EYI ZA UYUNGA BIBELI: “Siruwo ngasi wiza, apa ngava zuvha ezwi lyendi navenye ava va kara monontoko makura tava pwaga mo.”—Johanesa 5:28, 29.

Jesus kwa pumbire asi mepangero lyendi lyoUhompa, ava va kara monontoko nga ka va pindura. Fernando tuna tumbura kwa tanta asi: “Apa na resere Johanesa 5:28, 29 sikando sokuhova kwa tetukisire nge. Kwa pere nge ehuguvaro, ntani na kere nomagazaro gomawa kuhamena meho.”

Mugara gomulimburukwi Joba ga yi pulire asi Karunga nga mu pindura koufe. Age kwa pulire asi: “Muntu nsene ana fu, kuvhura hena a tengwire komwenyo ndi?” Makura ta limburura asi: “Tani ndindire dogoro siruwo esi soudigu [montoko] tasi pu. Makura ngo zigide nge, ame ngani ku limburure.”—Joba 14:14, 15.

Malita mpanzaRasarusa ga divire kuhamena evhumbuko. Apa ga fire Rasarusa, Jesus kwa tanterere Malita asi: “Mpanzoge na vhumbuka.” Malita ta limburura asi: “Na yi diva asi, nga vhumbuka pevhumbuko lyezuva lyouhura.” Makura Jesus ta mu tantere asi: “Nyame evhumbuko nomwenyo. Ogu ana kupura nge ta kara nomwenyo, nampili a kare asi kuna fu.” (Johanesa 11:23-25) Makura Jesus ta pindura Rasarusa koufe. Sihorokwa oso kutulikida eyi ngayi ka horoka komeho. Gazadara tupu ruhafo ngatu ka kara naro apa vafe ngava ka vhumbuka!

EYI ZA UYUNGA BIBELI: Nonkango daKarunga kulikida asi evhumbuko lyaJesus lya lisiga nomavhumbuko ntantatu tuna zogere. Vantu vena ntantatu kwa va vhumbwilire pevhu. Kombinga zevhumbuko lyaJesus Bibeli kwa uyunga asi: ‘Jesus Kristusa, ga za meguru, a ka hingire korulyo rwaKarunga.’ (1 Peturusa 3:21, 22) Jesus gelike va vhumbwira meguru ndi? Jesus kwa tanterere vapostoli vendi asi: “Apa ngani za nye, ni ka mane kumuwapaikira evega, yipo ngani ka tengura ni ya mu simburure, none ngomu ka kare oku na kara.”—Johanesa 14:3.

Kristusa kwa zire meguru a ka wapaikire varongwa vendi uturo. Sivaro sava ngava vhumbwira  meguru kuna kara 144 000. (Ehororo 14:1, 3) Yisinke ngava ka rugana mo meguru?

Awo va kara nosirugana sosinene. Matjangwa kwa tanta asi: “Vanerago, awo hena va pongoka, vaava va hamena kevhumbuko lyomuhowo. Nomfa dauvali kapi ngadi paka nonkondo kwawo, nye awo ngava kara vapristeli vaKarunga naKristusa, ngava pangera kumwe nendi nomumvho eyovi.” (Ehororo 20:6) Ava ngava za meguru ngava ka kara vapristeli novahompa mokukapangera evhu kumwe naKristusa.

EYI ZA UYUNGA BIBELI: Mupostoli Paurusa kwa uyungire nonkango edi asi: “Ehuguvaro lyomwaKarunga eli na kara nalyo, nawo yilyo va kara nalyo, asi vantu navenye, va kare vawa ndi vadona, ngava va pindura koufe.”—Yirugana 24:15.

Wolye va hamena mo ‘movawa’ ga tumbwire Paurusa? Pasihonena, Ndaniyera mugara gomulimburukwi kwa mu tanterere asi: “Ngo fa, nye ngo vhumbuka to tambura mfeto zoge pehagero lyosiruwo.” (Ndaniyera 12:13) Kupi oku ngava ka mu vhumbwira Ndaniyera? “Muhungami nga gusa sirongo nga tunge mo narunye-narunye.” (Episarome 37:29) Jesus kwa tente asi: “Vanerago vava va kuruka, yeeyi sirongo yiwo ngava si weka.” (Mateusa 5:5) Ndaniyera novagara novakadi vamwe wovalimburukwi ngava va pindura koufe nokuparuka narunye pevhu.

Wolye va hamena mo ‘movadona’ ga tumbwire Paurusa? Sinzi sovantu ava va fa kapi va gwene mpito zokulironga Bibeli nokutura pasirugana nompango damo. Apa ngava ka va vhumbura, ngava vhura kukadiva Jehova * naJesus. (Johanesa 17:3) Navenye ava ava karere Jehova Karunga noulimburukwi ngava ka paruka narunye.

EYI ZA UYUNGA BIBELI: “Karunga nga kokota mahodi nagenye komeho gawo. Nomfa kapi hena ngadi kara ko, neguwo si nomalirankali nokukora kapi ngayi kara ko hena.” (Ehororo 21:4) ‘Ngava litungira mambo omu ngava kara. Awo ngava tapeka moyipata, tava lipanda vhinyu.’—Jesaya 65:21.

Gazara omu ngatu ka hafera eparu kumwe nava ngava ka vhumbuka! Nye epuro kuna kara asi: Ngapi tuna yi diva asi ngaku ka kara evhumbuko?