Karunga nga pulisira vantu va twikire kupangera nokulihepeka ndi? Hawe, age nga hagekesa po kukora noruhepo. NgoMusiti, age ana hara o dive asi ntaantani nga ya rugane ko yuma. Ngapi omu ga yi likida?

Pasihonena, muntu ta ku pe mauzera kuhamena mukunda wa dira kudiva. Monzira zoge zokuza nsene no mona eyi ana ku tantere ove no yi pura asi pepi ono kara nokusika. Mokulifana, Karunga ga tu pa Nonkango dendi, omu va faturura yihorokwa yomouzuni. Apa atu mono yihorokwa oyo, ose kuyipura asi pepi nouhura tuna kara.

Bibeli za faturura asi uzuni ngau donapa makura ngayi twaredesera kouhura wouzuni. Ngapa horoka yihorokwa yoyinene yokulisiga-siga ya dira kuhoroka rumwe. Koneka yihorokwa yimwe va tumbura moNonkango daKarunga.

1. YIHOROKWA YOMOUZUNI: MwaMateusa 24 kwa pumbire mo yihorokwa eyi ngayi horoka pevhu. Ayo ngayi kara sidiviso asi ‘uhura wouzuni’ pepi. (Velise 3, 14) Yihorokwa oyo kwa kwatera mo yita nerumbu nekankamo lyevhu noudona, novapukisi wovanzi ntani eharo lyovantu ngali tenda. (Velise 6-26) Yimo, yihorokwa oyo nare ya gusa kuhoroka. Nye apa ngayi horoka nayinye posiruwo simwe tupu, ngayi likida asi uhura pepi una kara. Nga kukara hena yidiviso yitatu.

2. NKARESO ZOVANTU: Bibeli kwa uyunga asi “pomazuva gopouhura,” nkareso zovantu ngazi donapa unene. Azo kwa tanta asi: “Vantu ngava lihara tupu vene, ngava dowokera yimaliva, ngava lifumadeka, ngava linenepeka, ngava kara woyitjani, kapi ngava zuvha yovakurona vawo, kapi ngava paka mpandu, kapi ngava pongoka. Awo kapi ngava paka nkenda, ngava kara woyimbokauka novarundili, vankenye omu nava woyikotjongana, awo kwa nyenga yoyiwa. Awo ngava kara nombudi novalingi-lingi novalitumbi, ngava hara mahafo goparutu kupitakanesa omu va hara Karunga.” (2 Timoteusa 3:1-4) Nkareso zokudira kulifumadeka zina vhuka unene “pomazuva gopouhura” morwa mazuva aga kwa ga singonona asi “yiruwo yoyidigu.” Ove kuna kumona nonkareso odo ndi?

3. VANTU KUNA KUZONAGURA EVHU: Bibeli kwa tanta asi Karunga nga ‘zonagura ava wokuzonagura evhu.’ (Ehororo 11:18) Ngapi omu vantu vana kuzonagura evhu? Mosiruwo saNowa vantu kwa zonagwire evhu. Bibeli kwa tanta asi: “Vantu navenye vapeke kwa yipire kwaKarunga, ano udona wawo hena kwa lihanenene napenye. Karunga makura ta tara uzuni, ta mono asi una yipa.” Makura Karunga yipo ga tente asi: “Tani va zonagura po nuunu.” (Genesis 6:11-13) Nove wa yi nongonona asi nyanya zina vhuka mouzuni ndi? Vantu kuna kuzonagura hena evhu mononkedi dokulisiga-siga. Ngesi vana kara nononkondo noyiruganeso mokudipaga vantu navenye vepevhu. Vana kara nonoboma dononene. Ntani awo kwa kuzonagura mpepo ezi atu heseresa nomema noyikorama noyimeno.

Lipura asi: ‘Pwanare vantu va kere nononkondo dangoso dokuzonagura evhu ndi?’ Ngesi vantu kuna kuruganesa unene nonkondo dawo va rugane noboma dokuvhura kuzonagura nkarapamwe. Ukonentu wovantu  kapi una kuvhura kukandana po ezonaguro lyevhu. Nye vantu kapi ngava zonagura po evhu. Karunga ga tumbwidira asi ntaantani nga ka zonagure po owo vana kuhetekera ko kuzonagura evhu.

4. EZUVHISO LYOMOUZUNI MUDIMA: Sidiviso simwe esi va pumbire souhura kuna kara asi: ‘Mbudi zongwa ezi zoUhompa waKarunga tanko ngava zi divisa mwa za uzuni mudima, zi kare umbangi wonomuhoko nadinye, ntani nye ngaku kwama uhura.’ (Mateusa 24:14) Ezuvhiso eli lya li lisiga unene nezuvhiso eli ga rugana maukarelikarunga mwaza nomvhura. Pomazuva gopouhura mbudi ezi ngava zuvhisa kuna kara ‘mbudi zongwa zoUhompa waKarunga.’ Wa diva ko ukarelikarunga ou au zuvhisa mbudi ozo ndi? Nsene asi pouli, awo kuzizuvhisira tupu momukunda gwawo ndi awo kudivisa mbudi ozo zongwa “uzuni mudima, zi kare umbangi wonomuhoko nadinye”?

Intaneta www.pr418.com kwa demenena ‘kombudi zongwa zoUhompa waKarunga.’ Ako kwa kara ko yimbapiratjangwa yomomaraka gokupitakana 700. Wa diva ko Intaneta zimwe ezi azi hanesa mbudi zongwa zoUhompa waKarunga uzuni mudima ndi? Komeho zi wize Intaneta, Nombangi daJehova kwa divikwire mokuhanesa mbudi zongwa zoUhompa waKarunga. Kutundilira 1939, ntunda zosifo soRuhungu kwa kara po nonkango edi asi: “Kudivisa Uhompa waJehova.” Buke zimwe kwa uyungire asi sirugana soNombangi daJehova “kwa lihana nakunye.” Mbudi zongwa ezi ava divisa kunkondopeka asi Uhompa waKarunga ntaantani ngau rete ‘uhura.’

Nove kuna kumona yidiviso yine eyi za tumbura Bibeli vana faturura mosirongwa esi ndi? Monomvhura 100, sifo esi kwa gava mauzera kovaresi kuhamena yihorokwa yomouzuni mokuvavatera va koneke asi uhura pepi una kara. Vamwe kuvhura va uyunge asi yininke oyo kapisi usili. Ntani awo kuuyunga  asi pwanare maudigu ogo yiko ga kere, kapi tupu ngaga zuvhaika morwa kapi pwa kere yikwaukonentu yoyinzi. Nye, pana kara maumbangi gokupama asi uhura wouzuni pepi una kara.

Vadivi unsitwe vamwe kwa tanta asi uzuni una donapa. Pasihonena mo-2014, awo kwa divisire Mbunga zelipakerero lyonomuhoko asi: “Konyima zokukonakona yihorokwa yomouzuni, twa yi dimburura asi eparu lyovantu kuna kara mosiponga.” Ngesi vantu va yi dimburura asi uzuni una donapa unene kupita pwanare. Vatjangi wosifo esi ntani nava ava si resa va yi diva asi aga kuna kara mazuva gopouhura ntani uhura pepi una kara. Nye mevango lyokutjira meho, kuvhura o hafe. Morwasinke? Morwa kuvhura ngo ka paruke pouhura.