamu kwa reta yitundwamo yoyidona. Apa ga zonene, age kwa zumbanesere eparu lyanarunye. Ntani age kwa zumbanesere hena kusikilira mo, makura ruvharo rwendi kwa pinga kudira kusikilira mo.

Natuvenye ruvharo rwaAdamu. Ose kwa pinga kwendi rutu rokudira kusikilira mo rononzo ntani nomfa. Paurusa kwa singonona ruhepo oro, pokutjanga asi: “Ame ni muntu tupu gokufa, kwa randesa nge ni kare mupika gononzo. Oru ruhepo rwange ame muntu ame rureru oru! Yilye ogu nga yoworora nge mo morutu oru rokutwara nge konomfa?” Makura Paurusa kwa lilimbwilire mwene asi: “Ame tani pandwire Karunga mwaJesus Kristusa, Hompa gwetu.”—Varoma 7:14, 24, 25.

“Guhya kwa tuma Munwendi a ya kare Muzowoli gouzuni.”—1 Johanesa 4:14.

Jehova Karunga kwa tulire po ewapaiko mokutuzowora kononzo nokonomfa. Monkedi musinke? Age kwa tumine munwendi ogu ga hara a tunde meguru nokuyamuhampuruka ngomuntu gokusikilira mo ngwendi Adamu. Mokulisiga naAdamu, Jesus “kapi ga tulire nzo.” (1 Peturusa 2:22) Morwa age kwa sikilira mo, kapi ga pingire nzo, ntani ngano ga parukire narunye gomuntu gokusikilira mo.

Nye Jehova ga pulisilire Jesus di mu dipage nonkore dendi. Mezuva lyautatu, Jehova kwa pindwire Jesus koufe ngosisitwa sopampepo yipo a tengure meguru. Omo, Jesus kwa ka geve kwaKarunga nzambo zeparu lyendi lyokusikilira mo mokutengwidira po eyi ga zumbanesere Adamu noruvharo rwendi. Jehova ga tambwire nzambo ozo, pokupulisira ava ava tura epuro mwaJesus va ka gwane mwenyo gwanarunye.—Varoma 3:23, 24; 1 Johanesa 2:2.

Jesus kwa tengwidira po eyi ga zumbanesere Adamu. Age kwa mu dipagere yipo tu ka gwane eparu lyanarunye. Bibeli kwa tanta asi: ‘Jesus kwa nyende dogoro konomfa. Karunga monkenda zendi yige ga yi rugana eyi asi Jesus a fire vantu navenye.’—Vahebeli 2:9.

Ewapaiko eli kwa horora eharo lyaJehova. Nampili ngomu vantu wokudira kusikilira mo va dira kuvhura kulizowora vene, nye eharo nonkenda zendi kwa mu tumangedere a gave Munwendi a tu zowore kononzo.—Varoma 5:6-8.

“Kristusa yige va hova kupindura koufe, mwava navenye va fa. Moomu da kara po nomfa mouzuni morwamuntu gumwe, nevhumbuko lyovafe nalyo kwa kara po morwamuntu gumwe. Ano moomu ava fu vantu navenye morwa yiwo ruvharo rwaAdamu, yimo ngorooro hena ngava va tura navenye mwenyo morwa yeeyi awo kwa likwatakana naKristusa.”—1 Vakolinte 15:20-22.

Yosili, Jesus kwa parukire makura ta fu, nye umbangi musinke wa kara po asi kwa mu pindwire koufe? Umbangi wounene kuna kara asi Jesus apa ga pindukire koufe kwa monekerere vantu wovanzi yikando yongandi komavango gokulisiga-siga. Sikando simwe, kwa monekerere vantu wokupitakana 500. Mupositoli Paurusa kwa tjenge yuma oyo mombilive zendi zokoVakolinte asi sinzi sawo simpe poveli mokulikida asi awo va vhulire kukwatesa ko eyi va mwene neyi va zuvhire.—1 Vakolinte 15:3-8.

Paurusa apa ga tjenge asi Kristusa yige “va hova” kupindura koufe, age kwa likidire asi vamwe nawo ngava va pindura koufe. Jesus mwene kwa tente asi siruwo ngasi wiza apa “navenye ava va kara monontoko,” ngava “pwaga mo.”—Johanesa 5:28, 29.

“Karunga kwa here uzuni unene-nene, yiyo ga u pere Munwendi gelike a huru, asi nkenye ogu a mu pura a dire kuzonauka, nye a kare nomwenyo gwanarunye.”—Johanesa 3:16.

Buke zokuhova moBibeli kututantera apa nomfa da tamekere mouzuni napa za hege po Paradisa. Ano buke zokuhulilira kututantera apa nomfa ngava ka di hagekesa po napa Karunga nga ka tengwidira po Paradisa apa pevhu. Makura vantu ngava ka paruka noruhafo ntani narunye. Ehororo 21:4 kwa tanta asi: “Nomfa kapi hena ngadi kara ko.” Mokupameka etumbwidiro olyo, velise 5 kwa tanta asi: “Nonkango edi dosili dokuvhura kuhuguvara.” Eyi ga tumbwidira Jehova, nayinye ngayi ka sika mo.

Nove wa yi pura asi “nonkango edi dosili dokuvhura kuhuguvara” ndi? Makura lironga ko yoyinzi kuhamena Jesus Kristusa nokupura mwendi. Nsene o yi rugana, Jehova nga ku hafera. Kapi ngo limonena tupu matungiko ngesi nye hena ngo kara nehuguvaro lyomwenyo gwanarunye moParadisa apa pevhu, omu ngamu ka dira ‘nomfa neguwo nomalirankali nokukora.’