Vafe ngava ka va pindura koufe ndi? Paurusa ga pulire mevhumbuko yiyo ga tjenge asi: “Ose nsene asi kwa huguvarera Kristusa googu mwenyo gwepevhu gwelike, ose vanamahudi unene, twa pitakana navenye. Nye yosili po yeyi asi Kristusa yige va hova kupindura koufe, mwava navenye va fa.” (1 Vakolinte 15:19, 20) Paurusa ga yi pulire asi evhumbuko ngali horoka, morwa pwa kere umbangi wevhumbuko lyaJesus. (Yirugana 17:31) Age kwa uyungire asi Jesus yige “va hova” kupindura koufe, ayo kulikida asi nga kukwama vapeke ava ngava pindura koufe.

Pwa kara hena konda zeyi no pulira mevhumbuko. Jehova age “Karunga ogu a dili kutanta yimpempa.” (Titusa 1:2) Jehova kapi ga uyunga rumwe yimpempa. Age kapi ta vhuru kutumbwidira asi ngapa kara evhumbuko nye a dire kuyisikisa mo.

Morwasinke Jehova ga tumbwidilira evhumbuko? Morwa eharo. Joba kwa pulire asi: “Muntu nsene ana fu, kuvhura hena a tengwire komwenyo ndi? . . . Makura ngo zigide nge, ame ngani ku limburure, makura ngo hafere nge ame siungwa soge.” (Joba 14:14, 15) Joba ga yi pulire asi Jehova ga kara neharo lyokukamuvhumbura. Karunga ga runduruka ndi? Bibeli kuuyunga asi: “Ame HOMPA kapi ani runduruka.” (Marakiya 3:6) Karunga ana hara kukapindura vafe keparu lyewa lyoruhafo. Olyo yilyo eharo na kara nalyo mukurona nsene a fisa munwendi. Nye malisigo kuna kara asi, Karunga ga kara nononkondo dokurugana eyi ga hara.—Episarome 135:6.

 Jehova nga ka pa nonkondo Munwendi dokukaretera ruhafo rorunene owo va fisa. Ngapi Jesus a lizuvhu kuhamena evhumbuko? Komeho zokuvhumbura Rasarusa, Jesus ga mwene kukora oku va lizuvhire vampanza vaRasarusa novakaume vendi, Jesus “makura ta lili.” (Johanesa 11:35) Sikando simwe Jesus kwa mwene mufisayendi gomoNayini ogu ga fisire munwendi. Jesus “ta mu retere nkenda, makura ta mu tantere asi: ‘Wa ha lira!’” Makura ta pindura munwendi koufe. (Rukasa 7:13) Jesus nage kumuguvisa nomfa. Age nga yi ka mu hafesa unene pokukagusa po ruguwo oru adi reta nomfa.

Wa fisa rumwe ndi? Kuvhura o lizuvhe asi nomfa kapi ngadi haga po. Nye usili wou asi, kupitira mwaMunwendi, Karunga nga ka gusa po nomfa apa nga ka vhumbura vafe. Karunga ana hara ngo ka mone omu nga gusa po nomfa. Age ana hara ngo ka tambure ava wa fisa. Gazara ruhafo oru ngo ka gwana pokukaparuka nawo narunye va hana kufa hena.

Lionel tuna tumbura nare, kwa tanta asi: “Pomuhowo apa na lirongere kuhamena evhumbuko kapi na yi pulire. Ntani kapi na huguvarere muntu ogu ga tanterere nge kuhamena evhumbuko. Nye na ya yi pulire apa na resere moBibeli. Kuna kundindira nononkondo mokukamona omama wovagara.”

Ono hara kudiva ko yoyinzi ndi? Nombangi daJehova ngadi yi hafera mokukulikida moBibeli eyi ya va ninkisa va pure mevhumbuko. *