Mavhumbukiro kwa ga singonona mobuke Encyclopædia Britannica ‘ngosilika somulyo sovanangereka ava ava diworoka evhumbuko lyaJesus Kristusa.’ Nye aso silika esi va hepa kudana Vakriste ndi?

Mokudiva nsene asi mavhumbukiro kuna kara silika va hepa kudana Vakriste, ya kara nomulyo kwetu kukonakona eyi ya hamena mo mosilika oso.

Jesus kwa pangerere vasikuli vendi va diworoke nomfa dendi kapisi evhumbuko lyendi. Mupositoli Paurusa kwa tumbwire silika oso asi ‘Murarero gwaHompa.’—1 Vakolinte 11:20; Rukasa 22:19, 20.

Buke Britannica kwa tanta asi nompo domavhumbukiro “kapi da likwatakana nevhumbuko lyaJesus, nye kwa tunda konompo dovapagani.” Pasihonena, kombinga zomauta novandimba ava ava ruganesa pomavhumbukiro, buke zimwe kwa tanta asi: “Mauta kwa fanekesa eparu lyepe,” ano morwa “vandimba kureta unene kwa va ruganesa mokufanekesa siruwo sokulima.”—The Encyclopedia of Religion.

Philippe Walter, mukonakoni goyimbapiratjangwa yanare, kwa faturura omu nompo odo da ya likwatakana nomavhumbukiro. Age kwa tjenge asi posinema sokulima vapagani ngava dana sipito sawo sokufanekesa eparu lyepe makura ya kere ureru kwawo mokukwatakanesa sipito oso nevhumbuko lyaJesus. Mokukoka vapagani koUkriste, yipo va pinganeserere po sipito oso pokudana Mavhumbukiro gaJesus.

Eyi kapi ya horokere posiruwo sovapositoli, morwa awo kwa kere ngwendi “yilimbika” yovapagani. (2 Vatesaronika 2:7) Mupositoli Paurusa kwa rondwere asi ‘nsene nga za,’ vantu vamwe ‘ngava uyunga yininke yoyimpempa asi ngava gwane ko varongwa.’ (Yirugana 20:29, 30) Ano konyima, mupositoli Johanesa kwa tjenge kuhamena vamwe ava va tamekere kupukisa Vakriste. (1 Johanesa 2:18, 26) Vamwe kwa ya tambwire nompo dovapagani.

Awo nampo kwa lizuvhire asi kutambura nompo dosilika somavhumbukiro kapi ya kere epuko morwa kwa yi tere ngonkedi zokuvatera vapagani va kwate egano evhumbuko lyaJesus. Nye Paurusa kapi ga yi kwatesere ko. Nampili ngomu nga mono nompo dononzi dovapagani apa nga gendi moRoma, age kapi ga kwatesere ko nompo odo. Nye age kwa rondwere Vakriste asi: “Walye omu kambadara kurugana kumwe nava va hana kupura. Yeeyi pouhungami noudona ukwawo musinke wa kara po, ndi pouzera nomundema malizo musinke ga kara po? Yiyo nye ana kutantera hena Hompa asi: ‘Ano tundeni mo mokatji kawo, mu likerere. Mwa ha guma kweyi yokunyata.’”—2 Vakolinte 6:14, 17.

Yisinke tuna lirongere ko pokukonakona mauzera aga? Ayo yina zere asi Mavhumbukiro kapisi silika soVakriste.