Apa o zuvhu nonkango “uhura wouzuni,” yisinke o gazara? Ove kugazara kuhamena ewizo lyaKristusa a ya tware vantu wovawa meguru nokufutisa vantu wovadona momundiro gwanarunye ndi kugazara asi nomfa domuntu? Magazaro gangoso kuvhura kuturetera sinka ndi masinganyeko.

Bibeli kutanta asi “uhura” ngau wiza. (Mateusa 24:14) Uhura kuutumbura hena asi ‘ezuva lyenene lyaKarunga’ ntani “Harumagedoni.” (Ehororo 16:14, 16) Maukarelikarunga ga kara nomagano gokulisiga kuhamena sirongwa esi. Nampili ngoso, Bibeli zene za gava mauzera kuhamena uhura. Azo kulikida eyi au tanta neyi au dili kutanta. Nonkango daKarunga kutuvatera hena tu dimburure asi uhura pepi una kara. Nye yomulyo po, azo kututantera eyi natu rugana ngatu ka paruke uhura! Pomuhowo, tu tareni magano gepuko kuhamena uhura. Ano konyima natu ka konakona eyi azi rongo Bibeli sili kuhamena “uhura.”

1. KAPISI EZONAGURO LYEVHU

   Bibeli kutanta asi: “[Karunga] kwa paka po uzuni, yiyo wa kora, awo kapi ngava u rundurura.” (Episarome 104:5) Velise ezi nonovelise dimwe hena kulikida asi Karunga kapi nga zonagura po evhu ndi a pulisire vantu va li zonagure po.—Muudisi 1:4; Jesaya 45:18.

2. KAPI NGAU HOROKA TUPU HARARASI.

   Bibeli kulikida asi Karunga ga tokora nare siruwo souhura. Azo kutanta asi: “Nagumwe si ga diva asi ezuva nosiruwo apa ngasi sika mo, novaengeli si vemeguru noMuna si, ntudi Guhya ntani. Rungarareni, one mu vangarare, yeeyi kapi mwa diva apa ngasi sika mo siruwo.” (Marukusa 13:32, 33) Yimo, Karunga ga tokora nare “siruwo” esi nga reta uhura.

3. KAPISI NOMFA DOMUNTU

   Uhura wouzuni kapisi nomfa domuntu. Kombinga zouhura wouzuni, Bibeli kutanta asi: “Vadinikarunga ngava va mana po, ano ava va huguvara HOMPA ngava tunga sirongo mompora.” (Episarome 37:9, 20) Uhura wouzuni kuna tamba uhura wovadinikarunga. Pouhura “vadinikarunga navenye ngava va pangura va va hanagure po.”—2 Peturusa 3:7.

1. UHURA WOMAPANGERO GOVANTU.

   Bibeli kufaturura asi: “Karunga gemeguru nga dika [epangero ndi] sirongo esi ngasi kererera narunye. Aso kapi ngava si funda nampili kanunu, nye ngasi hanagura yirongo oyo nayinye, makura tasi kara dogoro narunye.” (Ndaniyera  2:44) Ngava zonagura po ‘vahompa vepevhu novakwayita vawo,’ ava ngava ‘rwisa ogu ana rondo nkambe novakwayita vendi.’—Ehororo 19:19.

2. UHURA WOYITA NONYANYA NOUDONA.

   ‘Karunga nga hagekesa yita mouzuni mudima.’ (Episarome 46:9) “Vantu wovahungami - vantuzuni - yiwo ngava kara omu mosirongo setu. Nye Karunga nga nyafura mo vadinikarunga mosirongo, ano vananzo nga va dura mo moomu ava dura yimeno mevhu.” (Yisewe 2:21, 22) “Tara, nayinye tani yi ninki yi kare yoyipe.”—Ehororo 21:4, 5.

3. UHURA WOMAUKARELIKARUNGA GOYIMPEMPA.

   “Vaporofete kuuyunga yimpempa yelike; vapristeli kupangera moomu vana kuvapangera vaporofete. . . . Nye omu ngava rugana nsene ngayi haga nayinye eyi, ngapi nye?” (Jeremiya 5:31) “Mezuva olyo wovanzi ngava tantera nge asi, ‘Hompa, Hompa, nani kapisi medina lyoge ngatu porofetere, yiyo ngatu tjidire mo nompepo donondona oku tatu ruganene yitetu medina lyoge?’ Makura ame ntani ngani va dukwira asi, ‘Ame one ha na kara, ni mu dive. Ligoreni nge mu ze kwi, one ava omu vatuka Veta!’”—Mateusa 7:21-23.

4. UHURA WOVANTU AVA AVA KWATESA KO UZUNI.

   Jesus Kristusa kwa tente asi: “Nye yokureta mpanguro yeyi yokuninka asi, uzera apa wa wiza mouzuni, pomundema nouzera vantu kwa here po mundema.” (Johanesa 3:19) Bibeli kwa uyunga kuhamena siruwo saNowa asi: “Ruhanzo romema, ga zonagwire uzuni wanare. Nye Karunga ga tanta hena asi eguru eli lyantaantani nevhu eli lyantaantani nayo kwa yi ndindilisa Ezuva lyompanguro. Makura ngayi pye komundiro, ano vadinikarunga navenye ngava va pangura va va hanagure po.”—2 Peturusa 3:5-7.

“Ezuva lyompanguro” kwa li hetakanesa nezonaguro ‘lyouzuni’ eli lya horokere mosiruwo saNowa. Yisinke va zonagwire po? Kapisi evhu, nye “vadinikarunga,” nonkore daKarunga, yido va “zonagwire” po. Ano ‘mezuva lyaKarunga lyompanguro,’ nonkore dendi ngava di zonagura po. Nye vakaume vendi ngava paruka, ngwendi Nowa nepata lyendi.—Mateusa 24:37-42.

Gazara tupu omu ngau fana uzuni apa Karunga nga ka gusa po udona naunye! Yina zere asi, eyi za uyunga Bibeli kuhamena uhura azo mbudi zongwa. Nye, simpe kuvhura o lipure asi: ‘MoBibeli va tumbura mo siruwo esi ngau wiza uhura wouzuni ndi? Pepi una kara ndi? Yisinke nani rugana ngani ka paruke?’