Ame kwa kulilire mositata Los Angeles moAmerika esi sa divikwire koudona ou ngau horoka mo. Ose kwa tu retere ntazimwe, ano ame sikwamambeli.

Ose kwa kere mongereka zEvangeli. Nye ngani paruka eparu lyedona. MoSondaha ngani dimbi mosidinkantu. Nye momazuva gapeke ngani rugana yoyidona, ngwendi kulihameka monopati nokuruganesa yikwepangwe ntani kuhondera.

Ame ngani handuka usimbu. Ngani ruganesa nkenye eyi yina kara nge pepi mokutoonesa ko vantu. Eyi na lirongere kongereka kapi ya rundwilire nkareso zange. Ame ngani uyunga asi: “Hompa yige a tengwida kuwoko, nye nyame a ruganesa.” Apa na kere kosure koyiha yo-1970, ame kwa lihamekere mombunga politika zovasovagani ezi ngazi kondjere mokuvatera vasovagani morwa elitondororo. Yipo na lipakerere mombunga zovadinkantu ava ngava kondjere untu womuntu. Ose ngatu masha yikando yoyinzi, ano nosure ngadi pata posiruwo oso.

Morwa ehandu lyange ame kwa here kurugana yoyinzi kupitakana kumasha tupu. Yipo na tamekere kutoona vantu. Pasihonena, name novakwetu ngatu tara nomuvi omu vazera womoAmerika ngava hepeke vapika vawo wovasovagani wokutunda moAfrika. Nomuvi odo kwa tu handukisire makura ngatu toona vadinkantu wovazera ava ngatu tarere nawo nomuvi. Kutunda opo ngatu papara vazera yipo tu va toone.

Apa na ya kere koyiha yonomvhura 20 name namukurwange ntani namumbyange kwa divikwire asi tu vakorokotji. Ngava tu papara vaporosi. Mumbyange gumwe kwa hamenene mombunga zovakorokotji wovanene ntani name ngani lipakerere kumwe nawo. Eparu lyange kwa donapere.

Mukwetu gumwe, vakurona vendi kwa kere Nombangi daJehova. Makura yipo va zigidire nge kepongo. Apa na zire ko, na ka mwene asi Nombangi daJehova da lisiga. Nkenye gumwe kwa kere noBibeli ntani nokuziruganesa. Vanona nawo kwa geve yiuyungwa. Ayo kwa tetukisire nge apa na lirongere asi edina lyaKarunga Jehova. (Episarome 83:18) Na yi dimbwilire asi kapi va kere  nelitondororo morwa mombungakriste kwa kere mo marudi gokulisiga-siga.

Pomuhowo kapi na here kulironga Bibeli noNombangi daJehova, nye na here kuza komapongo gawo. Ezuva limwe apa na zire kepongo, vakwetu kwa zire kevango eli va sikilire nomusika. Makura yipo va ka dipagere mudinkantu ogu va here kuhokona ndjakete zendi zosipapa. Ezuva lya kweme ko awo kwa likangangere asi kava dipagere muntu. Apa va va pangwire, awo kwa yi sensere. Sinzi sawo kwa va tomenene modorongo eparu lyawo nalinye. Na hefe kweyi na dilire kuza nawo ezuva lina. Yipo na tokwere kurundurura nkareso zange makura tani tameke kulironga Bibeli.

Morwa na kere nonkareso zelitondororo, nkareso zoNombangi daJehova kwa tetukisire nge. Pasihonena apa gumwe goNombangi daJehova gosirumbu ga zire morugendo, age kwa sigilire vana vendi koMbangi gomusovagani. Epata hena limwe lyoNombangi woyirumbu kwa tungire kumwe noMbangi gomusovagani ogu ga dilire embo. Na yi pulire asi Nombangi daJehova kusikisa mo nonkango daJesus domwaJohanesa 13:35 asi: “Nsene mu lihara-hara, yipo ngava divira vantu asi one sili varongwa vange.” Na dimbwilire asi na gwana usili.

Apa na lirongere Bibeli na dimbwilire asi na hepere kurundurura magazaro gange, ni kare nombili ntani ni yi tambure asi yilyo eparu lyewa po. (Varoma 12:2) Tani tura po ezokomeho kanunu-kanunu. MwaMurongagona 1974, yipo na gwene ekuho ngagumwe goNombangi daJehova.

Konyima zekuho, simpe na twikilire kukondja ni nyokere po kuhanduka usimbu. Pasihonena, apa twa zuvhisire tunda embo zende embo muwidi kwa veke radio metuwa lyange makura tani mu tjida apa na here kumukwata ta zi ganda ta ka duka. Apa na tanterere ko vakwetetu omu nina gwana radio zange, makura mukuronambunga ta pura nge asi: “Ngano ko kwata ogu ana vaka radio zoge, yisinke ngano ono mu rugana?” Epuro olyo lya vaterere nge ni twikire kutunga po nkareso zombili.

MwaSikukutu 1974 yipo na tamekere kurugana novili 100 nkenye kwedi mokuronga vantu Bibeli. Konyima zosiruwo na lihamekere hena mokulizambera kurugana komberewa zonene zoNombangi daJehova moAmerika. Mo-1978 yipo na tengwire kositata setu Los Angeles ni ka pakere mbili oyina ava va verere. Konyima zonomvhura mbali yipo na ya kwere Aarhonda. Age kwa vaterere nge mokupakera mbili oyina dogoro konomfa dawo. Konyima yipo va tu zigidire koSikora zaGiliyata, makura tava ka tu tuma koPanama.

Kutunda pekuho lyange ame kwa ligwanekerere nomaukaro aga ga ninkisire nge ni handuke. Nye apa ngani ligwanekere nomaukaro ogo ngani tundu po, yipo ni nyokere po kuhanduka. Sinzi sovantu, kukwatera mo mukadange, ngava pandadeke nge monkedi omu ngani pangere ehandu lyange. Ntani name kwa tetukisire nge. Kapisi mononkondo danyamwange na rundurura nkareso zange. Nye, Bibeli yizo za vatera nge.—Vahebeli 4:12

Bibeli za vatera nge ni kare muntu gombili ntani ni hafere eparu. Kapi hena ani toona vantu, nye ame kuvaronga va dive Jehova. Ame kwa ronga Bibeli gumwe ogu twa linyengere nage apa twa kere kosure. Apa ga gwene ekuho ose kwa tungire nzugo zimwe. Ose simpe vakaume. Name namukadange kwa vatera vantu 80 va kare Nombangi daJehova pokulironga nawo Bibeli.

Ame kupandura Jehova kweyi ga vatera nge ni gwane ruhafo ntani ni hamene koruha rovanavazinyetu uzuni mudima.