Megi: Moro Sharon. Kani hefe sili kukumona kediworoko lyonomfa daJesus. * Ko haferere epongo ndi?

Sharon: Nhi, kani li haferere nye kapi kani kwete egano nayinye eyi kava ka uyungire mo. Nye na dimburura asi vantu wovanzi kulitura mo unene kudana ehampuruko lyaJesus poKrismesa kupitakana kudiworoka nomfa dendi. Morwasinke ya karera nomulyo tu diworoke nomfa daJesus?

Megi: Yimo, sinzi sovantu kudana Krismesa. Nye ose Nombangi daJehova kulizuvha asi ezuva lyomulyo po twa hepa kudiworoka kuna kara nomfa daJesus. Nsene ono kara ko nosiruwo, nina hara ni ku fatwilire eyi atu yi ruganene oyo.

Sharon: Nawa tupu.

Megi: Ose Nombangi daJehova kudiworoka nomfa daJesus morwa age kwa pangerere vasikuli vendi va yi rugane. Tu kona-kone eyi ya horokere esiku komeho a ka fe Jesus. Wa diva omu ava gu tumbura murarero gokulikerera ga lire kumwe novasikuli vendi wovalimburukwi ndi?

Sharon: Nhi, Murarero gwaHompa.

Megi: Yimo. PoMurarero ogo, Jesus kwa pere vasikuli vendi nompangera. Kuvhura o rese mwaRukasa 22:19?

Sharon: Ewa. “Age makura ta gusa hena mboroto, ga mana kupandura Guhwe, makura ta zi bamagura, ta zi pe varongwa vendi, ta tanta asi: ‘Oru yiro rutu rwange nina kumupa. Omu yi rugane tomu diworokere nge po.’”

Megi: Mpandu. Jesus kwa va pangerere asi: “Omu yi rugane tomu diworokere nge po.” Komeho a ka va tantere asi va hepa kumudiworoka, Jesus ga va tanterere konda zeyi nava mu diworokera. Age kwa tente asi nga gava mwenyo gwendi mokuvazowora. MwaMateusa 20:28, Jesus kwa uyungire asi: “NaMunwaMuntu nage si kapi ga wizira asi va ya mu kerere, age kwa wizira a ya kerere, a ya gave mwenyo gwendi, gu kare sizoweseso sovanzi.” Pausupi, eyi yiyo Nombangi daJehova adi pongere nkenye mvhura mokudiworoka sizoweseso esi ga geve Jesus. Nomfa dendi kugava eparu kovantu navenye wovalimburukwi.

Sharon: Yimo, Jesus ga tu fira. Nye simpe kapi na yi kwata egano eyi twa hepera sizoweseso.

 Megi: Kapisi nyovelike o lizuvhu ngoso. Sirongwa sokuhamena nzambo zosizoweseso saJesus udigu unene. Nye naso kuna kara simwe serongo lyomulyo moNonkango daKarunga. Kuvhura tu si zogerere ndi?

Sharon: Nawa tupu.

Megi: Mazuva aga kani resere kuhamena sizoweseso, nani hetekera ko kukufatwilira paureru.

Sharon: Ewa.

Megi: Mokukwata egano sizoweseso, pomuhowo twa hepa kudiva eyi va retere oAdamu naEva apa va zonene mosikunino saEdeni. Tu tare si moVaroma 6:23. Kuvhura o zi rese ndi?

Sharon: Nhi. “Mfeto zononzo nomfa, nye uhwi wonkenda waKarunga yiwo mwenyo gwanarunye mwaJesus Kristusa, Hompa gwetu.”

Megi: Mpandu. Tu konakone velise ozo. Nonkango dokuhova asi: “Mfeto zononzo nomfa.” Ozo kuna kara mpangera Karunga ga geve apa va zonene vantu. Nye pomuhowo kwato ogu ga kere munanzo. Adamu naEva kwa sikilire mo ntani ngano vana vawo ava va ya retere nawo ngano kwa sikilire mo. Kwato ngano ga vhulire kufa. Adamu naEva ntani ruvharo rwawo kwa kere nehuguvaro lyokuparuka narunye. Nye yininke ya rundurukire, yisinke va rugene oAdamu naEva?

Sharon: Awo kwa lire kositji esi va va silikire.

Megi: Mouhunga. Apa va yi rugene oyo, awo kwa tulire nzo. Kapi va sikilire mo hena, tava kara vananzo. Etokoro lyawo olyo lyedona, kwa kundamene hena noruvharo rwawo.

Sharon: Morwasinke ya kundamenene ruvharo rwawo?

