SIRONGWA SOKUHOVA | WOLYE NOMBANGI DAJEHOVA?
Nombangi daJehova vantu musinke?
Ose mbunga zomouzuni mudima, twa lisiga nomaukarelikarunga gapeke. Nampili ngomu mberewa zetu zonene za kara moAmerika, sinzi soNombangi daJehova kwa tunga moyirongo yapeke. Nombangi dokusika pomamiliyona 8 kuronga vantu Bibeli moyirongo yokupitakana po-230. Ose kuyiruganena mokusikisa mo nonkango daJesus asi: “Nye Mbudi zoNgwa ezi zoUntungi waKarunga tanko ngava zi divisa mwa za uzuni mudima, zi kare umbangi wonomuhoko nadinye.”—Mateusa 24:14.
Yi kare asi kupi twa tunga, ose kulimburukwa noveta dosirongo. Ntani kapi atu lihameke moupolitika. Morwa ose kukwama mpango zaJesus kuhamena Vakriste asi “awo kapisi wouzuni.” Ose hena kapi atu lihameke moyita. (Johanesa 15:19; 17:16) Moyita yauvali youzuni Nombangi daJehova kwa di tulire modorongo nokuvahepeka morwa kapi va lihamekere moyita. Mubisofi gwanare gomoNdovesiranda kwa tjenge kuhamena Nombangi asi: “Azo mbunga zonene po ezi za dilire kulihameka moyita mepangero lyaNazi.”
Saitunga zimwe kwa tente asi: “Nombangi daJehova kwa kara nonkareso zongwa unene. Ngano kuvapa yipundi yoyinene moupolitika, nye kapi tava pura. . . . Awo kulimburukwa kepangero, nye va pura asi Uhompa waKarunga yiwo welike ngau gusa po maudigu govantu.”—Nová Svoboda, Czech Republic.
Nye ose kapi atu ligusa ko kovantu. Jesus kwa kanderere kwaKarunga kuhamena vasikuli vendi asi: “Kapi na kukanderera asi o va guse mo mouzuni.” (Johanesa 17:15) Yipo nye asi, nose kurugana, kurandanga ntani kuza kosure.
Kuvhura o hafere hena
MAPURO
Morwasinke Nombangi daJehova adi dilire kulihameka moupolitika?
Nombangi daJehova kurwanesa noveta dosirongo ndi?
