SIRONGWA SOKUHOVA | VAFE NGAVA KA PARUKA HENA NDI?
Nsene muntu ana fu, yisinke ayi mu horokere?
Lionel kwa tanta asi: “Ame kwa gazarere asi nsene muntu ana fu kuza komavango gatatu: meguru ndi momundiro gwanarunye ndi mosirongo somafutiro. Na yi divire asi kapi na waperere kuza meguru ndi momundiro gwanarunye. Ntani kapi na divire eyi ayi horoka mosirongo somafutiro. Morwa kapi na yi mona rumwe moBibeli. Ngani yi zuvhu tupu kovantu.”
Fernando kwa tanta asi: “Ame kwa rongere nge asi nsene muntu ana fu kuza meguru, nye kapi na yi pulire. Ame kwa gazarere asi nsene muntu ana fu yiwo uhura wendi.”
Wa lipura rumwe asi: ‘Kupi a zi muntu nsene ana fu? Vafe kuna kuhepa ndi? Ngatu va mona hena ndi? Morwasinke natu yi huguvarera?’ Konakona eyi azi rongo Bibeli. Pomuhowo, tu konakone eyi za uyunga Bibeli kuhamena nomfa. Ntani natu ka konakona ehuguvaro lyomoBibeli kovafe.
Nsene muntu ana fu, yisinke ayi mu horokere?
EYI ZA UYUNGA BIBELI: “Vanamwenyo va diva asi ngava fa, nye vafe kutupu eyi va diva. Kutupu hena awo mfeto zokomeho; awo kwa va divara nuunu. O rugane unene paapa wa hulira, yeeyi mosirongo sovafe omu ngo za, mutupu magazaro ndi unongo ndi ediwo.” *—Muudisi 9:5, 10.
Nsene muntu ana fu kuza mosirongo sovafe ndi montoko omu mwa dira magazaro ndi kurugana yuma. Yisinke Joba ga pulire kuhamena sirongo sovafe? Age kwa zumbanesere yiweka yendi novana vendi mezuva limwe tupu ntani kwa mu zugumine uvera woudona unene. Makura ta likwambere kwaKarunga asi: “Ani vakwetu, ngano to horeke nge mosirongo sovafe; ninka nge ngani horame.” (Joba 1:13-19; 2:7; 14:13) Joba kapi ga uyungire asi sirongo sovafe kuna kara mundiro gwanarunye omu maudigu gendi naga ka ligwederera. Nye age kwa tente asi evango eli nga ka pwizumukira.
Nkedi zimwe omu natu lironga eyi ayi horokere muntu nsene ana fu, pokukonakona yihorokwa yovantu ntantatu va tumbura moBibeli.—Tara kakende “ Mavhumbuko ntantatu va tumbura moBibeli.”
Vantu owo ntantatu kwato gumwe gwawo ga uyungire asi ga zire meguru ndi momundiro gwanarunye. Ngano awo kwa zire meguru, ngano va ya yi tanterere vakwaawo. Ntani ngano va yi tjanga moBibeli yipo tu yi rese. Nye Bibeli kapi za uyunga ko kuhamena yininke yangoso. Vantu vena ntantatu kapi va uyungire ko yuma. Morwasinke? Morwa awo kwato eyi va divire, awo kwa kere ngwendi monompofu dononene. Bibeli pamwe kufanekesa nomfa konompofu. Pasihonena, apa Rasarusa ga fire, Jesus kwa tente asi kuna rara.—Johanesa 11:11-14.
^ para. 7 Meraka lyokuhova va tjenge Bibeli nkango ‘sirongo sovafe’ kwa tamba konontoko ndi mayendo.
