Ame kwa kulilire momukunda gomudona, mositata saMontreal. Otate kwa dogorokere ame makwedi ntazimwe, oyina yiwo va tu rerere nokurugana yininke nayinye yemembo. Ose kwa tu reta ntantatu, ano ame nsiraura.

Apa na kulire eparu lyange kwa kere tupu lyokukoka epangwe, kuvaka, kurwanangana ntani nokugendagura nomatjotji. Apa na kere nonomvhura 10 ngani ruganene yikumbu nava wokuheheda yimaliwa. Na kere muntu goyimpempa ntani ngani fukire vantu mononkedi dokulisiga-siga. Ame kwa here nkareso ozo unene.

Apa na ya kere nonomvhura 14 na divire nawa kukumbagera vantu. Pasihonena, ngani randa novili nonolinga neyi yokudwara komawoko, ngani yi mereke asi ngorodo zene-zene nani kapisi ngorodo, makura ngani yi randesa moyitarata nomodoropa. Ame kwa haferere kugwana usimbu yimaliwa. Ezuva limwe kwa gwene yimaliwa yokusika $10 000.

Apa na kere nonomvhura 15 tava tjida nge mosure nomohostera, makura kapi na kere nevango lyokutunga. Ngani rara moyitaura ntani momambo govakwetetu.

Morwa ngani fukire vantu, nkenye apa vaporosi ngava puragere nge. Kapi ngava tura nge modorongo morwa kapi ngani randesa yininke yokuvaka. Nye ngava futisa nge morwa kufukira vantu nokurandesa yininke pwa hana mbapira zepulisiro. Morwa kapi na tjilire vantu, ngani rugana kwava ngava heheda yimaliwa pokukavasimbira makongo gawo. Aso kwa kere sirugana sosiponga, poyiruwo yimwe ngani simbi uta. Pamwe ngani rugana nomatjotji gomanene.

Apa na kere nonomvhura 17 yipo na hovere kuzuvha kuhamena Bibeli. Ame opo kuna kutunga namukadona gwange ogu ga tamekere kulironga Bibeli noNombangi daJehova. Nye ame kapi na here kutambura nompango doBibeli  makura tani mu nyoka tani ka tunga kumwe nomukadona gwange gwapeke.

Apa mukadona gwange gwauvali ga ya tamekere kulironga noNombangi yipo na varekere kutura po marunduruko. Tani mono marunduruko monkareso zendi, age kwa tamekere kugomoka ntani kapi nga handauka. Apa ga zigidire nge tu ze kepongo koSinyanga soUhompa soNombangi daJehova tani zi. Kwa ka tambwire nge vantu wombili wononkedi donongwa. Awo kwa lisigire novantu womouzuni. Kutunda unona wange ekoro lyange kapi lya here nge, ntani kwato ogu nga likida nge eharo eli da ka likidire nge Nombangi daJehova. Apa va pulire nge ni lironge nawo Bibeli, ame na yi tambwire.

Eyi na lirongere moBibeli kwa poperere nge. Name novakwetu vavali kwa here tu ka vake yipo ni ka fute makongo gange gokupitakana $50 000. Na tulire etokoro lyewa mokudira kuza nawo, morwa gumwe va ka mu kwete ano mukwawo tava mu dipaga.

Apa na twikilire kulironga Bibeli, tani yi dimburura asi na hepa kutura po marunduruko gomanzi. Pasihonena, 1 Vakolinte 6:10 kwa tanta asi: “Vawidi ndi vanaruho nononkorwe novaswauli wovakwaawo novamahaka, kapi ngava pinga Untungi waKarunga.” Velise ozo kwa twire nge komutjima makura tani lili. Na yi dimbwilire asi na hepere kurundurura mparukiso zange. (Varoma 12:2) Ame kwa kere gonyanya ntani ngani kumbagere unene.

Na lirongere hena moBibeli asi Jehova munankenda ntani kutugusira po. (Jesaya 1:18) Ngani kanderere unene nokulikwambera kwaJehova a vatere nge ni sige nkareso zange zanare. Nevatero lyendi, na tamekere kutura po marunduruko. Erunduruko lyenene kwa kere apa twa likwere paveta namukadona gwange.

Apa na kwere ame nomvhura dange 24 novana vatatu. Na hepere kupapara yirugana. Kapi ya kere ureru kugwana yirugana morwa kapi na mene sure. Tani kanderere hena kwaJehova. Makura tani ka papara yirugana. Ngani tantere vahona woyirugana asi ame kuna hara kurundurura nkareso zange nokurugana yirugana yokudira kufukira vantu. Pamwe ngani va tantere asi ame kuna kulironga Bibeli ntani nina hara kukara muntu gomuwa. Sinzi sovahona ngava nyoka kukuta nge. Moruhura, apa na tente nayinye yoyidona eyi ngani rugana nare, ogu ga puragerere nge ta uyunga asi: “Kapi na diva, nye koyili yina kutantera nge momutjima asi na hepa kukukuta.” Yipo na yi pulire asi Jehova ana limburura ekanderero lyange. Konyima name namukadange tatu gwana ekuho ngavamwe woNombangi daJehova.

Ame simpe kuna kuparuka morwa kusikisa mo nompango doBibeli. Na kara nepata lyange lyoruhafo. Na kara nezwi lyewa lyomomutjima, morwa na yi pura asi Jehova ga gusire nge po.

Monomvhura 14, ame kwa rugana novili 70 nkenye kwedi mokuronga vantu Bibeli ntani mukadange nage ga tameka kurugana yokulifana. Nomvhura 30 ame kwa vatera varugani vakwetetu 22 va kare vakareli vaJehova. Ame simpe kuza modoropa kapisi ni ka fukire vantu nye ni ka va ronge kuhamena etumbwidiro lyouzuni woupe omu ngamu dira ufuki.—Episarome 37:10, 11.