Megi: Tanko ni ku pe ko sifanekeso. Wa diva oku ava kangere nomboroto?

Sharon: Nhi. Mosipana.

Megi: Tu ninke nye asi ono randa sipana sonomboroto. Komeho o ka kangere mo nomboroto, tasi myantuka. Yisinke nayi horokera nomboroto odo no kangera mo?

Sharon: Nado tadi myantuka.

Megi: Mokulifana, apa Adamu naEva va dilire kulimburukwa kwaKarunga, awo kapi va sikilire mo hena. Morwa awo kwa zonene komeho va rete, makura vana vawo ava va ya retere nawo kapi va sikilire mo. Awo kwa va retere moukaro wononzo. Bibeli kulikida asi ose kwa pinga nzo ozo. Morwa natuvenye kwa tunda mwaAdamu naEva. MoVaroma 6:23 kwa likida asi mfeto zononzo nomfa.

Sharon: Kapi tayi wapa asi, vantu navenye va hepe narunye morwa nzo zoAdamu naEva.

Megi: Yimo. Oyo yiyo Karunga ga tokwerere asi Adamu naEva va hepa kufa morwa nzo zawo. Nye ose ruvharo rwawo twa kara nehuguvaro. Karunga kwa tu zowora, pokutupa sizoweseso. Tu konakone hena Varoma 6:23, nonkango dokukwama ko asi: “Nye uhwi wonkenda waKarunga yiwo mwenyo gwanarunye mwaJesus Kristusa, Hompa gwetu.” Ya zere nawa-nawa asi nomfa daJesus da tu zowora kononzo nokonomfa. *

Megi: Podili nonkango dimwe movelise ozo nina hara tu konakone.

 Sharon: Nonkango musinke?

Megi: Edi asi: “Nye uhwi wonkenda waKarunga yiwo mwenyo gwanarunye mwaJesus Kristusa, Hompa gwetu.” Nsene asi Jesus yige ga hepere nokutufira, morwasinke velise zina kuuyungira asi sizoweseso ‘uhwi waKarunga’? Eyi za dira kuuyunga asi: “Uhwi waJesus”? *

Sharon: Kapi tani diva.

Megi: Karunga yige ga sitire Adamu naEva, ano kwendi yiko va zonene mosikunino saEdeni. Age kwa lizuvhire kukora unene apa va mu rwanesere. Nye Jehova ga tulire po ekohononopo. * Yipo ga tokwere asi gumwe govana vendi wopampepo a wize pevhu, a ya paruke ngomuntu nokuyagava mwenyo gwendi gu kare sizoweseso. Yipo nye, sizoweseso kuna kara uhwi wokutunda kwaKarunga. Pana kara hena konda zimwe eyi ya karera ngoso. Wa gazadara ko rumwe omu Karunga ga lizuvhire apa Jesus va mu dipagere?

Sharon: Hawe, kapi na yi gazara.

Megi: Na mono yidanaukiso ponze, wa kara novanona ndi?

Sharon: Nhi, vavali, mumati nomukadona.

Megi: Ngomureti, gazadara ko omu ga lizuvhire Jehova Karunga apa Munwendi va mu dipagere. Gazadara tupu omu ga lizuvhire pokumona Munwendi ogu ga hara kuna kumukwata nokumuswaura nokumutoona. Ntani nomu ga lizuvhire apa Munwendi va mu pamparere nonomboha a fe nomfa dokukora unene.

Sharon: Nani ngoso hena? Yosili, ga lizuvhire kukora kokunene.

Megi: Udigu unene kufaturura omu Karunga ga lizuvhire apa Munwendi va mu dipagere. Nye twa yi diva asi ga kara nomalizuvho ntani twa yi diva hena eyi ga yi pulisilire nayinye oyo yi horoke. Ayo kwa yi faturura mwaJohanesa 3:16. Kuvhura o zi rese?

Sharon: Nawa tupu. “Karunga kwa here uzuni unene-nene, yiyo ga u pere Munwendi gelike a huru, asi nkenye ogu a mu pura a dire kuzonauka, nye a kare nomwenyo gwanarunye.”

Megi: Mpandu. Velise kuna tameke kuuyunga asi: “Karunga kwa here uzuni unene-nene.” Eharo yilyo lya tumangendere Karunga a tume Munwendi pevhu a ya tu fire. Sizoweseso kuna kara nkedi zonene po ga tu likida Jehova asi ga tu hara. Yiyo Nombangi daJehova adi pongere nkenye mvhura di diworoke nomfa daJesus. Ono yi kwata egano ndi?

Sharon: Nhi. Mpandu mokuyifatwilira nge nawa.